Dɛnnda cɔɔmuanndan 4 - BII BILA

Mɛɛ vannda vanin Hala biiloo o masale ndɔlen nin yɛ

¹ O kon kɔɔli, mí mɛɛndan, mí ca dioo pum o kumbiaa o halataala. Mí diom ya tuei sɔɛi o tasendɔ o ya lo maa diom bulu-o dimi aa: «Hel nanu, mì cɔm nɔm ɲɛ hun yɔŋnunnin lɔ́ɔ́ lepum-ndo.»

² Fɔ́ɔ́fɔ̀, mí Kɔl-Diandaa cua ya. Kpɛŋɛ lemasaa va o halataala, vanndo va icali o kpɛŋɛ kalaa nin.

³ Vanáà ca ko vana kalaa aa pow yaspe a pow sarduan ni. Mí ninginangaa kilan yɛwve o kpɛŋɛ lemasa kon balɔɔ pindo maa pow emerɔd.

⁴ O kpɛŋɛ lemasa kon balɔɔ pindo, kpɛŋɛla lemasala celen la va bidiin a lahiɔɔlu, bɛndua yuuvɛiya va icali lenin a volɔɔla humbulan lekɔɔ, mɔsilta lemasala n'sianilan la va nda o lebol.

⁵ Mí ɲɔɔ va fulaa o kpɛŋɛ lemasa kalaa maa piɔɔ-volia, a diomndan maa diomnda mataŋ. Fitinalan lapum la va sandei o kpɛŋɛ lemasa kalaa hɔl-ndɔ, lan la co kɔlta ŋɔmmɛwla Hala lan ni.

⁶ Ɲɔɔ va o kpɛŋɛ lemasa kalaa laci o kɔannan tɛngɛ̀-tɛngɛ̀ maa mɛmma bɛndu, o va ŋɛlɛngi-ŋɛlɛngi maa kristal. Ɲaa yoomaa va o kpɛŋɛ lemasa kalaa tɛɛn a o balɔɔ nda hiɔɔlu, ndáà nɔ hɔltan taw-taw nda laci a o mundu.

⁷ Maa yàlà ɲɛ yoomaa tasoo va ni, ɲɛ yoomaa diinndɔɔ maa naw cua, o yàándɔɔ ndóò nɔ hɔlla maa hɔlaa vanaciee, ɲɛ yoomaa hiɔɔlundɔɔ ndu, maa kovɛ co kɔlan coocoo-o o va ni.

⁸ Ɲaa yoomaa hiɔɔlua kan kpow, o kɛ́-kɛ̀ ndóò nɔ kumbanndan tan ŋɔmpum, nda kpow ndáà nɔ hɔltan lativaa nda lekɔɔ sɔ́. Paalen a ɲumndan a ve pɛngi dimio le aa: «O-Diandaa, O-Diandaa, O-Diandaa Mɛlɛka Hala, Vana-Kpaayaa-Kpow co ni, o va-o, o co-o a o co hunɔɔ-o.»

⁹ Telen oo telen ɲaa yoomaa kan va pɛ vana co icali o kpɛŋɛ lemasaa coo-o, o co kon yoomu le fɛɛn a fɛɛn-ndo biiloo, ma va ndu bɛɛlen keo a ndu balikaa mello,

¹⁰ bɛndua yuuvɛiyaa bidiin a à hiɔɔlua baŋ vulan vana co icali o kpɛŋɛ lemasaa nin-ndo o labɛngunin, a biilu vana co yoomu le fɛɛn a fɛɛn-ndo, o kon a vuu mɔsilta ndala lemasalan o kpɛŋɛ lemasaa hɔl-ndɔ a dimio aa:

¹¹ «Le nɔm biiloo, bɛɛlen a kpaayaa co ni Mɛlɛka Hala naa, kani nɔm cɔw ɲɔɔn kpow ni, nɔm cɛl ni mì n va, ɛɛ nduyɛ mì n cɔawnun.»