Dɛnnda cɔɔmuanndan 19 - BII BILA

¹ O kon kɔɔli, mí tuɛi ɲɔɔ maa diom sɛ́lɛ́ bɛndu o halataala, mo va dimio aa: «Halelu-ya! Cindaa, biiloo a kpaayaa co le Hala naa,

² kani yaman ndɔn co yaman toɲa, n sandu. O kelu vanalanɔ suundɛi va lɛŋnden lueiyo o laasian ndɔɔ nin-ndo iyama, o mingi màá le vanaa ndɔa baalaa nda diw lon-nda.»

³ Má dimi vɛlɛ o kon kɔɔli aa: «Halelu-ya! Màá kumii kobi ŋɔɛ-o va helɔɔ le fɛɛn a fɛɛn!»

⁴ Mí bɛndua yuuvɛiyaa bidiin a à hiɔɔlua a ɲaa yoomaa hiɔɔlua baŋ vulan, má biilu Hala, o co icali o kpɛŋɛ lemasaa ndɔɔ nin-ndo, má dimi aa: «Amiina! Halelu-ya!»

Ɲɛdiaa kafo lanɔ sɛnɛi Saa téndóó

⁵ Mí diomndo pum fula a ba kpɛŋɛ lemasaa aa: «La lisà Hala naa, niaa kɛ́-kɛ̀ co vanaa ndɔa baalaa, niaa vanaa co ndu bɛɛlen keu-va, cuaambɔa a kaasonnda.»

⁶ O kon mí tuɛi diomndo maa diom sɛ́lɛ́ bɛndu, maa diom mɛmma bɛndu, vanáà tuei vɛlɛ pɛ aa diom mataŋ bɛndoo ni, mó va dimio aa: «Halelu-ya! Kani Mɛlɛka Hala naa, Vana-Kpaayaa-Kpow co masalen tosaa.

⁷ N dɔwnun ɲaale mì n vannun a kɔlkɛndɔɔ, mì n kennun ndu biiloo, kani kafo yiyaa nɔu tiiya le Saa téndóó, laa ndɔ kalaa cii bɛɛndian.

⁸ A yɔngu ndu volɔɔla cuɛinannda kola keese fɛtufɛtu lan, kola keese fɛtufɛtu ŋɛlɛngi-ŋɛlɛngio pɛɛn.» (Kola kon co yɛ dɛnnda sandaala vanaa diandaa Hala-a ni.)

⁹ Mí mɛlɛkanɔɔ dimul-la aa: «Sɛva aa: ‹Dɛnɛ kɛndɔɔ co le nda, vanaa sɔla veeloo le ɲɛdiaa kafo yiyaa nɔ Saa téndóó-a.› O kon mó dimul-la aa: ‹Sɔɔn toɲan Hala-on co mun ni.›»

¹⁰ Mí del ndu o pelon bɛngu le ndu biiloo, kɛ mó dimul-la aa: «Ɛ-ɛ, tosa lende le! Vana baalaa maa nɔm, a puapilɛ nɔm lo o toɲa Yeesu-o coo-o ya co ni. Hala n bɛnda ma baŋ vulan o labɛngunin ni!» Seile Yeesu len le co kɔl vanaa-tɛɛngaa-diom Hala-a ni.

Vana ɲaanan so hel o so humboo coo-o

¹¹ O kon mí ca halataalaa o kumbianndo, mí so humboo fula. Vana va lecoo-o diolan aa Vana toɲaa a Vana lo o lediom coo-o, o co yamɛi kiolɔɔ o sandei nin, mo va cɔlɔbaa.

¹² Hɔlta ndɔlan la va sandei maa leyin, mɔsilta lemasalan taw la va ndu o lebol. Ndóò nɔ diolan lapum lasɛvaa, vana-vana ndóò sina lan te, mɛɛ ndu pila.

¹³ Doma bɛndu nda yin o koovan nin-ndo va ndu lekɔɔ. Diolan ndu aa: «Sɔɛi Hala-e.»

¹⁴ Mí kundala vanaa cɔvaa co o halataala-a va ndu kɔlan kɔɔli o soa humbua coo, volɔɔla toosian a kola keese humbu fɛtufɛtu diandaa lan la va nda lekɔɔ.

¹⁵ Mɔɛi cɔvii luɛyɛi va fulaa ndu o sondo le vanaa-mangalaa-isɔɔa diwvo a ndi. O tosanin nda masalen coo a sionnde icilinnden, mó vayia rɛsɛnndon o doola kɔltuw bɛndu Hala, Vana-Kpaayaa-Kpow-vo nin.

¹⁶ Diolan lapum la va lasɛvaalan ndu o doma bɛndoo coo a ndu o lɔloo coo aa: «Masa hiow masaa-o a Vana bɛndu hiow vanaa bɛndua-o.»

¹⁷ Mí ca mɛlɛkanɔɔ pum isisi o paalen nin. Mó yondal yovaa va kelaa coocoo-a kpélén aa: «La hun mì la cuungian le ɲɛdiaa bɛndu Hala toosiaa-o,

¹⁸ haliko mi la de visin masaa, visin simlacia vanaa cɔwva, visin vanaa kpaayaa, visin soa a visin vanaa co o soa coo-a, visin vannda kpow, vanaa co o ba ndaa coo-a a cɛa, cuaambɔa a kaasonnda.»

¹⁹ Mí ca visio, masaa co o lɛŋnden coo-a a vanaa ndaa cɔwva, a va a cuungiannda le vana va o sow coo-o a vanaa ndɔa cɔwva kuello a cɔwvo.

²⁰ Má bii visi kon a vana-tɛɛngaa-diom hala lacòòva tosa ndu dɛnnda kaamaalan o hɔl-lo. A dɛnnda kaamaala lan vana-tɛɛngaa-diom hala kon luei vanaa sɔla pondale visi kon-nda a vanaa baŋ vulan tuula ndɔɔ o hɔl-la o pɔwlan nin ni. Mí visi kon a vana-tɛɛngaa-diom hala kon viawnun o dala leyinndo nin, nɛɛ fungoo co ŋɔu-va.

²¹ Mí vanaa cɔvaa ndaa tɔ̀a kpow a sɔla piɔ́mndo o mɔɛi cɔvii va fulaa vana va o sow coo-o o sondo-e bɛngu, mí yowva kpow a cuungian o visin ndan coo.