Dɛnnda cɔɔmuanndan 21 - BII BILA

Halataala sɛnɛiyo a lɛŋnde sɛnɛilen

¹ Mí ca halataala sɛnɛiyo a lɛŋnde sɛnɛilen, kani halataala tasoo a lɛŋnde taselen le ve lɛ le, mɛmma ihɛllan bɛɛ ma ve lɛ le.

² Mí ca kobi diandaa, Yerusalɛm sɛnɛiyo tolɔɔ fulaa o halataala o Hala lo, o va o bɛɛndiaa mɛɛ nda bɛɛndiaa vanalanɔɔ le ndu yɔɔ o nɔu o pɔnɔ ndɔ lo nuaa yɛ.

³ Mí tuɛi diom bɛndoo pum fulaa a ba kpɛŋɛ lemasaa aa: «La tofa vɔ Cɛi-Diandaa Hala-o vanndacieea tɛɛn! O vanin nda tɛɛn, a vanin vanaa ndɔa, mì Hala pila va a nda latulu.

⁴ O vɔɔsuunin nda mɛmɛan kpow o lahɔl. Piɔ́mndo ve lɛnin te, biisi ve lɛnin te, yeela ve lɛnin te, ɲɛ nɛyaa ve lɛnin te, kani ɲɛm tason hiow.»

⁵ O kon mí vana va icali o kpɛŋɛ lemasaa coo-o dimi aa: «I co ɲɔɔn kpow mingi n'sɛnɛi.» O kon mó dimi aa: «Sɛva sɔɔn mun, kani sɔɔn vana bɛnda le laalanndo-on a sɔɔn toɲan n co ni.»

⁶ Mó dimul-la vɛlɛ aa: «I cuu tosan, ya co vana tasoo a vana mɛɛlaa ni, kandɔnndo a mɛɛlulan pɛɛn. Vana kolɔɔ bii pɛ, i kenin ndu soon mɛmma yoomaa, o venin a vɔngu le.

⁷ Ɲɛ vana nɔlanin-ndo sɔlanin kɛ́ɔ-vo co hoo ni: I vanin Hala ndɔɔ, mì ndu va po nuu.

⁸ Kɛ vanaa isiòònda, vanaa laalan te-a, vanaa tosa mààlan-nda, vanaa diw vannda-a, vanaa tosa dɛnnda laasiɛilan-nda, vanaa mangalaa, vanaa soolaa n'piɔmnda a vanaa lacòòvaa kpede, o dala bɛndu leyin fungoo vanin ŋɔu nin-ndo nin fonda ndaa vanin ni, piɔ́m diinndɔɔ co kon ni.»

Yerusalɛm sɛnɛiyo

⁹ O kon mí mɛlɛkanɔɔ pilɛ o mɛlɛkaa ŋɔmmɛvaa ndáà nɔ taalala kólaala ŋɔmmɛwla va lapiaalan a dɛnnda palaala ŋɔmmɛwla mɛɛlaalan-nda hun soaa o ya lo, mó dimi aa: «Hun i cɔm nɔm lanɔ co kɔlan Saa téndóó o ba o nɔu-vo.»

¹⁰ Mó kɔa a ya o kɔllo nin o pembii bɛndui vilɛi-vilɛiye pum coo. Mó cɔm ya Kobi diandaa, Yerusalɛm pɛɛn, o va fulaa coocoo o Hala lo.

¹¹ O va volio a biilu Hala-o, o va volio vanáà ca ko aa pow báà kala bɛndoo ni, yaspe, o co maa tofan-ndo.

¹² O va o kpaki vilɛi-vilɛi bɛndoo pum nin. Ndóò nɔ diola luɛyaalan tɔ́ a latiɔn, a mɛlɛkaa tɔ́ a à ŋiɔn o diola luɛyaala lan coo. Diolan lapum la va lasɛvaalan lecoo, diola polama tɔ́ a mamiɔmma cuavaa Israɛl-la.

¹³ Diola luɛyaalan tan yáá la va o ikpengu oo ikpengu coo ni: diolan layàá a ba paalen le can-ndo, layàá a ba luaŋ-ndo, layàá a ba too a layàá a ba paalen le del-lo.

¹⁴ O powtan tɔ́ a latiɔn coo kpaki kobi kalaa ndóò kilan ni, diola kilaa tɔ́ a à ŋiɔŋaa Saa téndóó la va lasɛvaalan o powta lan coo.

¹⁵ Vana va sɔɛi o ya lo-o ndóò nɔ ɲɛ tuvaa pum, kpɛ̀ndɛ̀le n'sianilen, le kobio, diola ndɔla luɛyaalan a kpaki ndɔɔ tuuvo.

¹⁶ Maa kpakpa kobi kalaa va ni, bu ndɔɔ a bandii ndɔɛi va kpen-kpen. Mó tuu kobi kalaa a kpɛ̀ndɛ̀le len: mó fula bandei kpɛ̀ndɛ̀le len vaalan tɔ́ a latiɔn, lende koni helɔɔ ndɔɔ a bu ndɔɔ va ni.

¹⁷ Mó tuu kpakio, mó fula dunndo kɛmɛ belehiɔɔlu a lehiɔɔlu. A ɲɛ vanndacieea ndáà tùù-o mɛlɛkanɔɔ tuu kobi kon ni.

¹⁸ A pow yaspe ndáà cɔw kpaki kalaa ni, kobio ndu, a sianin diandan, vanaa ce ndu pɛ aa siani diandaa ni.

¹⁹ Kpakila tumndan la va la kɛɛmiaa a powta báà kàlàla súú-súù ka: kpaki tum tasoo a yaspe, o diinndɔɔ a safir, o yàándɔɔ a kalsedoan, o hiɔɔlundɔɔ a emerɔd,

²⁰ o ŋuɛɛnundɔɔ a sardonis, o ŋɔmpumndɔɔ a sarduan, o ŋɔmmɛwdɔɔ a krisolite, o ŋɔmaandɔɔ a beril, o ŋɔmahiɔɔlundɔɔ a topase, o tɔ́ndɔɔ a krisoprase, o tɔ́ a ò pilɛndɔɔ a iyasɛnt, o tɔ́ a o diinndɔɔ a dametiste.

²¹ Diola luɛyaala tɔ́ a latiɔnndan la va yɔɔvala baala kalala tɔ́ a latiɔnndan ni. Falii kobi kalaa ndi, a sianin diandan i va ni, maa tofan vana tofa ma ce lekɔɔli-o.

²² I ci Cɛi-Hala o kobi kalaa nin te, kani Mɛlɛka Hala nɔ kpaayaa kpow-vo a Saa téndóó va Cɛi-Hala ndɔɔ ni.

²³ Kobi kalaa ndóò nɔ mako a lepaa te kon te a ipaangu le tengaa le, kani biilu Hala-o va ndu teengiaa, Saa téndóó va fitina ndɔɔ ni.

²⁴ O ɲɛ-tengaa ndɔɔ vanaa-mangalaa-isɔɔa vanin kelaa ni, mì masaa co o lɛŋnden coo-a hin a sul ndaa lon.

²⁵ Niinoo kpɛŋ vana kindanin diola kobi kalaa le, kani ɲumma venin te.

²⁶ A vanin hunɔɔ lon a sul vanaa-mangalaa-isɔɔa a á bɛɛle ndalen.

²⁷ Ɲɛ-ɲɛ nɔɔlɛi lueinin ndon te, vana lamàà a vana lacòòvaa lueinin ndon te, fɔ vanaa diola ndalan la sɛvan o sɛbɛ yoomaa Saa téndóó nin-nda kínɛí.