Dɛnnda cɔɔmuanndan 8 - BII BILA

Tɔɔmasele ŋɔmmɛwndɔɔ

¹ Saa téndóó kumbio tɔɔmasele ŋɔmmɛwndɔɔ, mí ɲɔɔ mei o halataala doŋ-doŋ le telen bingi.

² O kon kɔɔli, mí ca mɛlɛkaa ŋɔmmɛvaa va isisi Hala o hɔl-la, má ke nda bulula hɔŋaalan tan ŋɔmmɛw.

³ Mí mɛlɛkanɔ celen hun sim o fonda-loamaa-lasálàá coo, bonyii fuusɛi toosian a sianion-nde va ndu o ba. Má ke ndu ansan taw le ndu lomɔɔ, a piɛile vanaa diandaa kpow o fonda-loamaa-lasálàá n'sianio o kpɛŋɛ lemasaa hɔl-ndɔ.

⁴ Mí kumii lasikɔlɔɛi ken va cɔnɔnndo mɛlɛkanɔɔ o ba, mí i va helɔɔ Hala o hɔl a piɛile vanaa diandaa latulu.

⁵ O kon mí mɛlɛkanɔɔ cua bonyii fuusɛi ken, mó pei ndi a yinnde o cua o fonda-loamaa-lasálàá len, mó viaw lɛŋ. Mí taŋndan ma piɔndi, mí diomndan la soaa. Mí piɔɔ voli, mí lɛŋnden le ɲiiya.

Bulula hɔŋaalan

⁶ Mí mɛlɛkaa ŋɔmmɛvaa ndáà nɔ bulula hɔŋaalan o ba-a bɛɛndian le lan hɔŋndo.

⁷ Mí mɛlɛkanɔ tasoo hɔŋ buloo. Mí loeon delian a yinnden le bingulan a koovan, mí ɲɛla lan la toal o lɛŋnden coo. Mí lɛŋnden piɔwvo kundalan tan yáá, o pilɛ ŋɔa, mí yɔmnde piɔwvo kundalan tan yáá, o pilɛ ŋɔa, mí bil oo bil ŋɔa.

⁸ O kon kɔɔli, mí mɛlɛkanɔ diinndɔɔ hɔŋ buloo. Mí ca ɲɔɔ pum, ó va maa pembii bɛndui yinnde biyaa-o, mó viawnun o mɛmma ihɛllan nin. Mí mɛmma ihɛllan piɔwvo kundalan tan yáá, o pilɛ siŋnun koovan.

⁹ Mí ɲɛm cɔwnun mì n va o mɛmma ihɛllan nin-ndon tambu, mí dɛ̀ndɛ̀la mamɛnndan, piɔwvo kundalan tan yáá, kundaa pilɛ tambu.

¹⁰ Mí mɛlɛkanɔ yàándɔɔ hɔŋ buloo. Mí loei bɛnduei pum fula coocoo, mí i del, mí i va sandei maa tɛngɛ. Peelan piɔwvo kundalan tan yáá, mí loei ken del kundaa pilɛ coo a o soonnda mamɛnndan coo.

¹¹ Diola loei ken aa: Ɲɛ loloo, mí mɛnndan piɔwvo kundalan tan yáá, kundaa pilɛ lol kélélé, mí vannda taw a vu le lol mɛmma man ma lol kon-ndo.

¹² Mí mɛlɛkanɔ hiɔɔlundɔɔ hɔŋ buloo. Mí paalen piɔwvo kundalan tan yáá, kundaa pilɛ piimiaa. Mí paangei piɔwvo kundalan tan yáá, kundaa pilɛ piimiaa, a loeon piɔwvo kundalan tan yáá, kundaa pilɛ piimiaa, mí ɲɛ-tengaa lepalaa baa pilɔɔ o kundala yàálan nin piimiaa, mí i tosan lende a ɲumndan.

¹³ Mí mɛɛndan, mí tuɛi kovɛɔ cɔnɔnndo coocoo o halataalaa tɛɛn, mó va yondaa coocoo aa: «Dɛnɛ palaa, dɛnɛ palaa, dɛnɛ palaa co vanndacieea co o lɛŋnden coo-a cum, telen mɛlɛkaa yáá-a hɔŋnin bulula ndalan-ndo pɛɛn.»