Sakari 3 - BII BILA

Vundule hiɔɔlundɔlen: bolle vanaa-solia-lasálàá

¹ «O kon kɔɔli, mó cɔm ya Yosue, bolle vanaa-solia-lasálàá, o va isisi mɛlɛkanɔ Hala-o laci. Vana lɔalaa n'vanndo, Setana va isisi ndu o ba kɛndɔɔ coo le ndu sɔɔn hɛɛnduuvo coo.

² Mí mɛlɛkanɔ Hala-o dimul Setana aa: ‹Màá Mɛlɛka kinda nɔm sondoo, nɔm Setana! Màá Mɛlɛka kuuna nɔm sɔɛi! Ndu Mɛlɛka pila hɛli Yerusalɛm ni. Vɛ̀ɛ̀ o co maa kili nda soli o yin-ndo le langbanɔɔ ho co le?›

³ Nduyɛ, volɔɔla nɔɔlɛilan la va Yosue lekɔɔ, o va isisi mɛlɛkanɔɔ laci.

⁴ Mí mɛlɛkanɔɔ soaa o vanaa va isisi ndu laci-a lo, mó dimul nda aa: ‹La soli volɔɔla nɔɔlɛilan ndu lekɔɔ.› Mó dimul Yosue aa: ‹Tofa vɔ, i faŋa nɔm haki nɔmndo coo le nɔm volɔɔla kafolan vowvo.›

⁵ Mó dimi vɛlɛ aa à vow ndu Yosue mɔsil solia lasálà diandaa o lebol. Má vow ndu mɔsil solia lasálà diandaa, má vow ndu volɔɔla cuɛinanndan. Kon kpow, mɛlɛkanɔ Hala-o va isisi.

⁶ Mí mɛlɛkanɔ Hala-o sila Yosue aa:

⁷ ‹Nuaa Mɛlɛka-Nɔ-Kpaayaa-Kpow-vo soo ni aa: Taa kela pɛ o nɛila nilan coo, taa bii pɛ tɔŋnda nilan kpáŋ, nɔm vanin yaman kiolɔɔ o cɛi nuu nin ni, nɔm vanin bɛɛ nuu mandaa ni. O kon, i kenin nɔm fondaa o vanaa co haa isisi nanu-a tɛɛn.›

Hala co vana ndɔ baalaa cuu

⁸ ‹Lelan nɔm Yosue co bolle vanaa-solia-lasálàá-o a caaŋaa nɔmaa niaa co baala pilɔɔ tosaa ya o hɔl-la, la yaŋ nilan! Bau vanaa co tɔɔmasele levundoo-a niaa co ni. Kani la tofa vɔ, i co vana baala nuu cuu, vana ni baala nɔ diolan aa Vulɔɔ-o.

⁹ Kani pow ya kɛsi Yosue laci-o, kpengon mún ŋɔmmɛw n co o pow pilɛ kon ni. Ya pila sɛvanin sɛva vanin lecoo-o ni. Ya Mɛlɛka-Nɔ-Kpaayaa-Kpow-vo dimi lende ni. O paalen len pilɛ bɛngu ya co haki lɛŋnden nden faŋa ni.

¹⁰ Paale len, la veelannin vellaa-velle le calle a kɔlɲuloo o tumnda n'rɛsɛnndan a o voosoei bɛngu. Ya Mɛlɛka-Nɔ-Kpaayaa-Kpow-vo dimi lende ni.›»