Rɔmnda 7 - BII BILA

Vana laalanndo vi a ba tɔŋndo o dialun Krista-on nin

¹ Puapilɛa nia, vɛ̀ɛ̀ la co sinà le maa o vanaa sinà tɔŋndo-a lo ya co sɔɛi nuaa ni? La sinà maa lɔ́ɔ́ vanacieo co vɔ yoomu-o kínɛí o co o tɔŋndo bɛngu ni.

² Kani vanalanɔ co o nɔu-vo, o tɔŋ pɔnɔ ndɔ-o bɛngu o co ni, te pɔnɔɔ co vɔ pɛ yoomu. Kɛ te pɔnɔ ndɔ vi pɛ, mɛɛ o fula o tɔŋ ndóò yii ndu kon a pɔnɔ ndɔ-o bɛngu.

³ Lelan, te pɔnɔ ndɔ co vɔ pɛ yoomu, mò cal o nɔu vanapɔnɔ celen o ba, mɛɛ vana suundɛiyo o co ni. Kɛ te pɔnɔ ndɔ vi pɛ, mɛɛ o co lɛ o tɔŋ bɛngu le. Vanapɔnɔ celen yil nin bɛɛ ndu o nɔ̀u nin, o ve vana suundɛi le ken te.

⁴ Puapilɛa nia, lende koni i co ni. Niaa bɛɛ la vi a ba tɔŋndo o dialun Krista-on nin, mí la muungu sumialii vana celen, o tendul fulaa vanvílɛ́iya tɛɛn-ndo, haliko mi n kom kɔmnde kɛndɛlen le Hala.

⁵ Kani telen naa n va o falon nin-ndo, yeemɛi dɛnɛ vɔɔŋii tɔŋndo va kpeeŋiaa-e va vallo naa o n'falu, haliko mi náà n tosa dɛnnda yaa vana o piɔ́mndo nin-ndan.

⁶ Kɛ sunsun, n sɔla baŋaa a ba tɔŋndo, kani n vi a ba ɲɛ ndóò bii naa o cɛlen nin-ndo. N nɔla nin mì n tosal Hala baalaa tosa sɛnɛi o hɛnan Kɔl-Diandaa bɛngu, kɛ o co lɛ maa paandu mɛɛ tɔŋndo sɛvan yɛ le.

Le kɔlɔ tɔŋndo co-o

⁷ Vɛɛ naa n dimi yɛnin o kon? Mò va maa hakio tɔŋndo co ni? Kɛì-kɛì bɛɛ! Kɛ tɔŋndo tosá ni mí síná hakio. Kani yáà sinanin ɲɛ co ɲɛ pilaa hɔlten fulaa-o le, te tɔŋndo ndóò dimi le aa: «Fula ɲɛ pila lehɔl te.»

⁸ O tɔŋndo nin hakio sɔla yoomuan ni, mó kui ya yeeman vɔɔŋun súú-súù ka o kɔl. Kani te tɔŋndo ndóò ve le, maa ɲɛ vílɛ́i hakio ndóò vanin ni.

⁹ Paandu, i vannun yoomu, i ve o tɔŋ bɛngu le. Kɛ tɔŋndo hunɔɔ, mí hakio muungu yoomu,

¹⁰ mí ya koni vu. O kon, mí tɔŋ yɔ̀ngu vana yoomoo-o yɔngu ya piɔ́mndo.

¹¹ Kani o tɔŋndo nin hakio sɔla kpaayaa ni, mó hui ya a tɔŋ kon, o kon mó dii ya a ndu.

¹² Nduyɛ tɔŋndo connun o diandaa, sɔɔn co lenin-ndon bɛɛ n co n diandaa, n sandu, n naŋ.

¹³ Vɛ̀ɛ̀ mì ɲɛ naŋ-ndo ndu siŋnun piɔ́mndo le ya? Kɛì-kɛì bɛɛ! Kɛ le hakio sinanndo maa ndu co hakio ni, mó kei o ɲɛ naŋ-ndo nin haliko mo tosa mì vi. O nɛi kon coo tɔŋndo cɔm vana ni maa ɲɛ vɔɔn bɛndoo pila hakio co ni.

Hakio hiow vanacieo mayoomu

¹⁴ N sinà ndi maa dɛnɛ kɔllo tɔŋndo co ni, kɛ ya, vanaciee n'faloo daama ya co ni, o pisia ya co hakio o ba ni, mì va cɛ ndɔɔ.

¹⁵ A toɲa, dɛnnda ya co tosaa lan, i co lan bila biyɔɔ le. O ya yeema-o, i tiwba le kon tosaa le, kɛ dɛnɛ nɛinun ya-o, ndu ya tosa ni.

¹⁶ Te i va pɛ dɛnɛ ya yeema loo tosaa, i cɛl dɔ́ɔ́ maa tɔŋndo naŋ.

¹⁷ Mɛɛ o co ya pila le co dɛnnda lan tosaa le, haki co ya niŋ-ndo ni.

¹⁸ Kani i sinà maa dɛnɛ kɛndɛ co ya nin te, o falun nin ivanacieeyan nin pɛɛn. Kani yeemɛi co ya le dɛnɛ kɛndɔɔ tosaa, kɛ i nɔla ndu tosaa le.

¹⁹ I co dɛnɛ kɛndɛ ya yeema-o tosà le, kɛ mì muungu dɛnɛ vɔɔn ya yeema loo tosaa.

²⁰ Te i tosa pɛ dɛnɛ ya yeema loo, mɛɛ o co lɛ ya le co ndu tosaa le, kɛ haki co ya nin-ndo.

²¹ Mɛɛ ya ce tɔŋndo yɛ co hoo ni: telen ya yeemà le dɛnɛ kɛndɔɔ tosaa-o, i cennun dɛnɛ vɔɔndo o hɔl.

²² Kani o kɔl nuu nin, tɔŋ Hala-o hɛnan ya bɔɔ,

²³ kɛ mí saalun maa tɔŋ celen co o dialun nun nin, o co tɔŋ kɔlkalu nuu cɔlɔbaa-o. O bii ya o cɛle tɔŋ haki co o falun nun nin-ndo-o.

²⁴ Mbɔ̀ dɛnɛ pala ya fɔ́! Nɛ̀ɛ́ baŋa yɛnin ya dialun piɔ́mndon mun o ba?

²⁵ Balikaa co le Hala o diola Maalii naa Yeesu Krista lan! Kani i co bɛɛ o tɔŋ hakio bɛngu o dialun nun nin nuaa, kɛ i co tɔŋ Hala-o biyɔɔ o kɔl nuu nin.