Talelan 12 - BII BILA

¹ Vana yeema pɛ dɛnɛ sinaa, o cɛl mà cɔm ndu sɔvun ndɔn. Diɔmnde o co le kanalanndan kɛɔ cɛlɔɔ ni.

² Mɛlɛka nàŋ kɔl a vana tosaa dɛnɛ kɛndɔɔ-o, mò yaala vana nɔ tuula vɔɔnndan-ndo.

³ Vana tiwba simndan yili o kɔlvesɛiyo tosaa nin te, kɛ puundun vanaa sandaa mun connun isisi yili.

⁴ Vanalanɔ sɔvɛɔ co maa mɔsil lemasa le pɔnɔ ndɔ. Kɛ vanalanɔ tuisi vana siɛmbulan-ndo ndu, maa nàá siɔŋi vana paalan-ndo o co ni.

⁵ Yiyannda vanaa sandaa la co lɔ́ɔ́-lɔ́ɔ̀ le dɛnɛ sandaa tosaa ni, vanaa kɔlvesɛiya yɛ, kafalan kínɛí la hun nda o kɔl le tosaa ni.

⁶ Yaŋɔɔla dii vana lan sɔɔn vanaa kɔlvesɛiya n co ni. Kɛ sɔɔn fula vanaa sandaa sondo-on n soli nda piɔ́mndo o sondo ni.

⁷ Vanaa kɔlvesɛiya del pɛ, a cuu itambu o lepilɔɔ. Kɛ mì yungu vanaa sandaa lonnun isisi yili.

⁸ Vana kɔlkaloo vannda candu ni, kɛ diɔm sondo vesɛiyo ndu, kuisinndo o kuisin vannda ni.

⁹ O co fisa mì vannda kɛɛ nɔm yii luɛyɔɔ, nduyɛ ma nɔ̀ vana baalaa o pilɛ, a cɔmndo maa vana bɛndoo n co ni, kɛ a nɔ bɛɛ ɲɛ n dio le.

¹⁰ Vana sandaa nɔ hɔlten cɔlua ndɔa coo, kɛ vana kɔlvesɛiyo ndu, kpoku-kpoku o co ni.

¹¹ Vana váá pɛ ciɛi ndɔɛi, ndu sɔla baloo taw. Kɛ vana del pɛ sɔɔn fondon kɔɔli, mɛɛ ndu pe lebol te.

¹² Ɲɛm lakafan vanaa kɔlvesɛiya yeema ni. Kɛ o kindikindin vanaa sandaa nin daama tɔnɔɔ co ni.

¹³ Vana vɔɔndo nɔla mò biinun o sɔɔn ndɔn nin. Kɛ vana sandaa lo o dɛnɛ palaa nin lɔ́ɔ́-lɔ́ɔ̀ le.

¹⁴ Sɔɔn sondon lueilul vana tɔnɔɔ taw, mɛɛ baalaa ke vana salaa nuaa yɛ.

¹⁵ Nuaa diɔm sondo vesɛiyo yiyàn ni maa o co dɛnndan kpow caa tosaa. Kɛ vana bii silalan-ndo, ndu siŋnun vana kɔlkaloo ni.

¹⁶ Diɔm sondo vesɛiyo nɛi kɔl tuulu le, kɛ vana kɔlkaloo ndu vionɔɔ o vian kɔl ndɔ fulaa ni.

¹⁷ Vana dimi toɲaa-o cɔm dɛnɛ sandaa vakpa ni, kɛ sei lacòòvaa ndu kafalan la hɛnan ndu ni.

¹⁸ Mì vana tombola fondo-fondoo boli vana a tombola ndɔɔ maa a mɔɛi cɔw. Mɛ sɔɔn fula vana kɔlkaloo o sondo-on, maa kooma singiaa n co ni.

¹⁹ Sɔɛi toɲɛi viaw lɔ́ɔ́-lɔ́ɔ̀ ni, kɛ sɔɛi lacòòvɛi ndi le telen bingi cúkpɛ̀ i viaw ni.

²⁰ Kafalan kposon la co vanaa yɔŋ vɔɔnda o kɔl ni. Kɛ ɲaaloo co le vanaa sila vannda le nda kɔlɲuloo-a.

²¹ Dɛnɛ palaa komal ko vana sandaa le, kɛ sɔɔn vɔɔnndon cuu vanaa kɔlvesɛiya kɔɔli le.

²² Vanaa lacòòvaa nɛinun bɔɔ Mɛlɛka. Vanaa toɲaa hɛnan ndu ni.

²³ Vana taasio cɔ́mnùn a sinapɛngu ndɔɔ le. Kɛ diɔmndo ndu, diɔmii ndɔɛi o pɛngɛla ni.

²⁴ Simlacilen le co le vana tosa baalaa taw-vo. Kɛ vana siɛlɛiyo ndu mɛɛlula ndɔlan o cɛlen nin.

²⁵ Buulanndan la va pɛ vanndo o kɔl, o vi diallon. Kɛ sɔɔn kɛndɔn nɛŋi vana kon kɔllo ni.

²⁶ Vana sandaa, vana cɔm caanda nɛi kpeekpeiyo-o o co ni. Kɛ kela vanaa kɔlvesɛiya laasiaa nda pila ni.

²⁷ Doosunɔ siɛlɛi tuei ivisi le. O co dɛnɛ kɛndɛ le vanacieo vaa vana fulaa n'diallo.

²⁸ O nɛi dɛnɛ sandaa coo cindaa co ni, vana kɔɛ pɛ lecoo, o vi le.