Talelan 20 - BII BILA

¹ Hɔlla mɔiyan ma heelu vanacieo ni, mì mɔima nɛyan ma luei vana o poopoo. Vana yɔngun man pɛ o siŋnun vana kɔlkalu le.

² Maa pɛɛliaa yàlà téndé kɔltuw masaa co ni, vana biiŋuu pɛ kɔl ndɔ tuwvo o vɔngulu yoomu ndɔɔ.

³ Dɛnɛ lebɛɛo o co ni le sɛɛngianndan kpakpalaa. Kɛ diɔm sondo vesɛiyo ndu, bollen o luei lenin ni.

⁴ Le siòòŋii hoiye, vana siɛlɛiyo vee a telen bɛnda-o le. Tuma koavaa tiiya pɛ, o piɛi vannda, kɛ o sɔla ɲɛ le.

⁵ Tuula co vanacieo o kɔl-tan la co maa mɛmma co o lɛŋnden bɛngu di-an. Vana kendu kɔl-lo caa lan solio ceen ni.

⁶ Vannda taw a co cɔmnɔnndo maa a lò o lediom coo, kɛ nɛ̀ɛ́ nɔla yɛ vana lò o diomnden coo-o saalɔn?

⁷ Vana sandaa co kelaa o sandei nin, dɛnɛ kɛndɔɔ vanin le cuavaa ndɔa o mɛinin-nda.

⁸ Masaa cal pɛ le yaman kiolɔɔ, o keleŋa dɛnɛ vɔɔndo cɔ cɔ́-cɔ́ o tofa lepilɔ.

⁹ Nɛ̀ɛ́ tiw yɛ ba mò dimi aa: «I dindi kɔl nuu valan, i dendu, haki oo haki co ya le»?

¹⁰ Panila bɔɔfiɛilan a ɲɛla tuvaa n'ɲɛla lakafalan la nɛinun bɔɔ Mɛlɛka.

¹¹ O dɛnnda ndɔlan nin, mì cuaambɔɔ cɔm te o vanin pɛ vana sandaa a vana káà kɛndɔɔ.

¹² Mɛlɛka toosiaa naa nilan le tueyɔɔ a hɔltan le cɔu ni.

¹³ Hiw lɔan kaola le, yɔŋii n siŋnun vana bala fondoo. Kumbi hɔltan valan, ma de mɛɛ n yeema yɛ.

¹⁴ Vana piandaa lavɔngoo cɛn pɛ o dimi aa: «Ɲɛlan ndan la kendu bɔɔ baa.» Kɛ o kɔɛnnun pɛ, o kɔ sangalan.

¹⁵ Sianion a yɔɔvala sɔvɛlan la co taw-taw, kɛ ɲɛ hiow vaa o sɔvɛ-o co sɔɔn pɛɛku vana-on ni.

¹⁶ Te vanndo komal nɔm pɛ mò lɔɔnun ibuŋ le vana n sina loo kueo yɔngoo, bii volɔɔ ndɔ cuɛinanndo ndu o ba o landei nin. O lɔɔnun pɛ ibuŋ mò dimul nɔm le miallo kueo keo, bii ndu landei o ba.

¹⁷ O kandɔɔ, ɲɛdiaa levuiyo yeela taw. Kɛ o kon kɔɔli, o muungu nɔm o sondo maa lapow.

¹⁸ O kɔlkalulan kenanndon tuula la bɛndà ni. Le kɔlan o cɔwvo, cal fɔlɔn ma tuu ɲɛkɛndɛi mɛɛ n kɔanin a sɔɔn yɛ.

¹⁹ Vana congu vannda nɛɛ-nɛɛ ka-o cɔɔmuu sɔɔn viannanndon ni. Lelan kpakpala vana tombolaa.

²⁰ Te vanndo mɛna pɛ fuɲa ndɔ, te kon te a kala ndɔ, yoomu vana kon ɲumnin mɛɛ tɛ̀ngɔ́ɔ́ ɲum o ɲumndan nin nuaa yɛ.

²¹ Bolofaa vana yalà sɔla o lepilɔɔ-o nɔ duaa o mɛɛlulan te.

²² Dimi le aa: «I mingi vɔ màá dɛnɛ vɔɔndo». Tiindan Mɛlɛka, mò baŋa nɔm.

²³ Panila nda bɔɔfiaa lan la nɛinun bɔɔ Mɛlɛka. O hinì kɔl a ɲɛla tuvaala n'ɲɛla lakafalan te.

²⁴ Mɛlɛka sìm kela vanacieo laci ni. Te o co kon te vɛ̀ɛ̀ vanaciee kon nɔla yɛ mò bii nɛi ndɔɔ bila?

²⁵ Yaŋɔɔlen o co le vanacieo dimio yɛfɛlɛn ni aa: «Mɛlɛka ya ke hoo ni», te kon te le kɛɔ yiyanndo lɔ́ɔ́ pá mò baa yoolen o Hala lo ni.

²⁶ Masa kɔlkaloo puusiàà vanaa yɔŋ vɔɔnda ni, mò pesipesi nda.

²⁷ Fitina Mɛlɛka tosa le yoomu vanacieo-vo co kɔl ndɔɔ ni, ndu teengiaa yiyannda co ndu nin-ndan ni.

²⁸ Vanakɛndɛyɛi a lou o diomnden coo kanda masaa ni. Lo ndɔɔ o diomnden coo tosa ni mì masale ndɔlen le sim yili.

²⁹ Ɲɛ nɛŋi felengia-o co kpaaya ndaa ni. Naŋɔɔ vanaa yuuvɛiya co yulunnde ni.

³⁰ Boolɔnndan la tiwba mì la faŋa vana o nɛi vɔɔndo coo, mì lɔɔ dindi vana kɔllo.