Talelan 1 - BII BILA

¹ Talela Salomɔn-ndan, po David-o pɛɛn, o yɔŋnun masaa Israɛl-lo.

Le kɔlɔ sɛbɔɔ ho sɛvan-ndo

² Talelan ndan la mala vana le kɔlkaloo a pɛɛkoo sinaa, le sɔɔn dɛnɛ sinaan bilaa biyɔɔ.

³ Le pɛɛku sɔvɛɔ sɔlaa, le kelaa o dɛnɛ sandaa nin, o sakpoyɛi a o sandei nin.

⁴ La naŋ le vanaa nɔ taasi le-a taasio yɔngoo, le poombɔ felengoo dɛnɛ sinaa a yiyan sɔvɛɔ yɔngoo.

⁵ Vana taasio bɛnda mò yaŋ nilan, haliko mo cɔɔlu sina ndɔɔ. Vana sinaa dɛnɔɔ bɛɛ yaŋ pɛ nilan o sina mɛɛ o bɛnda le kelaa yɛ.

⁶ Talelan ndan la mala le kɔlɔ talelan a sɔɔn viannanndon sinaa, le sɔɔn vanaa kɔlkalua a sɔɔn kendu bila biyɔɔ-on sinaa.

⁷ Siòòŋii Mɛlɛka-e nɔu, kon co kandɔn kɔlkaloo ni. Diɔmnda co kɔlkaloo a pɛɛkoo pɛɛsaa.

Kanalanndo le poambɔa piaandua vɔɔnda

⁸ «Po nuu sei! Yaŋ nilan o pɛɛkula fuɲa nɔmndan, kɛɛ silala kala nɔmndan te.

⁹ Kani maa mɔsil kɛndɛ-kɛndɔɔ la co nɔm o lebol ni, maa yɔɔva laboloo la co le bolola nɔmndan ni.

¹⁰ Po nuu sei! Te vanaa lahakia yeema pɛ le nɔm lueiyo o pɔwlan nin, malnun nda o ba le.

¹¹ Taa dimul nɔm pɛ aa: ‹Hun n kɔnnun, mì n kɔ miingun yaŋɔɔlan mì n diinun vanndacieea. N hendulun vana tɛɛmbuu isɔɔ loo yaŋɔɔlan o fondo fúúo coo,

¹² n miolnun nda a kiyɛiya mɛɛ piɔ́mndo mial vana nuaa yɛ, mà lo mɛɛ vanaa nda kumbu o sɛilan nin-nda lo yɛ,

¹³ n sɔlanin ɲɛm kɛndɛn súú-súù ka, n peinin cɛila naalan a ɲɛm naa n punganin-ndon,

¹⁴ nɔm bɛɛ sɔlanin kunda nɔmndo naa niaa latulu, bɔlɔ mandaa n'volio ndu pilɛ kpé naa n nɔnin naa niaa latulu ni.›

¹⁵ Po nuu sei! Kɔa nda kɔɔli le dɛ! Kpakpala nɛi vanaa vaa lende.

¹⁶ Kani nda nda, dɛnɛ vɔɔndo tuŋ nda co keiyo tosaa a kiltan ni. Keleŋaa pila nda keleŋa le vanndacieea diwvo ni.

¹⁷ Te ɲɛ nɔ kumbanndan-ndo ce pɛ doosunɔɔ, mɛɛ doosunɔ kon tondu nin bɛɛ yalaa le ɲɛ kon biyɔɔ, sanga fondoo fúú o sanga ni.

¹⁸ Vanaa kan, nda pila co soonndan tuwnɔnndo ni. Dúmbúla nda co yiiyo lan la mingulun nda pila.

¹⁹ Lende dɛnɛ vanaa yeema ɲɛ-sɔlaa delɔɔcoo-a co ni, ɲɛ-sɔlaa vaa lende cii yoomu vanaa nuwviaa ndu-a ni.»

Kɔlkaloo co vannda veeloo a nda kanalanndo

²⁰ «Kɔlkaloo co yondaa o nɛilan coo, o co diomndo heeloo o fondala bɛndulan.

²¹ O co yondaa o fondala vɔkɔ-vɔkɔlan sondoo, o co sɔɔn ndɔn dimio o diola luɛyaalan nin, o co mun dimio a labɛɛla o kobio nin aa:

²² ‹Éé niaa vanaa bii haa dɛnɛ bila le-a! Mì la lo vɔ sina lepɛŋndo ho kaolaa háá lɔ́ɔ́ kuɛɛ nɛ? Niaa vanaa mamɔɔ tɛɛndannda yɛ, mì la lo vɔ mamɔɔ tɛɛndanndo ho háá lɔ́ɔ́ kuɛɛ nɛ? Kpòkóó niaa diɔmaa soondo vesɛiya ha! Háá lɔ́ɔ́ kuɛɛ niaa bɛɛ lo yɛnin dɛnɛ sinaa pɛɛsaa nuaa tuŋ?

²³ La muungu ya o ibuŋ, mì la tuei kanalannda nilan. La tofa vɔ, i saŋnin kɔl nuu niaa coo, i cɔmnin niaa sɔɔn nun.

²⁴ Le tùú ya veelu kɛ mí la kasa le hunɔɔ-o, le tùú ya siɛndi ba nuu kɛ vana-vana saalan ya loo,

²⁵ le tùú niaa kɛɛ silala nilan kpede-o, le tùú niaa kɛɛ kanalannda ya kanalan niaa lan-ndo,

²⁶ ya bɛɛ i mamnin ciki-ciki lɔ́ɔ́ niaa vanin o dɛnɛ palaa nin-ndo. Tuma kɔl yulan-yulanndo toalnin niaa coo-o, i mamnin niaa mamɔɔ pila.

²⁷ Tuma kɔl yulan-yulanndo toalnin niaa coo maa hoeyii fùkù-fùkù-o, lɔ́ɔ́ dɛnɛ palaa toalnin niaa coo maa hoeyii felenfelen-ndo, telen sangaa a ɲɛ kindilaa toalnin niaa coo-o,

²⁸ la veelunin ya le niaa malaa, kɛ ya bɛɛ i cɛlnin te. La nuwviaanin ya, kɛ la seelunnin ya le.

²⁹ Kani la pɛɛsa dɛnɛ sinaa, la cɛl le siòòŋii Mɛlɛka-e nɔu le.

³⁰ La cɛl le silala nilan biyɔɔ le, mí la ca kanalannda nilan kpow ɲɛ fondoo.

³¹ Lelan, la dianin kɔmnde fula o kela niaa nin-nden. La pumnin silala niaala niaa pila lan.

³² Kani kɛɛ vannda kɛ̀ɛ̀ dɛnɔɔ bilaa biyɔɔ-o tósà ni mà vi. Diɔmnde dɔaw diɔmnda yɛɛvɛ ni.

³³ Kɛ vana yaŋ pɛ ya nilan, ndu sɔlanin kɔlɲuloo o calta ndɔlan. O vannunnin nila ɲulu yili, siòòŋii biinin ndu le dɛnɛ palaa le.›»