Sakari 2 - BII BILA

Vundule diinndɔlen: leelan a sumnda

¹ «Mí heelu hɔlla, mí tofa, mí ca leelan tan hiɔɔlu.

² Mí ɲuna mɛlɛkanɔ va suukanndo a ya-o aa: ‹Kɔlɔ yɛɛ nɛ leelan ndan la co yɛ?› Mó mulul la aa: ‹Leelan ndan la co tɔɔmasele vanaa-mangalaa-isɔaa kpaayaa puusiaa tàndá Yuda-o, lɛŋnde Israɛl-ten a Yerusalɛm, mí vannda saŋnun-nda-o ni.›

³ Mí Mɛlɛka cɔm ya vɛlɛ sumnda nda hiɔɔlu.

⁴ Mí ɲuna aa: ‹Yɛɛ nɛ nda nda co yɛ hunɔɔ tosa?› Mó mulul-la aa: ‹Sumnda ha hin le vanaa-mangalaa-isɔaa kundu tàndá Yuda-o a leela ndalan, mà puusiaa vanndacieea-a vueinɔnndo a le leela ndala lan yimio ni.›

Vundule yàándɔlen: yoole tuvaalen

⁵ Mɛɛ ya heelu hɔlla, mí ca vɛlɛ vundule celen: langbanɔɔ pum va isisi a yoole tuvaalen o ba.

⁶ Mí ɲuna ndu aa: ‹Kuɛɛ nɛ n co yɛ kɔlan?› Mó muli aa: ‹Yerusalɛm ya co kɔlan tuuvo ni, le bu ndɔɔ a bandii ndɔɛi sinaa.›

⁷ Mɛɛ mɛlɛkanɔ va suukanndo a ya-o cɛn kɔnndan, mí mɛlɛkanɔ celen hun ndu bɔŋaa.

⁸ Mó dimul ndu aa: ‹Ɲaanun mà kɔ soo o langbanɔ felengi co hoo a yoole tuvaalen o ba o nda-o lo, mà dimul ndu aa: Yerusalɛm vanin kobi nɔ kpaki loo, le vanndacieea a cɔlua vanin lenin sɛ́lɛ́ bɛndoo taw-taw va.

⁹ Ya Mɛlɛka pila balunin ndu kandaa sɔ́ ni, mì va maa kpaki leyin le ndu. Ya vanin biilu ndɔɔ a naŋɔɔ ndɔɔ lenin ni. Ya Mɛlɛka dimi lende ni.›

Mɛlɛka veelu vanaa a sɛŋiannda-a

¹⁰ Sei! Sei! Sei! La ɲaanun! La ɲaanun mì la faŋan o lɛŋnde maluaŋ-nden nin! Ya Mɛlɛka dimi lende ni. Kani yáà sɛŋi niaa o kpengun hiɔɔlun ceendo ni. Mɛlɛka dimi lende ni.

¹¹ Niaa vannda Siɔn sei, niaa co icali Babilɔn ciee-a, la ɲaanun mì la faŋan ndon cɔ́-cɔ́!

¹² Kani la tuei-yɔ diom Mɛlɛka-Nɔ-Kpaayaa-Kpow-vo, o vem ya o vanaa-mangalaa-isɔaa co niaa yungaa a ɲɛm niaan hiɔlɔɔ-a lo-o dimi aa: ‹Vana-vana pilan niaa pɛ, mɛɛ vana kon pilan ya hɔlte kúlten.

¹³ Lelan, i heelu baa le vanaa-mangalaa-isɔaa kan soŋɔ̀ɔ́, Vanaa va nda o ba o cɛlen nin-nda yunganin nda mà hɛlu ɲɛm ndan. Kon tosanin ni mì la sina maa Mɛlɛka-Nɔ-Kpaayaa-Kpow-vo vem ya ni.

¹⁴ Lelan, niaa vannda Siɔn, la deŋi a kɔlkɛndɔɔ. La dɔwnun ɲaale taw, kani la tofa vɔ, i co hunɔɔ icali niaa tɛɛn. Mɛlɛka dimi lende ni.

¹⁵ O telen kon, vanaa-mangalaa-isɔaa bɔɔ-bɔɔ a holnunnin ya Mɛlɛka, a siŋnunnin vanaa nia. I vanin icali niaa tɛɛn. O kon, la sinanin maa Mɛlɛka-Nɔ-Kpaayaa-Kpow-vo vem ya o niaa lo ni.

¹⁶ Mɛlɛka siinguunin tàndá Yuda-o kɛ́ ndɔɔ o lɛŋnde diandaalen coo. O hɛlinin vɛlɛ kobio Yerusalɛm.

¹⁷ Niaa ɲɛ-ɲɛ co yoomu, la mei Mɛlɛka o hɔl kpili. Kani o yinga, o cɛn o fonda ndɔ diandaa le fulaa.»