Dɛnnda cɔɔmuanndan 18 - BII BILA

Babilɔn ciee bɛndoo del

¹ O kon kɔɔli, mí ca mɛlɛkanɔ celen tolɔɔ fulaa o halataala, ndóò nɔ kpaaya lemasaa taw, mí lɛŋnden le tenga a biilu ndɔɔ.

² Mó deŋi aa: «O del fɔ́! Babilɔn bɛndoo del! O siŋnun calta ɲinaa vɔɔnda, nɛɛ vana saalun ɲinaa nɔɔlɛyaa súú-súù ka-a, a fonda vana komal yovaa nɔɔlɛyaa nɛinun Hala-a-o!

³ Kani vanaa-mangalaa-isɔɔa kpow a kol mɔima kɔltuwma dɛnɛ laasiɛi ndɔɔ. Masaa co o lɛŋnden coo-a vow balan o dɛnɛ laasiɛi ndɔɔ nin, mì yulaa co o lɛŋnden coo-a sul a kpaaya co o bolofaa dɔ́ɔ́ nin-ndo.»

⁴ Mí tuɛi diom celen sɔɛi o halataala aa: «Vanaa nia sei, la fula lon, yɔŋii niaa vow balan o hakila ndɔlan nin, mì la sɔla sangaa niaa ndaa latulu.

⁵ Kani hakila ndɔlan la dengelan háá o halataala, mì Hala yiyan a dɛnɛ sandaa ndɔ lepɛŋndo.

⁶ La tosal ndu mɛɛ ndu tosal caanda yɛ, la mingul ndu dɛnnda o tosa lan vangalaa lediin. La bingulan mɔima nɛyaa-nɛyan súúlan tan tiɔn o taala ndu va caanda talallo-o nin.

⁷ Mɛɛ o kelun yongaa o kɔl, le tùú o va o ɲɛ kɛndɛ ndóò handu kɔllo coo-o nin-ndo yɛ, lende koni niaa tuisi ndu dɛnɛ palaa coo, mì la luei ndu mɔnɛi. Kani o co diminndo o kɔl nin aa: ‹Sɔngɔ masa koni ya cal nanu ni, i co vanalanɔ pɔnɔ vi le, lelan dɛnɛ palaa kɛ́-kɛ̀ komalnin ya le.›

⁸ Ɛ̀ɛ̀ nduyɛ, le ken kpeekpei dɛnnda palaala kelun le ndu lan la toalnin ndu coo o lepilɔɔ o paalen ten pilɛ bɛngu ni: nàà piɔmndo, biisilan a yima fofolan, o kon mò ŋɔɛ o yinnden nin. Kani vana kpaayaa Mɛlɛka Hala kelu ndu iyama-o co ni.»

⁹ Masaa kɛ́-kɛ̀ co o lɛŋnden coo, má del ndu kɔɔli o laasianndo a o ɲɛm ndɔn kɛndɔn nin caŋnin mà cɛɛŋun le ndu telen nda canin kumnde helɔɔ o ndu lomɔɔ-o.

¹⁰ A simnin kɔɔli-kɔɔli a siòòŋii dɛnɛ palaa ndɔɔ, mà dimi aa: «Kpòkóó! Má cè dɛnɛ dɛ́! Éé Babilɔn, nɔm kobi bɛndu kpaayaa ho! O lɛɛlɔɔ ndu pilɛ kpé bɛngu yamɛi nɔmnde kiolu ni!»

¹¹ Yulaa co o lɛŋnden coo-a a co yeelan, mɔnɛi i co nda biyɔɔ le ndu, kani vana co lɛ vɔngula ndalan piondɔɔ le,

¹² sianion, volin latámán, powta báà kàlàlan, yɔɔvala báà kalalan, kolala keesela fɛtufɛtulan, kolala keesela siaŋala sɔɔtɔtɔlan, kolala nda toosiaa a pamboei lan, kolala siaŋala vólotótolan, yɔmii kendu saalɔnnde, ɲɛla kɛ́-kɛ̀ nda toosiaa a ciŋun kamaa, la kɛ́-kɛ̀ nda toosiaa a yɔmii báà kalɛi, la nda toosiaa a daɲan-ndan, la nda toosiaa a cilinndon-ndan a la nda toosiaa a powta ŋɛlɛngi-ŋɛlɛngilan-ndan,

¹³ kamadolaa, ɲɛm cun kɛndɔn, ansan, mirte, mɔiyan, cuɛiyan, kpeyanndo, maalon, nawva a saa laandua, soa, ɲɛla ɲaanannda soa nan-ndan, cɛa a vanndacieea yoomaa.

¹⁴ Ɲɛm kɔl nɔmndo va yeema-on kɔɛ nɔm levil, ɲɛm sɔvɛɔn a n nɔ ɲamaa-on hɛlun nɔm, vana ci lɛnin mun le fɛɛn a fɛɛn te.

¹⁵ Yulaa o suili a bolofaa o yulalen-nda simnin kɔɔli-kɔɔli a siòòŋii biinin nda a dɛnɛ palaa ndɔɔ-e, mɔnɛi biinin nda mà caŋ.

¹⁶ A diminin aa: «Kpòkóó! Má cè dɛnɛ palaa le kobi bɛndoo ho! Kobi va hoo o cuɛinanndo a kola keese fɛtufɛtoo, kola siaŋa vólotótoo, a kolala siaŋala sɔɔtɔtɔɔlan-ndo, o va hoo o kɛɛmiaa a sianion, a powta báà kàlàlan a á yɔɔva kɛndɛ-kɛndɔɔ-o kɛí dɛ!

¹⁷ Ndu bolofaa ndɔ bɛndoo tambu o telen bingi-bingio bɛngu nuaa ni!» Mí vanaa kɔa a dɛ̀ndɛ̀la bɛndulan o mɛnndan coo-a, vanaa dɛ̀ndɛ̀lan la cua mì la yɛɛ nda o fondala yɛ́-yɛ́lan-nda, vanaa tosa baalaa o dɛ̀ndɛ̀lan nin-nda a vanaa-vanaa tosa vallo o mɛmma ihɛllan coo le balo ndaa sɔlaa a va isisi lándán.

¹⁸ Telen nda va kumii va cɔnɔnndo telen kobi kalaa va ŋɔw-ve tofaa-o, má va deŋio aa: «Kabi bɛɛ kobi yɔŋnun maa kobi bɛndoo ho le!»

¹⁹ Má va loolio dɔwnɔnndo o lebol, má va caŋndo a mɔnɛi biyɔɔ a deŋio aa: «Kpòkóó! Dɛnɛ palaa co hoo ni dɛ! Kobi bɛndu ke hoo vanaa ladɛ̀ndɛ̀a va baalaa o mɛmma ihɛllan coo-a kpow tɔnɔɔ a bolofaa ndɔɔ-o cuu itambu o telen bingi-bingio bɛngu!»

²⁰ Nɔm halataala, dɔwnun ɲaale le tambii ndɔɛi! Niaa vanaa diandaa, niaa kiilaa a niaa vanaa-tɛɛngaa-diom Hala-a, la dɔwnun ɲaale! Kani Hala ke niaa di le dɛnɛ palaa kobi kon ndóò tuisi niaa coo-o.

²¹ O kon mí mɛlɛkanɔ kpaayaa pum cua pow va maa ciei lusulaa bɛndu-o, mó mal ndu o mɛmma ihɛllan nin, mó dimi aa: «Nuaa Babilɔn kobi bɛndoo viawnunnin fakolo ni, o kon vana ci lɛnin ndu le.»

²² O kon vana tui lɛnin vanaa lɔaa labangaa, vanaa ɲɛ-caa, vanaa hɔŋaa masɛ̀ŋnda a vanaa hɔŋaa labulua diom lon te. Vana seelun ndɛnin vana baala laba kɛ́-kɛ̀ lon te, vana tui lɛnin diom iciee lon te.

²³ Vana ci lɛnin ɲɛ-tengaa fitina lon te, diom vana cua lanɔɔ sɛnɛi-yo te kon te vana cal o nɔu sɛnɛi-yo tuinun ndɛnin ndon te. Kani yulaa ndɔa va vanaa bɛndua o lɛŋnden coo ni, mí vanaa-mangalaa-isɔɔa kpow a luɛi o pɔwlan nin a kueile nɔmnden.

²⁴ Babilɔn ndon nda saalun kooma vanaa-tɛɛngaa-diom Hala-a ni, ma vanaa diandaa a kooma vanaa-vanaa nda kelu bololan o lɛŋnden coo-a-an.