Dɛnnda cɔɔmuanndan 9 - BII BILA

¹ Mí mɛlɛkanɔ ŋuɛɛnundɔɔ hɔŋ buloo, mí ca loei fulaa coocoo, mí i del o lɛŋnden coo. Mí kii soon yingilaa nɔ lamɛɛlu le-i yɔngun ndi.

² Mí loei ken kumbi soon kalaa, mí kumnde pum i can lenin maa kumii tóndó bɛndu leyin, mí paalen a hoeiye i piimiaa kpilo a kumii va ken fulaa o soon kon nin-nde.

³ Mí sóónɔa fula o kumii ken nin, má coŋ o lɛŋnden coo, mí kpaayaa kennun nda maa kpaaya ngeemaa co o lɛŋnden coo-a.

⁴ Mí i dimulun sóónɔa kan maa a pilan bil oo bil co o lɛŋnden coo le, a pilan yondo puiyaa le, a pilan yɔm oo yɔm co o lɛŋnden coo le, kɛ vanndacieea nɔ pondale Hala len o itendu le-a kínɛí nda del coo ni.

⁵ Mí i dimulun nda maa a diw nda le, kɛ a dɔw nda yɛɛvɛ le paangon mún ŋuɛɛnu, mì yɛɛvɛ kon pala nda mɛɛ ngeemaa biaŋ vanacieo, mò dɔw ndu yɛɛvɛ nuaa yɛ.

⁶ O palɛi ken bɛngu, vanndacieea nuwviaanin piɔ́mndo, kɛ a seelunnin ndu le. Yeemɛi piɔ́mnde vanin nda, kɛ mì piɔ́mndo ɲaanun nda, mò kɔɛnnun polon.

⁷ Vanaa ce pɛ sóónɔa kalaa aa soa nda dovi le cɔwvo-a ni. Ɲɛlan lapum la va nda o lebol, velanndo a mɔsilta lemasala toosian a sianion-ndan. Hɔlla va nda maa hɔlaa vanaciee.

⁸ Sóónɔa kalaa ndáà nɔ yiinde o lebol maa yiiŋii vanlaandu, a ciŋndon nda maa ciŋun yàlà.

⁹ Vanáà ce pɛ nda takpalan aa domala cɔwla icilinndan ni, vanaa tuei pɛ bɔɔla ndalan diom aa ɲɛla ɲaanannda soa sɛ́lɛ́a nanndan la co ɲaanɔnndo le kɔlan o cɔwvo ni.

¹⁰ Sóónɔa kan ndáà nɔ puiye a kefon maa n'ngeema, nduyɛ o puiyii ndɛi ken nin yoomuma ndáà nɔ le vannda yɛɛvɔɔ dɔvɔɔ háá le paangon ŋuɛɛnu-an ma va ni.

¹¹ O va nda coo masaa-o va mɛlɛkanɔ soon yingilɛi kon ni, diola ndɔlan o hebrei nin aa Abadɔn, o krɛkiei nin yɛ aa Apoliɔn. Kon co dimio ni aa «Vana tɛɛmbua».

¹² Mí dɛnɛ palaa tasoo hiaw. O kon kɔɔli, mí dɛnnda palaala celen la hun vɛlɛ tan tiɔn.

¹³ Mí mɛlɛkanɔ ŋɔmpumndɔɔ hɔn buloo. Mí tuɛi diomndo fulaa o kpɛɔn hiɔɔlun co o fonda-loamaa-lasálà n'siani co Hala laci-on tɛɛn,

¹⁴ mó dimul mɛlɛkanɔ ŋɔmpundɔ bulu hɔŋaa va o ba-o aa: «Tiimbuu mɛlɛkaa hiɔɔlua co haa a yiyaa a yɔlɔn o pee bɛndoo Efrate kɔngɔ-a.»

¹⁵ Má timbi mɛlɛkaa hiɔɔlua kan. Le telen kon, paale len, paangii ken a le vɔsi kon nda va a bɛɛndiannda ni, haliko, vanndacieea piɔwvo kundalan tan yáá, a diw kundaa pilɔɔ.

¹⁶ Má cɔm ya mɛɛ vanaa cɔvaa va o soa coo-a va sɛ́lɛ́ yɛ, a va milionndan kɛmɛ lediin. Lende ya tuei mɛɛ nda va sɛ́lɛ́ yɛ ni.

¹⁷ O kon mí ca soa a vanaa va lecoo-a. Ndáà nɔ domala cɔwla siaŋalan maa leyin, la yinɔɔ makaalan a la co layinaalan maa kolo mayéndi lan-ndan. Bolii soa va maa bolii n'yàlà, ɲɛ va nda fulaa o sodo-o va yinnden, kumnde a fungoo ni.

¹⁸ A dɛnnda palaala yàála lan: yinnden, kumnde a fungu va fulaa soa kan o sondo-o, mí vanndacieea piɔwvo kundalan tan yáá, kundaa pilɛ cuu vu.

¹⁹ Kani o lasondo a o puiye kpaaya soa kan ma va ni, maa n'kɛw puiyii ndɛi va ni, ndíì nɔ bolle, a bolii ken nda va vannda tɛɛmbuuo ni.

²⁰ Vanndacieea tɔ̀a dɛnnda palaala lan la dii le-a, nda mangalan mà mal dɛnnda nda va tosaa lan te. A pɛngi ɲinaa vɔɔnda a piɔmaa n'siania, a n'volia, a n'daɲaa, a lapowva a piɔmaa nda sɛl a yɔmnde-a sooloo le. Piɔmaa kan yɛ, a ci le, a tui le, a kpeŋan te.

²¹ A mangalan mà mal vanndacieea diwvo le, a mel kueilen fulaa le, a mel laasian ndaa a vuile nda va tosaa len te.