Rɔmnda 12 - BII BILA

Dɛnnda vanaa co o Krista nin-nda

¹ Puapilɛa nia, le mɛɛ Hala co naa ɲííye tuinɔnndo yɛ, i co niaa yoomuan luei mì niaa pila solin sálà kiyɛiyo, o dendu mo hɛnan Hala-o, kaannde kpeekpeile niaa bɛnda mì la tosa len le co len ni.

² La tuvan a dɛnnda vannda paalen nden hau le, kɛ la mangalan o kɔlkalu sɛnɛiyo sɔlaa nin le hɛnan Hala-o sinaa: o naŋ-ndo, o hɛnan vana-o, o tiun-ndo.

³ Le kɛndɛi Hala tosal-la-e, i co niaa dimul maa la cannun niaa pila ɲɛ mò hiow mɛɛ niaa co yɛ le, kɛ la tuisin mì vana-vana cennun mɛɛ o co yɛ, maa mɛɛ Hala ke vana-vana laalanndo yɛ.

⁴ Kani mɛɛ naa n nɔ falon taw o dialun naan nin, mì ifalu oo ifalu nɔ vali ndɔ yɛ,

⁵ lende naa n co sɛ́lɛ́ ni, kɛ falei ndii pilɛ kpé naa n co o Krista nin ni. Falon naa n co n'yiinanndon vellaa-velle ni, vana-vana o fonda ndɔ.

⁶ Mɛɛ naa n sɔla valta yɛ́-yɛ́lan o kɛndɛi kennun naa-e nin yɛ, te vanndo sɔla pɛ vali tɛɛngaa diom Hala-o, o bɛnda mò tosa vali kon a laalanndo.

⁷ Te vanndo sɔla pɛ vallo le vannda baalaa toallo, ndu tosal vannda baalaa. Vana sɔla pɛ vali pɛɛkaa-o, ndu pɛɛku vannda.

⁸ Vana nɔ vallo le vannda yoomuan lueiyo-o, ndu luei vannda yoomuan. Vana nɔ vallo le kɛndɛi tosaa-o, ndu tosa kɛndɛi. Vana nɔ vllo le vannda simndan lacio, ndu tosa baala kon a dialun fulan, mì vana nɔ vallo le vannda ɲííye tuinɔnndo-o ndu tuinun vannda iɲíí a kɔlkɛndɔɔ.

⁹ Kaolaa bɛnda mò va a muulɔnndo le. La kpakpala dɛnɛ vɔɔndo, mì la kaola dɛnɛ kɛndɔɔ.

¹⁰ La kaolian vellaa-velle maa cuavaa mɛɛle pilɛ. La kindin fɔlɔn mì la kenan bɛɛlen vellaa-velle.

¹¹ La va vanaa dialun fulaa, la va vanaa idia le. La tosal Mɛlɛka baalaa a kɔlta niaalan kpow.

¹² La dɔwnun ɲaale o kɔlkɛsiaa niaa nɔ-o nin. La va vanaa yulu dɛnɛ palaa-a, mì la biwnun o piɛilen nin.

¹³ La sɔɔnguu vanaa laalaŋaa co o balahavɛilan nin-nda ikɛi. La kindin le mialla biyɔɔ a ɲaaloo.

¹⁴ La dɔw vanaa co niaa yɛlen tollo-a duaa. La dɔw duaa, la mɛna vana le.

¹⁵ La dɔwnun ɲaale a vanaa co o ɲaaloo nin-nda latulu, mì la caŋ a vanaa co caŋndo-a latulu.

¹⁶ La kela kela kɛndɔɔ niaa pila tɛɛn vellaa-velle. La va vanaa kuundian te, kɛ la tosa dɛnndan kpow o tuisinndo nin. Niaa pila cannun vanaa kɔlkalu le.

¹⁷ La mingul vana-vana dɛnɛ vɔɔndo a dɛnɛ vɔɔndo le. La kindin mì la va dɛnɛ kɛndɔɔ tosaa vannda kpow o hɔl.

¹⁸ Te kon nɔla pɛ tosan, te a niaa sɔɛi co ni, la kindin mì la va o kɔlɲuloo nin a vannda kpow.

¹⁹ Niaa vanaa hɛnan ya-a, niaa pila mingi màá dɛnɛ vɔɔndo le, kɛ la mel kɔltuw Hala-o fondaa, kani o co o sɛvaa aa: «Ya co vana mingia maa ni, ya salanin vana-vana ni.» Mɛlɛka dimi lende ni.

²⁰ Lelan, «Te yiaan ma nɛi pɛ yaamɔɔ nɔmndo, ke ndu ɲɛdiaa, te kolɔɔ bii ndu pɛ, ke ndu mò kol. Taa tosa pɛ lende, maa ladɛngulta biyaalan n co ndu dengeliaa o lebol lende ni.»

²¹ Cɛl mì dɛnɛ vɔɔndo nɔla nɔm te, kɛ nɔla dɛnɛ vɔɔndo o dɛnɛ kɛndɔɔ tosaa nin.