Ruti 2 - BII BILA

Ruti kɔɛ kela baloo o Boas lo panga

¹ Noemi ndóò nɔ vanayɛi Elimelɛk pɔnɔ ndɔɛi pum diolan Boas, vana bolofaa a vana tɔ́ɔ́ bɛndoo o va ni.

² Paale pilɛ, mí Ruti Moabunɔ dimul Noemi aa: «I yeema mì kɔɛ kela yasalan o ciɛɔn nin vanaa koavaa kɔɔli. Nɛɛ nda cɛl-la pɛ, i cɔwviaa lon.» Mì Noemi mulul ndu aa: «O naŋ, kɔ cuanndo.»

³ Mí Ruti can dɔ́ɔ́, mó kɔa yasalan nuwviaa vanaa koavaa kɔɔli o ciɛi pum nin, mí ɲɔɔ bendalan, mó kɔa o ciɛi Boas-e nin. Nduyɛ vanayɛi fɔ̀nɔ̀ Elimelɛk-e Boas kon va ni.

⁴ O viw bɛɛ ka-ka le, mí Boas pila fula Bɛtlɛhɛm, mó hun. Mó yil vanvalla, mó dimi aa: «La nuvali a vallo! Màá Mɛlɛka lo niaa ikɛi!» Mí vanvalla mulul ndu aa: «Mbaa! Màá Mɛlɛka dɔw nɔm duaa!»

⁵ Mí Boas ɲuna vana va vanaa koavaa bollen-ndo aa: «Cuaambɔ laandu nɛ̀ɛ́-nɛ̀ co yɛ hoo?»

⁶ Mí langbanɔ kon mulul ndu aa: «Cua Moabunɔ Noemi hin kɔɔli fulaa o lɛŋnde Moab len nin-ndo ni.

⁷ Hunɔɔ mó tɛɛlun aa o yeema le yasalan cɔwviaa o tɛwvo nin vanaa koavaa kɔɔli. Kabi diilɛn, fɔ sisa mó langa pɛngi ɲɛ-pɔmbɔ.»

⁸ O kon, mí Boas dimul Ruti aa: «Yaŋ nilan ɲɛkɛndɛi, cuanndo! Hali ma kue yasalan cɔwviaa o ciɛi vana celen nin te, lo nanu mì la va baalaa niaa buɛyaa nia laandua latulu.

⁹ Mɛɛndan ciɛi he ɲɛkɛndɛi, ma tofa nɛɛ nda co kovɔɔ-a, ma kɔɛ vanlaandua kɔɔli kpɛɛlun. I cii poambɔa nia piaandua tɔŋndo hendul yɔŋii nda sui nɔm poopoo. Te kolɔɔ bii nɔm pɛ, a kɔɛ nɛɛ fɛngɛlan la co-a, a kɔ kol mɛmma nda kɔndu-an.»

¹⁰ Ruti tueyɔɔ lende, mó baŋ vulan Boas o labɛngunin, mó kuumbuu hɔlla lɛŋ, mó ɲuna ndu aa: «Le yɛɛ nɛ n co yɛ ya dɛnɛ kɛndɛ súúo ho tosallo? Le yɛɛ nɛ n ce yɛ ya miallo ho ɲia nuaa?»

¹¹ Mí Boas mulul ndu aa: «Vannda cɔm ya ɲɛ-ɲɛ n tosal kala-lɛɛ nɔm, lɔ́ɔ́ pɔnɔ nɔm vi-o, má mal fuɲa nɔm, kala nɔm a lɛŋnde nɔmnden le hunɔɔ calle vanaa nɔm óò sina paandu le-a tɛɛn.

¹² Màá Mɛlɛka mingul nɔm dɛnɛ kɛndɔɔ le dɛnɛ kɛndɛ nɔmndo! Màá Mɛlɛka Hala Israɛlla, o n hin vionnɔnndo o kumbanndo bɛngu-o cɔ nɔm ɲia, mò mingul nɔm dɛnɛ kɛndɔɔ!»

¹³ Mí Ruti dimi aa: «Nuvali vana ni bɛndoo, a ce ya bɔɔ ɲia, a ɲɔɔlu ya kɔllo nin, nduyɛ i sulan bɛɛ a buɛyaa nɔmaa laandua ha o pilɛ le.»

¹⁴ Tuma diaa ɲɛdiaa tiiyaa, mí Boas dimul Ruti aa: «Hun mì n dennun ɲɛdiaa. Kiolu ɲɛdiaa mà vow lamndo.» O kon, mí Ruti sɔɔnguu vanaa koavaa ikɛi, mí Boas ke ndu pɛndɔn, mó dia, mó pum, mó mɛi vɔ́yɔ́ɔ́.

¹⁵ Tuma Ruti muungu yasalan cɔwviaa-o, mí Boas dimul vanaa ndɔa baalaa aa: «La mál ndu mò cɔwviaa yasala co o tumbulan tɛɛn-ndan, vana-vana bɛnda mò duuva ndu le.

¹⁶ La nɛɛnúú yasalan lapum o tumbulan, mì la mɛlimɛli, haliko mo cɔwviaa lan. Kɛ taama-taama, vana ke ndu diomnde vɔɔn te dɛ!»

¹⁷ Mí Ruti niinu yasala lan cɔwviaa o Boas lo panga háá icɔllo. Mó soonda yasala o cɔwviaa lan, mó sɔla ɔrse bɔlɔ bɛndoo ca.

¹⁸ Mó kɔa a mun ciee, mó kɔ cɔm kala-lɛɛ ndɔ mun. Mó soli vɛlɛ ɲɛdiaa o mɛi ipalaa vɔ́yɔ́ɔ́-o, mɔ́ ke ndu.

¹⁹ Mí Noemi ɲuna ndu aa: «Ó nɛ̀ɛ́-nɛ̀ lo panga n kɔ cɔwviaa yɛ hau yasalan ndan? Kpengii kuɛɛ nɛ n tosa yɛ baalaa? Màá Hala dɔw vana tosal nɔm kɛndɛi he-o duaa!» O kon, mí Ruti downun kala-lɛɛ ndɔ kona aa: «Langbanɔ ya niinu yasalan cɔwviaa o ndu lo panga-o diolan Boas.»

²⁰ Mí Noemi dimul Ruti aa: «Màá Mɛlɛka dɔw ndu duaa! Mɛlɛka co naa vanaa lo yoomu-a ɲííye tuinɔnndo mɛɛ o tuinun vanaa vi-a iɲíí yɛ.» Mó dimi vɛlɛ aa: «Kɛ se langbanɔ kon vanayɛi kpeekpei naa n co naa ndaa ni. O co vana pilɛ o vanaa bɛnda le naa baŋaa-a tɛɛn.»

²¹ Mí Ruti Moabunɔ mingi vɛlɛ sondo aa: «Mó dimul-la vɛlɛ aa ya va kɔlan yasalan cɔwviaa buɛyaa ndɔa kɔɔli háá mì ciɛi ndɔɛi cuu kovɔɔ.»

²² O kon mí Noemi dimul Ruti aa: «O naŋ lende cua nuu, lo baalaa niaa buɛyaa ndɔa laandua latulu, yɔŋii n kɔ vɛlɛ ikpamna-kpamnɛi o ciɛi celen nin.»

²³ Le hee, mí Ruti lo kɔlan nda buɛyaa laandua Boas-a le yasalan cɔwviaa háá mí ɔrse cuu kovɔɔ, mí maalon bɛɛ n cuu kovɔɔ. Kɛ nda kala-lɛɛ ndɔ tuŋ vannun cɛinin ni.