Ruti 4 - BII BILA

Boas cua Ruti o nɔ̀u nin

¹ Mí Boas kɔa, mó kɔ cal o dio kobio sondoo. Fɔ́ɔ́fɔ̀, mí vana baŋaa ndu Boas ndóò dimul Ruti sɔɛi ndɔɛi-yo va hiovɔɔ o fonda kon. Mó veelu ndu aa: «Caan ni sei! Sɔɔnguu vɔ nanu mà cal.» Mí langbanɔɔ kɔa, mó cal.

² Mí Boas veelu n'van tɔ́ o kaasoŋaa kɔlkalua va o kobi kon nin-nda tɛɛn, mó kɛsi nda.

³ Mó dimul langbanɔ ndóò bɛnda kon le polale Elimelɛk len hɔlla landɔɔ coo-o aa: «Noemi fula o lɛŋnde Moab len nin mó muungu nanu-o co yondo fɔ̀nɔ̀ Elimelɛk vana naa-o pisio.

⁴ Lelan ya veelu nɔm ni, mì dimul nɔm, haliko ma baŋa ndu kaasoŋaa kɔlkalua cal haa-a a vanaa co nanu-a kpede o hɔl. Taa yeema pɛ le ndu baŋaa, mɛɛ baŋa ndu, taa co yɛ vɛlɛ baŋa le, a dimul-la, i sina. Kani vana-vana bɛnda mò baŋa ndu o nɔm kɔɔli le. Te nɔm faŋan dɔ́ɔ́ pɛ, mɛɛ ya ni.» Mí langbanɔ kon muli aa: «Bala tiɔn, ya co baŋa ni.»

⁵ Kɛ mí Boas dimul ndu aa: «Paale n baŋanin yondo kon Noemi o ba len, a lóó vɛlɛ Ruti Moabunɔ, lanɔɔ fɔ̀nɔ̀ Malɔn pɛɛn, haliko mi diola fɔ̀nɔ̀ɔ́ lan la lo o kɛ́ ndɔɔ coo.»

⁶ Mí langbanɔ kon muli aa: «Te lende ni, mɛɛ i tiwnin ba le, yɔŋii kɛ́ nuu laasian. Te nɔm co pɛ baŋa, mɛɛ baŋa.»

⁷ Sindɛ yɛ, o lɛŋnde Israɛl-ten nin, te vannda ndáà yeema pɛ le ɲɛ vaa lende tosaa, te kon te le ɲɛ pum singaa, vanndo pilɛ ndóò solin samta ndɔɔ o ipelu, ndóò ke o pilɔɔ. Seilen le va len Israɛlla tɛɛn ni.

⁸ Le hee, mí langbanɔ kon dimul Boas aa: «Cua ɲɛm mun ɲɛ nɔm pɛ́-pɛ́.» Mó solin samtaa o ipelu.

⁹ O kon mí Boas dimul kaasoŋaa kɔlkalua a vanaa va lon-nda kpow aa: «Niaa kpow la co hau lesei mí baŋa Noemi ɲɛm fɔ̀nɔ̀ɔ́ Elimelɛk-on, ɲɛm Kilyon-ndon a ɲɛm Malɔn-ndon o ba,

¹⁰ mí lóò vɛlɛ Ruti Moabunɔ, mó siŋnun laa nuu, haliko mi diola fɔ̀nɔ̀ɔ́ lan la lo o kɛ́ ndɔɔ coo, yɔŋii diola ndɔlan la ɲum puapilɛa ndɔa tɛɛn a o kobi ndɔɔ nin. Lelan, niaa co hau seiya le dɛnɔɔ ho ni.»

¹¹ Mí kaasoŋaa kɔlkalua a vanaa va lon-nda kpede muli aa: «N tuei, n co n'sei. Màá Mɛlɛka dow nɔm lanɔ kalaa duaa, o co hoo luɛyɔɔ sɛnɛi o nɔm ndo cɛinin-ndo pɛɛn! Màá o vol Rasɛl nda Lea, vanlaandua ŋiɔŋaa yɔŋnun kalaa imamaa le cuavaa Israɛlla-a pɛɛn! Màá nɔm pila piɔlnun ladio Efrata nanu, ma siŋnun vana tɔ́ɔ́ bɛndoo Bɛtlɛhɛm ciee nanu!

¹² Màá hɔ́aa Mɛlɛka co nɔm ke niaa cuaa ho-a siinguu cɛi nɔmndo maa cɛi Perɛs-o, po Tamar vilul Yuda-o pɛɛn!»

¹³ Mí Boas cua Ruti, mó siinguu ndu laa ndɔ, mó lueinun ndu coo. Mí Mɛlɛka ke Ruti dɛnɛ kɛndɛ, mó vialu hɔ́ɔ́ piaandoo.

¹⁴ Mí vanlaandua dimul Noemi aa: «Biiloo co le Mɛlɛka, kani a vilul nɔm hau vana landunin hɔlla nɔm coo-o. Màá po nɔm imamaa ho siŋnun vana tɔ́ɔ́ bɛndoo o lɛŋnde Israɛl-ten nin!

¹⁵ Poo ho kenin nɔm yoomuma sɛnɛi, mó hun manda nɔm o yuuvɛi nin. Kani lanɔ kaola nɔm-ndo velu ndu ni. Lanɔɔ ho co fisa le nɔm hiovɔɔ poaa nda ŋɔmmɛw coo.»

¹⁶ Mí Noemi cua hɔ́ɔ́ kon, mó bii ndu o ibuŋ, mó manda ndu.

¹⁷ Mí vanlaandua nda va latulu o bɛ́ɛ̀-a dimi aa: «Taanin! Noemi kɛí sɔla cua imamaa nuaa ni!» Má ke ndu diolan aa Obɛd. Ndu yɔŋnun fuɲaa Yisai ni, Yisai kon velu David ni.

Fuɲaa-mamaa David-a

¹⁸ Diola fuɲaa-mamaa David-a la co lan ni, kandɔɔ a Perɛs: Perɛs velu Hɛsrɔn ni,

¹⁹ mí Hɛsrɔn vialu Ram, mí Ram vialu Aminadab,

²⁰ mí Aminadab vialu Naasɔn, mí Naasɔn vialu Salma,

²¹ mí Salma vialu Boas, mí Boas vialu Obɛd,

²² mí Obɛd vialu Yisai, mí Yisai vialu David.