Talelan 22 - BII BILA

¹ Diola kɛndɛlan la hiow naŋɔɔ a bolofaa bɛndoo. Vannda nɔm laalanndo co fisa a sianion te kon te a volion nɔu.

² Vana bolofaa a vana bala fondoo a nɔ ɲɔɔ pilɛ diom pilɛ: nda ŋiɔn kpow Mɛlɛka toosiaa nda ni.

³ Vana taasio ce pɛ dɛnɛ palaa hunɔɔ, o vennun. Kɛ vanaa bii dɛnɛ bila le-a nda kɔnndan tuŋ, sanga fula pɛ o tol nda coo.

⁴ Vanndo tuisin pɛ, mò nɔ siòòŋii Mɛlɛka-e, o sɔla bolofaa, bɛɛlen a yoomu vilɛiyo.

⁵ Yɔɔn a yaŋɔɔlan la co o nɛi vana kela tuunduɛiyo coo, vana kaolan pɛ ndu pila o kpakpala lan.

⁶ Pɛɛku cuaambɔɔ nɛi o bɛnda mò kela coo-o, o kon hali o hun yuuva bɛɛ, o fáŋàn lecoo le.

⁷ Vanaa bolofaa o ba bɛngu vanaa bala fondoa co ni. Vana cua kueo-vo co cɛ vana o cua kueo o ba-o ni.

⁸ Vana saŋ pɛ dɛnɛ sandaa lepɛŋndo, o kow dɛnɛ palaa. Kani sionnde o tosa dɛnɛ vɔɔndo len le yomnin.

⁹ Vana tosal vannda kɛndɛiyo-o sɔlanin duaa, le tùú o co vana bala fondoo balo ndɔɔ keo-vo.

¹⁰ Tow vana yongaa mì sɛɛngianndo cuu, vana tui lɛnin lasɔngɔ a layeovan te.

¹¹ Vana nɔ pɛ yiyan diandaa mò nɔ sɔɔn sɔvɛɔn o sondo, o siŋnun caaŋoo masaa.

¹² Hɔlta Mɛlɛka lan la co sinapɛngoo kandaa, kɛ o co sɔɔn vanaa huiyaa n'vannda kɛɔ.

¹³ Vana siɛlɛiyo cɛn pɛ o dimi aa: «Yàlàá co o bɛ́ɛ̀, yɔŋii o dii ya o nɛi déŋ!»

¹⁴ Yaŋɔɔle vɔɔnnden pila sɔɔn vanlaandua tiamaa n co ni, vana Mɛlɛka tuulu kɔl a ndu-o haw lon ni.

¹⁵ Diɔmnde co iyiinánndé cuaambɔɔ o kɔl, sionnde silaalen le kialu ndi ndu kɔɔli ni.

¹⁶ Vana hiw pɛ vana bala fondoo yɔɔkpiaa, a siinguu ndu vana bolofaa. Vana ke pɛ vana bolofaa, nɔm pila lo fondo.

Kanalannda yɛ́-yɛ́lan

¹⁷ Yaŋ nilan ma tuei sɔɔn vanaa kɔlkalua, handu kɔllo o sinapɛngu ya co nɔm pɛɛkoo-o coo.

¹⁸ O co dɛnɛ kɛndɛ le nɔm ma mandan mun o kɔl, ma va o bɛɛndianndo le mun miinguuo dimio lɔ́ɔ́-lɔ́ɔ̀.

¹⁹ I co nɔm hau sinapɛngoo yɔngoo a mun o kɔɔ, haliko ma kɛsi kɔl nɔmndo Mɛlɛka coo.

²⁰ I sɛval nɔm silalan a sɔɔn pɛɛku vana-on beleyaa a sinapɛngoo o kɔɔ,

²¹ haliko ma sina sɔɔn toɲan a sɔɔn kpeekpeiyon. O kon vanndo vem nɔm pɛ a caa ndu mulul a sɔɔn toɲan.

²² Yúngà vana bala fondoo le tùú o nɔ kpaaya loo le, del vana ikɔɔ coo nɛɛ nda kialu yaman o dio luɛyaa kobio nin-nda le,

²³ kani Mɛlɛka simnin le nda, mò poonda yoomu vanaa poondiaa nda ɲɔɔn o ba-a.

²⁴ Hólnùn vana hiw kɔllo tuwvo-o le, holnùn vana nɛi kɔl itambu loo le,

²⁵ yɔŋii n siŋnun maa nda, mì ken va yaŋɔɔle dɛnɛ palaalen le ceen nɔmndo.

²⁶ Siŋnun maa vanaa kan te, vanaa lɔaanun ibuŋ le kuee vanndo co cuaa-o salaa-a.

²⁷ Kani taa hun sɔla ɲɛ le salaa le, a hun cuel nɔm kpele nɔm hinia.

²⁸ Fáŋà powta fuɲaa mamaa kɛsi sindɛ o pɛɛngulan-ndan te.

²⁹ A ce nin vana caa vali ndɔɔ taw-vo? Le masaa o tosanin vali ndɔɔ ni, o lonin ndu tosaa maa vanaa baalaa vannda sina le-a le.