Talelan 10 - BII BILA

Talela yɛ́-yɛ́lan a niinu vanndacieea o kɔɔ

¹ Talela Salomɔn-ndan. Hɔ́ɔ́ kendu pɛ kɔl, o nɛŋi fuɲa ndɔ kɔl, kɛ hɔ́ɔ́ kindu kɔl too, kala velu ndu-o o luei mɔnɛi ni.

² Bolofaa lakafaa sólì vana kpeku le, kɛ dɛnɛ sandaa kanda vana a piɔ́mndo.

³ Mɛlɛka mel vana dɛnɛ sandaa a yiaan te, kɛ vanaa yɔŋ vɔɔnda sɔla ɲɛ kɔlta ndalan la yeema-o le.

⁴ Balan kafalaa cuu vana pɛŋnden ni, kɛ bala baalalan ndan, bolofaa la luei ni.

⁵ Vana cuungiaa pɛ baloo telen koavaa, vana kɔlkaloo co kon ni, kɛ vana lɔl pɛ tuma kon, vannda luei ndu yii le.

⁶ Vana kela pɛ kela kɛndɔɔ, ndu sɔla duaa. Kɛ kɔlvesɛiya vian kɔlvesɛiya ndaa o sɔɔn ndan nin ni.

⁷ Ɲɔɔ hɛnan vana le loonɔnndo a vana dɛnɛ sandaa ni, kɛ vana vɔɔndo ndu, diola ndɔlan la nɛi fula vannda o kɔl te.

⁸ Vana kendu kɔllo-o cɛl tɔŋndan ni, kɛ vana soaa mɛ̀ɛ́-mɛ̀ɛ́ ka-o, laasianndo co ndu levil te.

⁹ Vana kela pɛ o sandei nin, o vannun yili, kɛ vana kela pɛ kela tuunduɛiyo, niinu ndɔɔ fulanin ceen.

¹⁰ Vana vin pɛ caanda toɲaa a saangiaa nda, vana soo pɛ mɛ̀ɛ́-mɛ̀ɛ́ ka, laasiando co ndu levil te.

¹¹ Sɔɔn vana sandaa n co maa mɛmma soon, ma yɔngu vana cindaa-an. Kɛ sɔɔn vana vɔɔndo, yɔŋ vɔɔndo mun vian ni.

¹² Nɛyɔnndo hun a sɔngɔlan ni, kɛ kaolaa kumbu tɛɛmbuulan kpow ni.

¹³ Dɛnɛ sinaa co vana kɔlkaloo o sondo. Kɛ vana pe lebol too ndu, sionnden le faŋan ndu o kɔɔ le.

¹⁴ Vanaa kɔlkalua ca sinapɛngoo mandaa, Kɛ vana pe lebol too soo dɔ́ɔ́ pɛ, delɔɔ ndɔɔ yom lɔ́ɔ́.

¹⁵ Maa kpaki bolofaa kanda vana bolofaa ni. Kɛ tɛɛmbuuo bala fondolan la tɛɛmbuu vana bala fondoo ni.

¹⁶ O baala vana sandaa tosaa-o nin o sɔla yoomoo ni. Kɛ le dɛnɛ vɔɔndo tosaa vana vɔɔndo tosa baalaa ni.

¹⁷ Vana bii pɛ silaa, ndu hiow laci o ceen ndɔɔ nin. Kɛ vana cɛl kanalanndo le, ndu laasian.

¹⁸ Dɛnɛ muuluanndo o co le nɛyɔnndo vonɔɔ ni. Vana sɔɔn pɔmbɔɔ ndu, o pe lebol te.

¹⁹ Vana hiw pɛ sɔɛi a pilan caanda tana. Kɛ vana caa diɛɛmule ndɔlen biyɔɔ-o, vana taasio co kon ni.

²⁰ Diɛɛmule vana sandaa le co ko maa volin hiow diondɔɔ-on. Kɛ yiyan vana kɔlvesɛiyo ndu co ɲɛ-ɲɛ le.

²¹ Sɔɔn vana sandaa n mala vanaa bɔɔ-bɔɔ, kɛ kɔlkalu lepɛŋndo dii vanaa pe lebol te-a ni.

²² Duaa Mɛlɛka-o kínɛí siinguu vana vana bolofaa ni. Kindikindin vanacieo cɔɔlu ɲɛ-ɲɛ lecoo le.

²³ Dɛnɛ vɔɔndo tosaa co diɔmndo o hɔl maa lapisul. Lende koni sɔɔn kɔlkalon tosaa n co vana kɔlkaloo o hɔl maa lapisul ni.

²⁴ Dɛnnda vana vɔɔndo vo lan, lan la komal ndu ni. Dɛnnda vana sandaa yeema lan, lan o sɔlani.

²⁵ Piɔɔ hoeyii fùkù-fùkoo hiow pɛ, o hiow a vanaa tosaa dɛnnda vɔɔnda. Vanaa sandaa lonnun isisi o fonda ndaa yili.

²⁶ Mɛɛ mɔima vaalɛiyan ma vaaliaa vana ciŋndon yɛ, mɛɛ kumnde nɛi o hɔl-lɛ, lende koni vana siɛlɛiyo tɛɛmbuu vana ndɔ bɛndoo kɔllo o vomɔɔ ni.

²⁷ Siòòŋii Mɛlɛka-e nɔu, kon bɛndi yoomoo ni, kɛ vanaa tosaa dɛnnda vɔɔnda nɛi vu le.

²⁸ Ɲɛ co vana sandaa cumndo-o co ɲaaloo ni, kɛ kɔlkɛsiaa vanaa vɔɔnda soli kpeku le.

²⁹ Nɛila Mɛlɛka lan la kanda vanaa sandaa maa kpaki, kɛ mì la tɛɛmbuu vanaa kɔlvesɛiya.

³⁰ Vana sandaa del lɔ́ɔ́-lɔ́ɔ̀ le. Kɛ vanaa kɔlvesɛiya lonin o lɛŋnden coo le.

³¹ Sɔɔn kɔlkalon fula vana sandaa o sondo ni. Kɛ vana lacòòvaa nda, diɛɛmulen nda bɛnda le nda kiolɔɔ ni.

³² Sɔɔn sɔvɛɔn fula vana sandaa o sondo ni, kɛ sɔɔn vɔɔnndon daama n fula vana kɔlvesɛiyo o sondo ni.