Talelan 17 - BII BILA

¹ Bulu vesɛi bingio vaa dioo a kɔlɲuloo co fisa a vaa vision dioo o cɛi sɔngɔlan la co nin-ndo nin.

² Buɛi nɔ taasio-o cuanin fonda hɔ́ɔ́ soli vana lasiɛmbu loo, mò sɔla kɛ́ ndɔɔ o yungu kon tɛɛn.

³ A yinnden vana sina naŋɔɔ n'sianio a naŋɔɔ n'volio ni, kɛ kɔlta vanndacieea lan, Mɛlɛka yaasiaa ndan ni.

⁴ Vana dɛnɛ vɔɔndo yaŋ nilan o sɔɔn vɔɔnndon ni. Vana lacòòvaa yaŋ nilan o sɔɔn muuluanndon ni.

⁵ Vana mam pɛ vana bala fondoo, mɛɛ vana cɔw ndu-o o tɛɛndan ni. Vana mam pɛ caanda le dɛnɛ palaa co nda coo-o, dɛnɛ palaa toalnin vana kon coo le ken.

⁶ Maa mɔsil lemasa cuavaa-imamaa co le kaasoŋaa yuuvɛiya ni. Cuawva nda, ɲɛ nda heelanndo co fuɲaa ndaa ni.

⁷ Diomnda lebɛɛlan la bɛnda a vana pe lebol too le, o co vɔ le còòlan bɛndaa a simlacinɔɔ le.

⁸ Ɲɛm nda ke vannda le nda luɛyɔɔ nin-ndon co vanaa co mun yɔngoo-a o hɔl maa powta báá kala. O kon, maa nɛɛ-nɛɛ nda kɔɛ pɛ a sɔla dɛnɛ kɛndɔɔ.

⁹ Tɛɛmbuu vanndo tɛɛmbuu-o pɔɛyɔnndo, kon yeeliaa canyɛi ni. Kɛ lambanndo sondo mingio lecoo, kon puusiaa canyɛi ni.

¹⁰ Vana taasio kanalanndo le pilɛ hiow nɛŋi, a diɔm sondo vesɛiyo lɔɔ kɛmɛ a sionnden.

¹¹ Vana kɔlvesɛiyo ndu, dɛnnda kpoku-kpokulan daama o kindin le tosaa ni. O kon ndu pila tuisin kpaaya dɛnɛ palaa coo.

¹² O co fisa mì vana bɔŋan a kɔ́lɔ́vúlu nda cuel cuavaa ndɔa-o, a bɔŋanndo a diɔm seemaa pɛ o kɔl-lo.

¹³ Dɛnɛ palaa folan o vana kon-ndo cɛinin te, vana mingì dɛnɛ vɔɔndo o fonda dɛnɛ kɛndɛ nda tosal ndu-o-o pɛɛn.

¹⁴ Sɛɛngianndo kandɔɔ co ko maa ɲɛ kanda mɛnndan-ndo bulio. Lelan lɔ́ɔ́ sɔngɔɔ kuvan-ndɔ loo, soli pelon lenin.

¹⁵ Vana ke vana kɔlvesɛiyo dí-o nda vana yaala vana tɛɛmbuu isɔɔ loo-o, nda ŋiɔn kpow a nɛinun bɔɔ Mɛlɛka.

¹⁶ Volion va bɛɛ diɔm sondo vesɛiyo o ba, kpeku yɛɛ o soli yɛ a mun? Mò va maa kɔlkaloo o piandunin a mun ni? Kani o pe lebol te.

¹⁷ Caan kpeekpeiyo cɔm kaolaa o dɛnndan kpow nin ni. Pɔmbɔɔ, te kon te bɛndoo ndu co vana vana ikɛi le sangalan piɔvan.

¹⁸ Vana pe lebol too daama lɔaanun ibuŋ ni le kueela vanndo cua lan salaa o fonda vana kon.

¹⁹ Vana yeema sɛɛngianndan-ndo yeema caanda tiŋɔɔ ni. Vana kuundian pɛ ndu a del.

²⁰ Vana dindu kɔl too sɔla dɛnɛ kɛndɔɔ le. Vana dimi pɛ diomnda vɔɔnndan a caanda, ndu del o dɛnɛ palaa nin.

²¹ Vana velu pɛ diɔmndo, mɔnɛi tuŋ i co le nɔm ni. Fuɲa velu diɔmndo-o nɔla ɲaaloo dɔwnɔn te.

²² Kɔl ɲaaloo kooma yɔngu kɛndia-an o co ni, kɛ kɔl tambɛiyo ndu, paalan o veesiaa vana ni.

²³ Ɲɛm kean sɔɔsɔɔ-on hɛnan vanaa kɔlvesɛiya biyɔɔ ni, le dɛnɛ sandaa faŋaa o fonda ndɔɔ.

²⁴ Kɔlkaloo co vana taasio ikɛi kpɛɛlun, kɛ diɔm sondo vesɛiyo ndu, lɛŋnde-mɛɛlu pɔ́ o yaa hɔlten ni.

²⁵ Kɔl tambɛiyo hɔ́ɔ́ diɔmndo ke fuɲa ndɔ ni, mɔnɛi o luei kala velu ndu-o ni.

²⁶ O niŋ mì vana luei vana tɛɛmbuu isɔɔ loo bɔnɔ le, o co vɛlɛ dɛnɛ sandaa le vana vannda ke bɛɛlen-ndo lɔɔ le.

²⁷ Vana taasio tombola taw le, vana lew o isɔɔ loo co vana kɔlkaloo ni.

²⁸ Hali diɔmndo, te o mei pɛ, o siŋnun maa vana kɔlkalu. Te o bii pɛ sondo ndɔɔ, o siŋnun maa vana sinaa dɛnɛ.