Rɔmnda 15 - BII BILA

Kindinndo le tɔɔmasele Krista-o delɔɔ kɔɔli

¹ Naa vanaa nɔ kpaayaa o laalanndo nin-nda, o bɛnda mì n biwnun vanaa nɔ kpaaya le-a. N nuwvian o hɛnan naa pila-o kínɛí le.

² Vana-vana bɛnda mò kindin le caan ndɔ hɛnanndo o nɛi kɛndɔɔ coo, haliko mi vana kon hiow laci o laalanndo nin.

³ Kani, Krista nuwviaa hɛnan ndɔɔ le. Kɛ mɛɛ o sɛvan yɛ aa: «Yeowla vannda co nɔm-ndan, yeowla lan koni nda co ya ni.»

⁴ Nduyɛ, sɔɔn kɛ́-kɛ̀ n sɛvan lɔ́ɔ́ kon, le naa pɛɛkoo n sɛvan ni, haliko mi biuvɔnndo a yoomuma Sɔɛi Hala-e ke vana-an ma mala naa le kɔllo kɛsio.

⁵ Màá Hala ke vana biuvɔnndo mò ɲɔɔlu vana-o ke niaa kɔl pilɔɔ vellaa-velle le vaa velan Yeesu Krista-o,

⁶ haliko mi la va Hala biiloo a kɔl pilɔɔ a o diom pilɔɔ nin, Hala, Fuɲaa Maalii naa Yeesu Krista!

Yoongu kɛndɔɔ le vannda súúlan kpow

⁷ La biinan vellaa-velle maa mɛɛ Krista bii niaa yɛ, le biilu Hala-o.

⁸ I co niaa ndi dimul, vana lo o lediom coo-o Hala co ni. Lelan Krista siŋnun vana baala Yuifia ni, le kpemala Hala yiilu fuɲaa ndaa mamaa lan peeloo.

⁹ O hin haliko mi vanaa co n'yuif le-a biilu Hala le ɲíí ndɔɛi, maa mɛɛ o co o sɛvaa yɛ aa: «Lelan ya sangalanin nɔm vanaa-mangalaa-isɔɔa tɛɛn ni, mì soli condon le diola nɔmndan sangalaa.»

¹⁰ Mó dimin vɛlɛ aa: «Vanaa-mangalaa-isɔɔa, la dɔwnun ɲaale a vanaa Mɛlɛka-a latulu.»

¹¹ Mó dimin vɛlɛ aa: «La ke Mɛlɛka biiloo, niaa vanaa-mangalaa-isɔɔa kpow. Vannda kpow, la candu ndu.»

¹² Mí Esai bɛɛ dimi aa: «Cua imama Yisai-yo hunnin, o cannin le masalen tosaa vanaa-mangalaa-isɔɔa coo-o. Vanaa-mangalaa-isɔɔa kɛsinin ndu kɔllo coo.»

¹³ Màá Hala ke vana kɔlkɛsiaa-o pei niaa ɲaaloo a kɔlɲuloo o laalan niaa nin, haliko mi la pɛ a kɔlkɛsiaa o kpaaya Kɔl-Diandaa nin!

Baala Pol-lo

¹⁴ Puapilɛa nia, ya pila i laalan maa la nɔ yeemɛi le dɛnnda kɛndɛlan tosaa taw, la nɔ sinapɛngoo kpede haliko mi la tiwba niaa pila siilianndo vellaa-velle.

¹⁵ Nduyɛ, mí sɛval niaa ndi kpéŋ-kpéŋ le niaa yiyalanndo le kɛndɛi Hala tosal-la-e,

¹⁶ haliko mi va vana baala Yeesu Krista-o vanaa co n'yuif le-a tɛɛn. Kɛndɛi yɔngun ya le vannda Yoongu kɛndɔɔ tiiyallo, haliko mi vanaa co n'yuif le-a siŋnun sálà hɛnan Hala-o, sálà Kɔl-Diandaa dindi-o.

¹⁷ Lelan i nɔla mì sangalan o Yeesu Krista nin le baala Hala-o.

¹⁸ Kani i diminin isɔɔ oo isɔɔ le, te o co sɔɛi Krista tosa o ya nin-nde le, sɔɛi o tosa mí vanaa co n'yuif le-a bii sɔɛi Hala-e yɛ. A sɔɛi sondoei a á dɛnndan o tosa ken

¹⁹ o kpaaya Kɔl-Diandaa bɛngu ni. Lelan ya sɛŋi Yoongu kɛndɛ Krista-o ɲɛkɛndɛi kandɔɔ Yerusalɛm kɔlan háá o tàndá Iliri-o nin ni.

²⁰ Kɛ ya pila daama hɛli le Yoongu kɛndɔɔ yondaa o lɛŋii vannda sina vɔ Krista lei nin ni. Yɔŋii yáà tangul o kila vana celen coo.

²¹ Lelan, maa mɛɛ o co o sɛvaa yɛ ya tosa ni aa: «Vanaa sɔɛi ndɔɛi ndíì dimulun te-a canin ndu, mì vanaa tui bɛɛ sɔɛi ndɔɛi le-a bii ndi bila.»

Pol soo a tuu o nɔ le kɔlan Rɔm-ndo o kɔɔ

²² Ken i va ya kuunaa telennda bɔɔ-bɔɔ le kɔlan o niaa lo ni.

²³ Kɛ sunsun, i nɔ lɛ nɛɛ ya tosa baalaa o tàndàá ho nin nanu le, nduyɛ yeemɛi i co ya kabi vɔsilan taw le kɔlan o niaa lo. Telen ya i vanin kɔlan Ɛspaɲe-o,

²⁴ i ce maa i komalnin niaa o hiovɔɔ, mì la mala ya le kɔlan ndon. Kɛ mɛɛ mì soli vɔ fɔlɔn yeemɛi co ya le niaa cɔw-ve.

²⁵ Kɛ sunsun, Yerusalɛm ya co kɔlan ni, le baalaa vanaa diandaa tosaa.

²⁶ Kani vanaa laalannda Maseduan a haa Akaii a dimi le malaa biyɔɔ, le vanaa bala fondoa co vanaa laalannda tɛɛn Yerusalɛm-nda mala kon yɔŋndo.

²⁷ Nda pila dimi le nda malaa ni, kɛ o kpeekpeiyo nin, o bɛnda mà mala nda. Kani te nda co n'yuif le-a sɔla pɛ tɔnɔ kɔl co le yuifia-o, mɛɛ o bɛnda mà mala nda a ɲɛm ndan.

²⁸ Telen ya ciinin sɔɛi ken toosiaa mi yoo nda ɲɛm sɔlannin mun-ndon ndo, i keinin o niaa lo o kɔlan Ɛspaɲe.

²⁹ Nduyɛ, i sínà maa te i kɔɛ pɛ o niaa lo, i hunnin a duaa Krista-o taw-taw.

³⁰ Puapilɛa nia, i co niaa yoomuan luei, la yiyan le Maalii Yeesu Krista a le kaola Kɔl-Diandaa ke naa-o, mì la mala ya cɔlɔba kon o piɛilen nin,

³¹ haliko mi hɛlun vanaa laalaŋaa lepɛŋnda haa Yuda, mì vanaa dandaa kɔ naŋ kɔl a ɲɛm ya co nda yoo Yerusalɛm-ndon.

³² O kon te Hala cɛl pɛ, i tiiyanin o niaa lo a ɲaaloo, mì kɔ pɛngi niaa ikɛi lon ɲɛ-pɔmbɔ.

³³ Màá Hala yɔngu vana kɔlɲuloo-o va niaa kpow ikɛi! Amiina.