Talelan 24 - BII BILA

Vana kɔlkaloo nda vana kɔlvesɛiyo

¹ Páŋalà vanaa tosaa dɛnnda vɔɔnda le, yeemɛi bii nɔm le nda delɔɔ kɔɔli le.

² Kani yiyan tosaa dɛnɛ vɔɔndo kínɛí co nda o lakɔl ni, balta dɛnnda vɔɔnndan kínɛí la fula nda o sondo ni.

³ A kɔlkaloo vana tangul cɛiyo ni, a dɛnɛ sinaa o sìm ni yili.

⁴ A sina pɛngoo vana pei cɛila ndɔla leninndan a ɲɛm sɔvɛn kɛndɛ súú-súù ka ni.

⁵ Vana kendu pɛ kɔl ndu nɔ kpaayaa, vana taasio vángalà yoomuma ndɔan ni.

⁶ Le kɔlan o cɔwvo, cal fɔlɔn ma tuu ɲɛkɛndɛi mɛɛ n kɔanin a sɔɔn yɛ. Vana nɔ pɛ vanaa silaa sɛ́lɛ́, a nɔla yaamɔɔa o cɔwvo.

⁷ Diɔm sondo vesɛiyo kendu mò bii sɔɔn kɔlkalon bila. Lelan, diɔm vaa lende bɛnda mò kumbi sondoo le sɔɛi nɛɛ nda dimi sɔɔn o dio luɛyaa kobio nin-nda le.

⁸ Vana tuu tuula dɛnɛ vɔɔnndan-ndo, nuaa nda veelu ndu ni aa kɔɔfanɔ yɔŋ vɔɔndo.

⁹ Tuula diɔm sondo vesɛiyo, le dɛnɛ vɔɔndo tosaa daama la co ni. Vana mam vannda-o nɛinun bɔɔ vannda.

¹⁰ Taa vi pɛ diallon o paale dɛnɛ palaalen coo, mɛɛ a kindu n'dial te.

¹¹ Baŋà vanaa nda kilul yamɛi le nda diyɔɔ-a. Ciindiaa nda, a co kan nɔla simndan te-a, vanaa nda co kɔlan le nda diyɔɔ pɛɛn.

¹² Bɔɔle ma dimi aa: «I ve sina le». Kɛ vɛ̀ɛ̀ vana sinà kɔltan-ndo ndu sinà masinaa le? Bàà vana co nɔm mandaa-o sinà le? O mingulnin vana-vana mɛɛ dɛnnda ndɔlan la co yɛ.

¹³ Po nuu sei! Dio lɛan, ma naŋ bɔɔ! Vaa malɛɔ yeelanin nɔm o sondo.

¹⁴ Lende koni kɔlkaloo yeela ni. Sina pɛngu maa taa sɔla pɛ kɔlkaloo, siɔdii nɔmndo bɛnda, tiindan nɔmndo tembu le.

¹⁵ Nɔm vana kɔlvesɛiyo sei! Miingul cɛi vana sandaa yaŋɔɔlen te, tɛɛmbuu calta ndɔlan te.

¹⁶ Kani hali vana sandaa del bɛɛ leŋɔmmɛw, cɔnnɔnndo o cannin ni. Kɛ vanaa kɔlvesɛiya nda, lɛŋ dí dɛnɛ palaa tiiya nda sondoo ni.

¹⁷ Naŋ kɔ̀l le delɔɔ yaamɔɔ nɔmndo le, kɔl nɔmndo dɔawnùn ɲaale le boŋ o boŋ ndo le,

¹⁸ yɔŋii Mɛlɛka cɔ ken, mò tuisi kɔllo a yaamɔɔ nɔm kon.

¹⁹ Támbù kɔllo le vanaa tosaa dɛnnda vɔɔnda le, páŋalà vanaa vɔɔnda le,

²⁰ kani vanaa tosaa dɛnnda vɔɔnda nɔ siɔdii kɛndɛ le, maa tɛngɛ co ɲumndo-o yoomu ndaa co ni.

²¹ Po nuu sei! Ke Mɛlɛka a masaa bɛɛlen. Del vanaa yeema le dɛnndan kpow yɛlɛmiaa-a kɔɔli le.

²² Kani o lepilɔɔ kpé nda delnin ni, a sinà dɛnɛ palaa Mɛlɛka nda masaa tuisinin nda coo-o le.

Silala celennda vanaa kɔlkalua

²³ Silalan ndan bɛɛ, vanaa kɔlkalua o ba la fula ni: O bɛnda mì vana hiyan vannda o yamɛi kiolɔɔ nin te.

²⁴ Te vana kialaa n'yamaa dimul pɛ vana nɔ dí loo aa: «A nɔ dí», vɔvanndo luɛi ndu tɛɛn nda vannda, o sɛ́lɔ́ɔ́ mɛna ndu.

²⁵ Kɛ vanaa kialaa n'yamaa yaala pɛ vanaa nɔ dí le-a, vannda naŋ kɔl a nda, a dɔw nda duaa.

²⁶ Muli toɲaa cɔm canyɛi lekɛ́ndɛi ni.

²⁷ Cii yɔ fɔlɔn baala n nɔ o bɛ́ɛ̀-o ma váá ciɛɔn nɔmndon, malan n kila cɛiyo.

²⁸ Tɛndal vana niaa cal-lo seile lakafalen te. Vɛ̀ɛ̀ ma dimi còòlan?

²⁹ Dimi le aa: «Mɛɛ mì tosal ndu ɲɛ ndu tosal-la-o, mì mingul ndu màá o puu ya-o.»

Ɲɛ co vana siɛlɛiyo cumndo-o

³⁰ Paale pilɛ, mí kei o ciɛi vana siɛlɛiyo ikɛi, o nakɔ vana pe lebol too ikɛi.

³¹ Billo vannun lenin nɛɛ-nɛɛ ka, vanáà ci ɲɛ-ɲɛ celen te fɔ yɔɔn. Kunga lapowvo ndu va o delaa.

³² Yáà mɛɛndianndo, mí keela kɔllo, mí sɔla pɛɛkoo pum:

³³ Vana lɔl pɛ ɲɛ-pɔmbɔ, mà yinda le telen bingi, mà siɛndin ɲɛ-pɔmbɔ a balan kafalaa,

³⁴ o telen kon nin, bala fondolan la voolunin nɔm maa vana del vannda coo-o. Kuɛi kpuvanin nɔm mɛɛ vana nɔ ɲɛm cɔwvon o ba-o kpuva vana yɛ.