Dɛnnda cɔɔmuanndan 2 - BII BILA

Sɛbɛ sɛvan le vanaa laalannda Efɛs-o

¹ Sɛval mɛlɛkanɔ vanaa laalannda Efɛs aa: «Ɲɛ vana nɔ loeon ŋɔmmɛwvon o ba ndɔ kɛndɔɔ-o, o co balɔɔ o ɲɛla-kɛsiaa-lafitinala ŋɔmmɛwla n'sianilan tɛɛn-ndo dimi-o co hoo ni aa:

² ‹I sínà dɛnnda nɔmndan, baala nɔmndo a biuvɔn nɔmndo. I sínà maa a cɛl vanaa vɔɔnda le. A soli vanaa co nda pila veelɔnndo aa kilaa kɛ nduyɛ a co n'kiila le kɔlɔ, mà ca maa vanaa lacòòvaa nda co ni.

³ Vana biwnanndo n co ni, a yulu sangaa le diola nilan, a vi n'dial te.

⁴ Kɛ i hini kɔl a nɔm te, a mal kaola tase nɔm óò nɔ-o.

⁵ Lelan loonun a nɛɛ n va lɔ́ɔ́ pá ma del-la, mangalan mà tosa dɛnnda n va tosaa o tasendɔ lan. Te o co kon te, i hunnin o nɔm ndo, mì faŋa ɲɛ kɛsiaa lafitina nɔmndo o fonda ndɔɔ. Fɔ dɔ́ɔ́ ma mangalan dɛ!

⁶ A nɔ ɲɛ pum, o naŋ-ndo: dɛnnda Nikolaia la nɛinun nɔm maa mɛɛ la nɛinun ya pila yɛ.

⁷ Vana nɔ pɛ nilan, mɛɛ ndú tuéi ɲɛ Kɔl-Diandaa co kundala vanaa laalannda dimullo-o. Vana nɔlanin-ndo, i kenin ndu kɔmnde yɔm ciindaa le dioo, yɔm cindaa co o nakɔ Hala-o nin-ndo pɛɛn.›»

Sɛbɛ sɛvan le mɛlɛkanɔɔ Smirne-o

⁸ «Sɛval mɛlɛkanɔ vanaa laalannda Smirne aa: ‹Ɲɛ vana co vana tasoo a vana mɛɛlaa-o, vana ndóò vi mó muungu yoomu-o dimi-o co hoo ni aa:

⁹ I sina dɛnɛ palaa nɔmndo a pɛŋnde nɔmnden, kɛ o kpeekpeiyo nin, vana bolofaa n co ni! I sina mɛɛ vanaa co N'Yuifi le-a kɛ ma va veelɔnndo aa Yuifia-a a co nɔm congulan yɛ, kunda Setana-o vanaa kan co ni.

¹⁰ Siòòŋii bii nɔm le sanga n hun sɔlanin-ndo le. Masa ɲinaa vɔɔnda malnin vanaa pum niaa tɛɛn o kaasoo le niaa kɔlɔɔ solio, mì la sɔla sangaa le palɛi tɔ́. Lo o nɛiyo coo háá ma vi, i yɔngunin nɔm mɔsil yoomaa.

¹¹ Vana nɔ pɛ nilan, mɛɛ ndú tuéi ɲɛ mɛlɛkanɔɔ co vanaa laalannda dimullo-o. Piɔ́m diinndɔɔ pilannin vana nɔlanin-ndo le.›»

Sɛbɛ sɛvan le mɛlɛkanɔɔ Pɛrkam-ndo

¹² «Sɛval mɛlɛkanɔɔ vanaa laalannda Pɛrkam aa: ‹Ɲɛ vana nɔ mɔɛi cɔvii sondola tiɔɔŋii cɛɛŋɛi o ba-o dimi-o co hoo ni aa:

¹³ I sina nɛɛ calta nɔmndan la co-a, nɛɛ kpɛŋɛ lemasa Setana-o co-a pɛɛn. Kɛ ma lo o yiinanndo a ya ɲɛkɛndɛi. A mel laalan n laalan ya-o le, hali o palɛi Antipas-e, sei lo o lediom coo a ya-o, o nda dii o niaa lo-o, nɛɛ Setana co-a.

¹⁴ Kɛ nduyɛ, i nɔ ɲɛ pum o kɔl a nɔm: A nɔ vɔ vannda pum, a co a yiinannda a pɛɛku Balaam-ndo-a. Ndu pɛɛku Balak ni maa o tosà o nɛi oo nɛi coo mì cuavaa Israɛlla mal nɛiyo, mà de visin nda solul piɔmnda sálàá-on, mà tosa dɛnnda laasiɛilan.

¹⁵ Lende koni nɔm bɛɛ nɔ vannda pum o nɔm ndo ni, a co kelaa o pɛɛkula Nikolaia coo-a.

¹⁶ Lelan mangalan, te o co kon te, i co lakɔ o nɔm ndo sunsun, mì kɔ cɔlɔba nda a mɔɛi cɔvii co ya fulaa o sondo-e.

¹⁷ Vana nɔ pɛ nilan, mɛɛ ndú tuéi ɲɛ Kɔl-Diandaa co vanaa laalannda dimullo-o. Vana nɔlanin-nda, i kenin ndu manne vianaa a pow humboo, pow diola sɛnɛila lasɛvaa coo-o, vana-vana sina diola lan te fɔ vana sɔla lan-ndo.›»

Sɛbɛ sɛvan le mɛlɛkanɔɔ vanaa laalannda Tiatir-o

¹⁸ «Sɛval mɛlɛkanɔ vanaa laalannda Tiatir aa: ‹Ɲɛ Po Hala-o, o nɔ hɔltan maa yinnde biyaa, mì pelon va ndu volio maa n'daɲa-o dimi-o co hoo ni aa:

¹⁹ I sínà dɛnnda nɔmndan, kaola nɔmndo, laalan nɔmndo, kpekula n soli vana lan, biuvɔn nɔmndo a dɛnnda nɔmnda mɛɛlaala hiow vaa sɛ́lɛ́ a lataselan-ndan.

²⁰ Kɛ sɔɛi ya hini kɔl a nɔm tei co hee ni: a co Yesabɛl, cua co veelɔnndo aa vana-tɛɛngaa-diom Hala-o-o malɔɔ vannda pɛɛkoo, mò va vanaa nia baalaa faŋaa o nɛi, haliko ma luɛi laasianndo, mà luɛi vɛlɛ visin nda solul piɔmnda sálàá-on dioo.

²¹ I ke ndu telenndo le mangalanndo, kɛ o yeema mò mangalan, mò faŋan laasian ndɔ kon te.

²² Tofa vɔ, i co ndu ɲindɔɔ o kpele, nda vanaa suunda a ndu-a latulu o sanga bɛndu-bɛndoo nin. Fɔ dɔ́ɔ́ mà mangalan, mà mal dɛnnda ndɔlan dɛ!

²³ I tuisinin cuavaa ndɔa piɔ́mndo coo. O kon, kundala vanaa laalannda kpow a sinanin maa ya co vana yaasiaa yiyanndan a kɔltan-ndo ni. I mingulnin vana-vana o niaa tɛɛn mɛɛ dɛnnda ndɔlan la co yɛ.

²⁴ Kɛ niaa vanaa tɔ̀a kɛ́-kɛ̀ lo Tiatir lá vow n'pelu o pɛɛku kon nin te-a, maa mɛɛ nda pila dimi yɛ, niaa síná yingila dɛnnda Setana lan te-a, i co niaa dimul, i siiluu lɛnin niaa volɔɔla celen te.

²⁵ Kɛ nduyɛ, o niaa nɔ-o, la bii kon kpíŋ háá mi hin.

^26-28 Vana nɔlanin-ndo, vana mandanin dɛnnda nilan háá mi hin-ndo, i kenin ndu kpaaya ya pila sɔla Fuɲa nuu o ba-o. I yɔngunin vana kon kpaayaa vanaa-mangalaa-isɔɔa coo, mò tosa masalen nda coo a kpaayaa, mò pesipesi nda maa kpɛɛnɛi puulu. I kenin ndu vɛlɛ loei idii-ye.

²⁹ Vana nɔ pɛ nilan, mɛɛ ndú tuéi ɲɛ Kɔl-Diandaa co kundala vanaa laalannda dimullo-o.›»