Sakari 4 - BII BILA

Vundule ŋuɛɛnundɔlen: ɲɛ kɛsiaa lafitinaa a yɔmii oliviee

¹ «Mí mɛlɛkanɔ va suukanndo a ya-o muungu nɛɛ ya va-a, mó hun tindi ya mɛɛ vana tindi vana co o malɔ-o nuaa yɛ.

² Mó ɲuna ya aa: ‹Yɛɛ nɛ n co yɛ cɔu?› Mí muli aa: ‹Ɲɛ kɛsiaa lafitina cɔwnun kpow a sianion-ndo ya co cɔu ni. Kpufɔɔ co o bolle ndɔlen coo déŋ. Fitinalan la co lecoo tan ŋɔmmɛw a kolikolima cuɛiyan ma kei nin-ndan man ŋɔmmɛw, le fitinala co lan lecoo lan.

³ I co vɛlɛ yɔmii oliviee cɔu ndii ŋiin o ɲɛ kɛsiaa lafitina kon ikɛi. O pilɛ co kpufɛ kon o ba kɛndɔɔ coo, o pilɔɔ co o ba mɛllo coo.›

⁴ Mí soaa vɛlɛ, mí ɲuna mɛlɛkanɔ va kon suukanndo a ya-o aa: ‹Maalii nuu, kɔlɔ yɛɛ nɛ dɛnndan ndan la co yɛ?›

⁵ Mí ndu bɛɛ ɲuna ya aa: ‹A sina masinaa kɔlɔ dɛnndan ndan te?› Mí mulul ndu aa: ‹I sina le few, Maalii nuu.›

⁶ Mó mulul-la aa: ‹Diom Mɛlɛka dimul Sorobabɛl-lo co hoo ni aa: ‹O co a kpaaya le o co a mayoomu le niaa tosanin dɛnɛ kon te, kɛ a Kɔl nuu. Ya Mɛlɛka-Nɔ-Kpaayaa-Kpow-vo dimi lende e ni.›

⁷ ‹Nɔm pembii bɛnduei he, yɛɛ nɛ n co yɛ Sorobabɛl o hɔl? O co nɔm pesi mà siŋnun dɛngbɔɔ. O handunin pow lebollo o vɔkɔ-vɔkɔ biilaa nin, mì vannda va dimio aa: Biiloo co le powvo ho! Biiloo co le ndu!›

⁸ O kon kɔɔli, mí Mɛlɛka soaa vɛlɛ o ya lo, mó dimul-la aa:

⁹ ‹Sorobabɛl kila Cɛi-Hala-o ho ni, ndu koni siownin vɛlɛ ndu tangul ni. O kon niaa sinanin ni maa Mɛlɛka-Nɔ-Kpaayaa-Kpow-vo vem ya o niaa lo ni.

¹⁰ Nɛ̀ɛ̀aa pɛɛsa yɛ vallo ho o kandɔn tasoo? À bɛnda ma dɔwnun ɲaale le yoole tuvaalen cɔu Sorobabɛl o ba, a le ndu cɔu pow lebollo handɔɔ. Hɔlta ŋɔmmɛwlan yɛ, hɔlta Mɛlɛka lan ni. Hɔlta lan la co balɔɔ o lɛŋnden kpow coo ni.›

¹¹ Mí cua vɛlɛ sɔɛi, mí ɲuna ndu aa: ‹Kɔlɔ yɛɛ nɛ co yɛ oliviei ŋiiŋii co hee ɲɛ kɛsiaa lafitinaa o ba kɛndɔɔ a o ba mɛllo coo-e?›

¹² Mí cɔɔlu ndu vɛlɛ ɲuna aa: ‹Kɔlɔ yɛɛ nɛ co yɛ lɛvun yɔm oliviee miunndon mun, n co mun o kolikolima miɔmma cɔwnun a sianion-ndan ikɛi, mí sianion va keiyo lenin-ndan?›

¹³ Mó ɲuna ya aa: ‹A sina masinaa kɔlɔ lɛvun mun te?› Mi muli aa: ‹I sina le few, Maalii nuu.›

¹⁴ Mó dimul-la aa: ‹Vanaa ŋiɔŋaa sɔla pɔla diandaa ma va isisi Maalii nɔ lɛŋnden kpow-vo o hɔl le ndu baalaa tosallo-a ni.›»