Rɔmnda 14 - BII BILA

La kialu caanda iyama le

¹ La bii vana nɔ laalan bɔɔ loo, o va a yiyannda ndɔlan sɛɛngiaa le.

² Mì vana pum ndu laalan maa o nɔla mò de ɲɛ-ɲɛ ka, kɛ mì caan celen, o nɔ laalan bɔɔ loo, ndu va lamnda lapeelan kínɛí dioo.

³ Vana dia ɲɛ-ɲɛ ka-o pɛɛsa vana di ɲɛ-ɲɛ ka loo le, vana di ɲɛ-ɲɛ ka loo bɛɛ kialu vana dia ɲɛ-ɲɛ ka-o iyama le, kani Hala cɛl ndu.

⁴ Nɛ̀ɛ̀ nɔm co yɛ, le yamɛi vana baala pilaa kiolɔɔ? O sim-ou, o del-ou, vana ndɔ bɛndoo sina ken ni. Kɛ nduyɛ, o simnin yili, kani Maalii nɔ kpaayaa le ndu simio.

⁵ Vana pum co yiyanndo maa paalen lepum le hiow a paalen lepilɛlen. O pum ndu co yiyanndo maa palɛi kpow kpen-kpen i co ni. O bɛnda mì vana-vana laalan yiyan co o ndu kɔllo ɲɛkɛndɛi.

⁶ Vana co yiyanndo maa palɛi i pum i hiow naŋɔɔ-o, le Maalii bɛɛlen keo o co ndi cɔu lende ni. Vana dia ɲɛ-ɲɛ ka-o bɛɛ, le Maalii ndu co dioo ni, kani o co Hala balikaa mello. Vana di ɲɛ-ɲɛ ka loo bɛɛ, le Maalii o kɛɛ n'pum dioo ni, ndu bɛɛ co Hala balikaa mello.

⁷ Kani vana-vana o naa tɛɛn co yoomu le ndu pila le, vana-vana co vu le ndu pila le.

⁸ Kani te n co pɛ yoomu, le Maalii naa n co yoomu ni. Te n vi yɛ pɛ, le Maalii naa n co vuo ni. Lelan n va yoomu, n vu, le Maalii naa co ni.

⁹ Kani lelan Krista vi ni, mó muungu vɛlɛ yoomu, haliko mo va vana bɛndoo le vanvílɛ́iya a le vanaa co yoomu-a.

¹⁰ Kɛ nɔm, le yɛɛ n co yɛ yamɛi puapilɛ nɔmndo kiolɔɔ? Te kon te, le yɛɛ nɔm co yɛ puapilɛ nɔmndo pɛɛsaa? Kani mɛɛ naa n co kpede, n simnin Hala o hɔl mò kelu naa iyama.

¹¹ Kani o co sɛvaa maa Mɛlɛka dimi aa: «I co yoomu, ya Mɛlɛka, vulan kpow la baŋnunnin ya o labɛngunin, mì lediɛɛmu oo lediɛɛmu le biilu Hala.»

¹² O kon vana-vana o naa tɛɛn dɔawnunnin kona o Hala lo le ndu pila.

Luei puapilɛ nɔmndo o pɔwlan nin te

¹³ Lelan n pɛngin yaman kiolɔɔ naa pila tɛɛn. La kindin, kɛ la hendul lɛ puapilɛa niaa pow boŋaa, te kon te ɲɛ luei nda o pɔwlan nin-ndo laci le.

¹⁴ I laalan maa te vanndo va pɛ o Maalii Yeesu nin, ɲɛ-ɲɛ co o nɔɔlɛi ndu o hɔl te. Kɛ te vana pum yiyan pɛ maa ɲɔɔ pum co o nɔɔlɛiyo, mɛɛ le ndu pila ɲɛ kon co o nɔɔlɛiyo ni.

¹⁵ Taa saangiaa pɛ puapilɛ nɔmndo kɔllo le ɲɛdiaa n co dioo-o, mɛɛ a tosa dɛnɛ kaolaa le. Tosa mì ɲɛdiaa nɔmndo yɔŋnun sabu le delɔɔ vana Krista vi le ndu-o le.

¹⁶ La cɛl mì vannda dimi sɔɔn vɔɔnndon a ɲɛ niaa yiyan maa o naŋ-ndo o kɔɔ le.

¹⁷ Kani masale Hala len le co dɛnɛ ɲɛdiaa te kon te dɛnɛ kolaa le, kɛ dɛnɛ sandaa, kɔlɲuloo a ɲaaloo dɔwnɔnndo, o Kɔl-Diandaa yɔngu vana-o.

¹⁸ Vana tosal pɛ Krista baalaa o nɛi vaa lende coo, ndu hɛnan Hala, vanndacieea bɛɛ a hini kɔl a dɛnɛ ndɔɔ.

¹⁹ Lelan, n nuwvian dɛnɛ luei kɔlɲuloo-o a dɛnɛ hivi naa laci vellaa-velle o laalanndo nin-ndo.

²⁰ Tɛɛmbuu baala Hala-o le ɲɛdiaa le. O toɲaa nin, ɲɛ-ɲɛ fee co o diandaa. Kɛ dɛnɛ vɔɔndo o co le vanacieo ɲɛdiaa pum dioo, mò siŋnun pow boŋaa le vana celen ni.

²¹ O naŋ-ndo co ni, vana dia n'visi le, vana kol mamɔi le, vana tosa ɲɛ-ɲɛ luei puapilɛ nɔmndo o pɔwlan nin-ndo le.

²² Laalan n nɔ kon-ndo, manda ndu le nɔm pila Hala o hɔl. Vana duaa co kon ni, vana yaalan o ɲɛ o yiyan le tosaa-o nin too.

²³ Kɛ vana sika pɛ le ɲɛ o co dioo-o, ndu sɔla yaalaa, kani dɛnnda o tosa lan la fula o laalan nin te. Nduyɛ dɛnɛ oo dɛnɛ vana tosa a laalanndo le, ndu co hakio ni.