Rɔmnda 3 - BII BILA

Tɔnɔ bɛndu Yuifia nɔ-o

¹ Ɔ́ɔ̀ niko mɛɛ Yuifia hiow vanaa tɔ̀a yɛ? Ɔ́ɔ̀ niko tɔnɔ toomaa?

² Tɔnɔɔ co o bɔɔ taw. O tasoo, nda sɔɔn Hala-on n yɔngun ni.

³ Te Yuifia pum a lo o lediom coo le, vɛ̀ɛ̀ mì ken kuuna Hala lou o diomnde ndɔlen coo?

⁴ Kɛì-kɛì bɛɛ! N sinan maa vana toɲaa Hala co ni. Vanndacieea nda, mɛɛ nda co kpede, vanaa lacòòvaa nda co ni. Maa mɛɛ o sɛvan yɛ aa: «Haliko ma sandu o sɔɔn nɔmndon nin, mà sɔla dío telen nda kialunin nɔm iyama-o.»

⁵ Kɛ te sandii nɛi lepɛŋnde tosa pɛ mì sandii Hala-e sinan, vɛ̀ɛ̀ naa n dimi yɛnin ken? Vɛ̀ɛ̀ vana sandaa lepɛŋndo Hala va le kɔllo tuuloo a naa ni? (O vanacieeyɛi nin ya co sɔɛi nuaa ni.)

⁶ Kɛì-kɛì bɛɛ! Vɛ̀ɛ̀ Hala kialu yɛnin yamɛi ceendo o kon?

⁷ Kɛ te Hala sɔla pɛ biiloo o còòla nilan nin, mì toɲa ndɔɔ fula ceen vakpa, le kɔlɔ yɛɛ ya sɔ̀là yɛnin yaalaa maa vana lahaki?

⁸ Maa mɛɛ vannda pum a co naa tɔ́ɔ́ tɛɛmbuuo mà va dimio yɛ aa: «N tosan dɛnɛ vɔɔndo haliko mi o kɛndɔɔ fula lenin.» Vanaa kan a sɔlanin yaalaa, ɛɛ nduyɛ, o bɛnda lende.

Vana-vana sendu Hala o hɔl te

⁹ Kpo! Mò va maa naa Yuifia n hiow caanda ni? Kɛì-kɛì bɛɛ! Kani n cii nihaw cɔm maa vanndacieea kpede, vana va Yuifinɔ, vana va vana súú celen, o kpaaya hakio bɛngu naa n co ni.

¹⁰ Maa mɛɛ o sɛvan yɛ aa: «Vana sandaa co le, o pilɛ bɛɛ.

¹¹ Vana-vana kindu kɔl te, vanndo pilɛ bɛɛ co Hala nuwviaa le.

¹² Nda kpow a mal nɛiyo, má siŋnun vanaa fondoa. Vana-vana co dɛnɛ kɛndɛ tosa le, hali o pilɛ bɛɛ.

¹³ Bolola ndalan la co maa sɛi buliɛi, a co yalalen a diɛɛmui ndɛi, maa lólò kɛw sɔɛi fula nda o n'cɔcɔ-e co ni.

¹⁴ Mɛɛniaalan a sɔɔn nɛyan kposon co fulaa nda so lasondo ni.

¹⁵ A lusulun n'pelu le kɔlan vanndacieea diwvo le.

¹⁶ Nɛɛ-nɛɛ nda kei pɛ, tɛɛmbuuo a dɛnɛ palaa koma fula nda kɔɔli.

¹⁷ A sínà nɛi kɔlɲuloo le.

¹⁸ A nɔ isiòòn a Hala le.»

¹⁹ Nduyɛ, n sinà maa sɔɔn kɛ́-kɛ̀ tɔŋndo dimi, vanaa co o tɔŋndo bɛngu-a n dimulun ni, haliko mi sondolan kpow la kumbun, o kon mì vana-vana sɔla yaalaa Hala o hɔl.

²⁰ Lelan, vana-vana sɔlanin di Hala o hɔl le tɔŋndo biyɔɔ le, kani tɔŋndo tosa ni mì hakio sinan.

Mɛɛ Hala ciindiaa vanndacieea yɛ

²¹ Sisa, dɛnɛ sandaa Hala-o cɔmnun, o co o tɔŋ nin te. Nduyɛ tɔŋndo a sɔɔn vanaa-tɛɛngaa-diom Hala-a dimi-on cɛl ndi lende.

²² Hala ke vanndacieea kpow dɛnɛ sandaa ndɔɔ le laalan nda laalan Yeesu Krista-o, hɛli co le.

²³ Kani vanndacieea kpow a tosa hakio, má fola biilu Hala-o.

²⁴ Kɛ mí Hala tosal nda kɛndɛi, má sɔla baŋanndo o Yeesu Krista nin, o co a vɔngu le.

²⁵ Ndu Hala hɛli le siŋnɔnndo sálà-baŋaa a kooma ndɔan ni. O kon, mí piɔ́m ndɔɔ tosa mí vanaa laalan ndu-a kpow a sɔla malɔɔ lahakio

²⁶ telen Hala va nda biuvɔnndo-o. Lende ndu Hala cɔm dɛnɛ ndɔ sandaa sisa ni. Ò tuisi vanndacieea dɛnɛ palaa coo le hakila ndalan te, kani o yeema mò lo o sandaa, mò ke vɛlɛ vanaa laalan Yeesu-a di.

²⁷ Ɔ́ɔ̀ niko kɔlɔ naa n co kuundianndo-o? O co sɔɛi vana kuundian te. Kuundianndo le tɔŋ kuɛɛ nɛ? Le dɛnnda kuɛɛ nɛ? N bɛnda mì n kuundian le ɲɛ-ɲɛ le, fɔ le tɔŋ laalanndo.

²⁸ Kani n co cɔu maa le laalanndo Hala ke vanacieo dí ni, o co le dɛnnda tɔŋndo le.

²⁹ Te kon te mò va maa le Yuifia koni Hala co ni? O co macoaa vɛlɛ le vanaa sínà ndu le-a le? O co vɛlɛ le nda,

³⁰ kani Hala ndu pilɛ kpé co ni. O kenin vanaa dii toomaa-a dio le laalan ndaa, mò ke vɛlɛ vanaa dii tooma le-a dio le laalan ndaa.

³¹ Vɛ̀ɛ̀ mì tɔŋndo ndu tambu niko le laalan naa? O co lende le i co le. Kɛ kon kpeekpei cɔm ɲama ndɔɔ ni.