Dɛnnda cɔɔmuanndan 22 - BII BILA1 Mí mɛlɛkanɔɔ cɔm vɛlɛ ya pee mɛmma yoomaa, mɛmma ndɔan ma va madiandaa few maa tofan, o kpɛŋɛ lemasa Hala-o a Saa téndóó-o mɛmma ndɔan ma va fulaa ni. 2 Yɔm yoomaa va o falii kobio tɛɛn a o kɔngɔla tiɔnnda pee kon coo, tɔ́ a lediin yɔm kon koam ni, ipaangu oo ipaangu o kom lepilɛ. A pei yɔm kon vanaa-mangalaa-isɔɔa sɔ̀la siongɔɔ ni. 3 Danga ve lɛnin te. Kpɛŋɛ lemasa Hala-o nda Saa téndóó vanin o kobio nin. Vanaa ndɔa baalaa biilunin ndu. 4 A canin ndu hɔlla, diola ndɔlan la vanin la lasɛvaa nda o n'tendu. 5 Ɲumma ve lɛnin te, a nɔ lɛnin mako a ɲɛ-tengaa fitina le, a nɔ lɛnin mako a ɲɛ-tengaa lepaa le, kani Mɛlɛka Hala teengiaanin nda ni, mà tosa masalen le fɛɛn a fɛɛn. Hunɔɔ Yeesu-o 6 Mí mɛlɛkanɔ kon dimul-la aa: «Sɔɔn vana bɛnda le laalanndo-on a sɔɔn toɲan sɔɔn mun co ni. Mɛlɛka, o nɔ kɔlta vanaa-tɛɛngaa-diom Hala-a o ba-o vem mɛlɛkanɔ ndɔɔ le vanaa ndɔa baalaa ɲɛ yɔŋnunnin nanu a telen bingi-o cɔmndo.» 7 Mí Yeesu dimi aa: «Yaŋ nilan, i co hunɔɔ sunsun! Dɛnɛ kɛndɔɔ co le vanaa co sɔɔn Hala-n co o sɛbɔɔ ho nin-ndon biyɔɔ balan tan tiɔn-nda!» 8 Ya Nsaŋ, ya tuei dɛnndan ndan mí ca lan ni. Telen ya tuei mí ca lan-ndo, mí del mɛlɛkanɔ va ya lan cɔmndo-o o pelon bɛngu le ndu biiloo. 9 Kɛ mó dimul-la aa: «Tosa lende le! Caan nɔm niaa co baala pilɔɔ tosaa-o ya co ni, caaŋoo puapilɛa nɔmnda, vanaa-tɛɛngaa-diom Hala-a pɛɛn, a vanaa co sɔɔn sɛbɔɔ ho biyɔɔ-a. Hala n bɛnda le vulan baŋɔɔ o labɛngunin ni.» 10 O kon mó dimul-la aa: «Viaŋ sɔɔn Hala cɔm nɔm mun, mí n va o sɛbɔɔ ho nin-ndon te. Kani telenndo cuu nin sɔɔnguu. 11 Vana vɔɔndo ndu hiow laci a dɛnɛ vɔɔndo tosaa tuŋ, mì vana co o nɔɔlɛiyo-o hiow laci a nɔɔlianndo, mì vana sandaa hiow laci a sandei, mì vana diandaa ndu hiow laci a dindinndo. 12 Tofa vɔ, i co hunɔɔ sunsun, i co hunɔɔ a vɔ̀ngɔ̀la nilan, le vana-vana mingullo mɛɛ dɛnnda ndɔlan la co yɛ. 13 Ya co Alfa a Omeka ni, vana tasoo a vana mɛɛlaa, kandɔnndo a mɛɛlulan. 14 Dɛnɛ kɛndɔɔ co le vanaa co domala ndala bɛndulan tɔ́ɔ́-a. A sɔlanin dio le kɔmnde yɔm yoomaa sɔlaa, o kon mà kei o diola kobio le luɛyɔɔ lenin. 15 Kɛ nduyɛ vanaa tosaa dɛnnda vɔɔnda, vanaa mangalaa, vanaa tosaa dɛnnda nɔɔlɛiya, vanaa diuvaa n'vannda, vanaa soolaa n'piɔmnda a vana-vana kaola còòlan mo co lan dimio, nda lueinin te few. 16 Ya Yeesu, i vim niaa mɛlɛkanɔ nuu le niaa sɔɔn mun cɔmndo kundala vanaa laalannda tɛɛn. Ya co pulun David-on ni, o polale ndɔlen coo ya fula ni, ya co loei tenga idii-ye ni.» 17 Mí Kɔl Hala-o a lanɔɔ Saa téndóó va dimio aa: «Hun!». Vana tuei pɛ ndu bɛɛ veelu aa: «Hun!». Vana kolɔɔ bii pɛ, o hun. Vana yeema pɛ, o hun kɔndu mɛmma yooman, o co a vɔngu le. Liima-isɔɔ 18 Ya Nsaŋ, i kanalan vana-vana tuei pɛ sɔɛi Hala dimi hee, mí i sɛvan o sɛbɔɔ ho nin-nde: Te vanndo handu pɛ ɲɛ-ɲɛ lecoo, Hala handunin vana kon dɛnnda palaala sɛvan o sɛbɔɔ ho nin-ndan coo. 19 Te vanndo faŋa yɛ pɛ ɲɛ-ɲɛ o sɔɔn Hala dimi mun mì n va n sɛvaa o sɛbɔɔ ho nin-ndon coo, Hala faŋanin kulun yɔm yoomaa vana kon a tɔnɔ o nɔ o kobi diandaa nin-ndo lecoo, yɔm yoomaa a kobi diandaa sɔɛi ndɔɛi sɛvan o sɛbɔɔ ho nin-ndo pɛɛn. 20 Vana cɔm maa toɲaa sɔɔn mun co ni-o dimi aa: «A toɲa, i co hunɔɔ sunsun!» Amiina! Hun, Maalii Yeesu! 21 Màá Kɛndɛi Maalii Yeesu-e va niaa kpow coo! |
© Alliance Biblique en Guinée
Bible Society in Guinea-Conakry