Ruti 3 - BII BILA

Noemi co kindinndo le Ruti caltan nuwviallo

¹ Paale pum, mí Noemi kala-lɛɛ Ruti dimul ndu Ruti aa: «Cuanndo, i co kindin o nɛi oo nɛi coo ma sɔla caltan, haliko ma va a kɔlɲulu.

² Nɔm pila sina nin maa Boas n kɔa kon baalaa niaa buɛyaa ndɔa laandua-o, vanayɛi nɛi o co ni. Nduyɛ, cɔɛllɛn o co lakɔ ɔrse ndɔɔ lɔɔ a hɛiyo o kpele lɔaa n'mallo coo.

³ Lelan pulun, mà suinun cuɛiyan, mà vownun volɔɔla nɔmnda hiow naŋɔɔ lan, mà kɔɛ o kpele lɔaa n'mal kon coo. Kɛ nduyɛ, keleŋa ndu fula o hɔl te. Mɛɛ mò cii fɔlɔn dioo a kolɔɔ.

⁴ Telen o vanin hinilan-ndo, a dɔw fonda o co lakɔ lahini-o taasi. O kon, a kpeeŋa ndu kolaa o n'pelu, a hini lon. Ndu pila dimulnin nɔm ɲɛ n bɛnda le tosaa-o.»

⁵ Mó mulul ndu aa: «Ɲɛ-ɲɛ n dimul-la le tosaa, i tosanin ndu.»

⁶ Mí Ruti kɔa o kpele lɔaa n'mal Boas-o, mó kɔ tosa mɛɛ kala-lɛɛ ndɔ congun ndu yɛ kpafii.

⁷ Mí Boas dia, mó kol, mí ɲɔɔ hɛnan ndu. Mó kɔ hini o bémbé n'mallo kɔɔli. Mí Ruti kɔa duɛɛn-duɛɛn, mó kpeeŋa ndu kolaa o pelon, mó hini.

⁸ A di-tɛɛndo kínɛí, mí Boas yinga. Mɛɛ o mulin, mó ca vanalanɔɔ ihini ndu o pelon bɛngu.

⁹ Mó ɲuna aa: «Nɛ̀ɛ́-nɛ̀ hini yɛ hoo?» Mí Ruti muli aa: «Ya ni, ya Ruti buɛi nɔm pɛɛn. Cua ya mì va sumialii nɔm, kani nɔm co vanayɛi bɛnda le ya lòó-e ni.»

¹⁰ Mí Boas dimi aa: «Màá Mɛlɛka dɔw nɔm duaa, cuanndo! Ɲɛ n tosa vɛlɛ hoo handɔɔ o ɲɛ tase n tosa-o coo-o cɔm yungu kala-lɛɛ nɔm-ndo maa vanaciee sɔvɛɔ n co ni. Kani a del langbaa felengia nɔ bolofaa-a, te kon te a co a bala fondoa-a kɔɔli le.

¹¹ Lelan, cuanndo, buulan ndɛ le. Ɲɛ-ɲɛ n yeema pɛ, i tosalnin nɔm ndu, kani cieo ho kpow sina nin maa vanalanɔ sɔvɛɔ n co ni.

¹² I co toɲa maa i bɛnda mì lóó nɔm, kɛ vana celen co, ndu hiow va vanayɛi nda yungu pɔnɔ nɔm vi-o a ya.

¹³ Siow niko paalen sel nanu. Te ɲɔɔ tenga pɛ, mì langbanɔ kon yeema le nɔm lòó, a cal sumialii ndɔ. Kɛ te o nɔ yɛ kɔl le nɔm lòò le, te Mɛlɛka co yoomu, i loonin nɔm.»

¹⁴ Mí Ruti lo ihini Boas o pelon bɛngu. Ɲɔɔ va vɔ mɔmìì, vanáà sina vɔ vana le, mí ndu Ruti fula. Kani Boas ndóò yeema mì vana ndóò sina maa cua kon ndóò kɔɛ o kpele lɔaa n'mal kon nin te.

¹⁵ Mí Boas dimul ndu aa: «Pɛngɛlal-lɔ ya doma bɛndu n nɔ hoo lekɔɔ-o, ma saa ndu kpíŋ.» Mɛɛ o pɛngɛla, mí Boas tuu ɔrse pani bɛndoo leŋɔmpum, mó siiluu ndu, mí Ruti muungu ciee.

¹⁶ Mɛɛ o komal kala-lɛɛ ndɔ, mí vuɛɛndo ɲuna ndu aa: «Àà vɛ cuanndo, vɛ̀ɛ̀ lavàà lon?» O kon, mí Ruti cɔm ndu ɲɛ-ɲɛ kɛndɛ Boas tosal ndu.

¹⁷ Mó dimul kala-lɛɛ ndɔ aa: «Ndu koni ke ya vɛlɛ ɔrse pani leŋɔmpum-ndo ho nuaa ni, aa ya múúngù nɔm o ibuŋ bala fondo le.»

¹⁸ Mí Noemi dimi aa: «Calnun kpɛ́, cuanndo, háá ma sina mɛɛ dɛnɔɔ ho co mɛɛlu yɛ. Kani fɔ mì langbanɔ kon cii hau sɔɛi he toosiaa malan kɔllo hini ndu nin.»