Sakari 9 - BII BILA

ISRAƐLLA A VANAA-MANGALAA-ISƆƆA BALU NDA-A Yamɛi a cinda vanaa-mangalaa-isɔaa balu Israɛl-la

¹ «Yoongu Mɛlɛka-o. Sɔɛi Mɛlɛka-e tiiya o lɛŋnde Hadrak len nin, i sim o kobio Damas coo. O co ko polama Israɛlla coo le Mɛlɛka nɔ hɔlten te, o nɔ vɛlɛ hɔlten vanndacieea kpow coo.

² Sɔɛi Mɛlɛka-e sim vɛlɛ o kobio Hamat coo, o pɛɛngulan a kobio Damas, i sim vɛlɛ o kobilan Tir a Sidɔn coo, nɛɛ vannda nɔ kɔlkaloo a taasio-a.

³ Vannda Tir a cownun fonda mayoomoo, a cuungiaa volion mɛɛ cundoo co lɛŋ nuaa yɛ, má dii sianion kundaa mɛɛ loolio co o nɛiyo co nuaa yɛ.

⁴ Tofa vɔ, Maalii hialunin ɲɛm mun, o pialnin fonda nda mayoomoo mò viow ndu o mɛmma ihɛllan nin, mò lom ndu a yinnden.

⁵ Vannda Askelɔn tuɛinin sɔɛi ken mì siòònde bii nda, vannda Kaasa bɛɛ a tuɛinin ma ɲiiya nákà-nàkà. Vanaa co icali Ekrɔn-nda bɛɛ a yɔŋnunnin yoloma-yoloma. Kani tiindan ndaa tambunin. Masa ve lɛnin Kaasa le, vana ve lɛnin icali Askelɔn te.

⁶ Asdɔd ndu, mialla vanin icali lon ni. Lende ya tɛɛmbuunin yonga Filistia ni.

⁷ I solinin visia vi o ba nda coo-a nda o sondo, mì soli visin solin sálà o piɔmnda lo-on nda o ciŋndon tɛɛn. Filistia tɔ̀a lonin yoomu-a bɛɛ, a canin ya maa Hala ndaa, mà siŋnun maa bolii lapangɛi o tàndá Yuda-o nin. Vannda Ekrɔn nda siŋnunnin maa Yebusiia.

⁸ I kilanin dɔ́ɔ́ngɔ́ɔ̀ o cɛi nuu ikɛi le ndu kandaa le vanaa cɔwva, a co luɛyɔɔ a fulaa-a pɛɛn. Vana kɔlvesɛi kei lɛnin nda ikɛi le. Kani hɔlta nilan la co nin va o cɛi nuu coo.»

Masa tuisian yɔngunin kɔlɲuloo-o

⁹ «Niaa vannda Siɔn, la dɔwnun ɲaale taw-taw. Niaa vanaa co icali Yerusalɛm-nda, la yonda a kɔlkɛndɔɔ. La tofa vɔ masa niaa hunɔɔ o niaa lo. O co masa sandaa, o nɔ̀lá yaamɔaa ndɔa. Masa tuisianndo o co ni, o co icali o sofɛlɔɔ coo, sofɛlɛ téndóó pɛɛn, o sofɛlɛ laandoo kom-ndo.

¹⁰ O ciinin ɲɛla ɲaanannda soa nan-ndan o tàndá cuavaa-imamaa Efraim-nda nin o ciinin soa cɔwva Yerusalɛm, o yiminin kpaasiaala cɔwlan kpow. O yɔngunin vanaa-mangalaa-isɔɔa kpow kɔlɲuloo. Masale ndɔlen le kandunnin o mɛmma hɛlii bɛnduan, mì le kɔ tiiya háá o mɛmma ihɛllan mediteranee. Masale ndɔlen le cannin o pee bɛndoo Efrate, mì le kɔ tiiya háá nɛɛ lɛŋnden le mɛɛlu-a.»

Vanaa kaasoa sɔlanin pɛngio

¹¹ Mɛlɛka dimi aa: «Le niaa yɛ niko, le kpema ya yii a niaa a koovan-ndo, i co vanaa niaa co o biyɔɔ nin-nda baŋa, mì soli nda o soon mɛmma co lɛ lenin too nin.

¹² Lelan, niaa vanaa kaasoaa nɔ tiindanndo-a, la muungu o kobi niaa kungan a kpakio-o nin. Hau vɛlɛ i co ndi dimi, i vangalanin dɛnɛ kɛndɛ niaa bɛmbɛ lediin le sanga niaa sɔla-o.

¹³ Kani i siɛndi polale Yuda len maa kpaasiaa, mí vow polale Efraim-nden o kpaasiaa kalaa nin mɛɛ vana vow kɔɛi o kpaasiaa nin yɛ. Éé Siɔn! Cuavaa Yavan-nda cannin le cɔlɔbaa a cuavaa nɔmnda. I siinguunin niaa maa mɔɛi cɔvii kuubanɔ.»

¹⁴ «Mɛlɛka fulanin nda coo fɛlɛmɛndɛn, mì kɔɛi ndɔɛi kɔɛ a kiltan maa piɔɔ-volia, Maalii, o co Mɛlɛka-o hɔŋnin buloo, mò hinul nda o hoeyii fùkù-fùkùi fula a ba too-e nin.

¹⁵ Mɛlɛka-Nɔ-Kpaayaa-Kpow-vo kandanin nda. À sɔlanin yoomuan mà ciimiaa powta fáàndala vanin nda hinullo lan. A kolnin mà ŋol maa mamɔi, a vanin a piaa maa bonyii fuusai makòó, maa kpɛ̀ɛ́n fonda-loamaa-lasálà.

¹⁶ Mɛlɛka Hala ndaa ciindiaanin nda paale len. O ciindiaanin nda mɛɛ vana mandaa n'cɔloo ciindiaa cɔlua ndɔa yɛ. A volinin ŋɛlɛngi-ŋɛlɛngi o lɛŋnde ndɔlen nin maa powta báà kàlàla nda hol o mɔsil lemasaa lan.

¹⁷ Mbɔ̀ ɲɔɔ naŋnin bɔɔ! Ɲɔɔ yeelanin bɔɔ! Maalon tosanin mì felengia hindu, mì mɔima sɛnɛiyan ma tosa mì cuaambɔa laandua dɔwnun yálá.»