Dɛnnda cɔɔmuanndan 6 - BII BILA

Tɔɔmaselela ŋɔmpumndan

¹ Mí mɛɛndan, telen Saa téndóó va tɔɔmasele tasoo kumbio-o, mí tuɛi ɲaa yoomaa kan o pilɛ deŋio a diomndo maa diom letaŋ aa: «Hun!»

² Mí tofa, mí ca so humboo. Kpaasiaa va vana va lecoo-o o ba, mí mɔsil lemasaa kennun ndu, mó kɔa maa vana tiw ba-o le nɔlaa.

³ Telen o kumbi tɔɔmasele diinndɔɔ-o, mí tuɛi ɲɛ yoomaa diinndɔɔ dimio aa: «Hun!»

⁴ O kon mí so celen fula, kɔɔlen le va ndu le siaŋa maa leyin. Mí dio kennun vana va lecoo-o le kɔlɲuloo faŋaa o lɛŋnden coo, haliko mi vanndacieea diuvan vellaa-velle, o kon mí mɔɛi cɔvii bɛnduei pum kennun ndu.

⁵ Ndóò kumbio tɔɔmasele yàándɔɔ, mí tuɛi ɲɛ yoomaa yàándɔɔ dimio aa: «Hun!» Mí tofa, mí ca so tiŋio. Vana va lecoo-o ndóò nɔ kilo tuvaa o ba.

⁶ Mí tuɛi diomndo pum ɲaa yoomaa hiɔɔlua tɛɛn, mó dimi aa: «Maalon panio ca le sala vali paale pilɔɔ, ɔrse panio leyàá le sala vali paale pilɔɔ, cuɛiyan a mɔiyan man, pilan man te.»

⁷ Telen o kumbi tɔɔmasele hiɔɔlundɔɔ-o, mí tuɛi ɲɛ yoomaa hiɔɔlundɔɔ dimio aa: «Hun!»

⁸ Mí mɛɛndan, mí ca so pupulaao. Vana va lecoo-o diolan aa Piɔ́mndo, ciee-piɔ́m va ndu kɔlan kɔɔli. Mí dio kennun nda le masalen tosaa o bungɛi pilɛ, o bungan hiɔɔlun lelɛŋndon coo le vannda diwvo a mɔɛi cɔwve, a yima fofolan, a nàà halimaa a á visia biyaa co o lɛŋnden coo-a.

⁹ Mɛɛ o kumbi tɔɔmasele ŋuɛɛnundɔɔ, mí ca kɔlta vannda pum o fonda-loamaa-lasálàá bɛngu, vanaa ndáà kili bololan le sɔɛi Hala-e a le seile ndáà timbi len-nda pɛɛn.

¹⁰ A va yoondiaa coocoo kpélén aa: «Vana naa bɛndu diandaa toɲaa sei, vɛ́ cumndo ho, lɔ́ɔ́ kuɛɛ n co yɛ yamɛi kiolɔɔ, mà mingi màá nda dii naa-o o vanndacieea co o lɛŋnden coo-a lo?»

¹¹ Mí doma bɛndu humboo yɔngun vana-vana o nda tɛɛn, o kon má dimul nda maa a cum ɲɛ-pɔmbɔ, háá mi caaŋaa ndaa nda tosa baala pilɔɔ-a a puapilɛa ndaa nda va hunɔɔ diyɔɔ maa nda-a ndáà siow bɔŋa.

¹² Telen o kumbi tɔɔmasele ŋɔmpumndɔɔ-o, mí lɛŋnden le ɲiiya taw, mí paalen le muungu le tiŋi maa volɔɔla biisi, mí paangei kpow i muungu maa makòó,

¹³ mí loeon o halataala n deli o lɛŋnden coo maa mɛɛ hoeyii bɛnduei hiiluu voosu tumndo nuaa mì vooson cɛɛlun yɛ.

¹⁴ Mí halataalaa hiaw a simbulɔnndo maa mɛɛ vana simbul sɛbɔɔ nuaa yɛ, mí pembon kpow a tiŋndan la faŋan o fondala ndalan.

¹⁵ Mí masaa co o lɛŋnden coo-a, simlacia, simlacia vanaa cɔwva, vanaa bolofaa, vanaa kpaayaa, cɛa kpow a vanaa co o ba ndaa coo-a viannun o buululan nin a o powta kpovala co o pembon coo lan bɛngu.

¹⁶ Ma va pembon a powta kpovalan dimullo aa: «La del naa coo mì la ven naa, haliko vana co icali o kpɛŋɛ lemasaa nin-ndo ca naa le, kɔltuw Saa téndóó komal naa le.

¹⁷ Kani paale bɛndule kɔltuw ndaa le tiiya, nɛ̀ɛ́ nɔla yɛnin simndan?»