Dɛnnda cɔɔmuanndan 17 - BII BILA

Sɔɛi dimin a cua suundɛiyo o kɔɔ-e

¹ O kon mí mɛlɛkanɔɔ pilɛ o mɛlɛkaa ŋɔmmɛvaa ndáà nɔ taalala kólaala ŋɔmmɛwlan nda hun, mó soaa o ya lo, mó dimul-la aa: «Hun mì cɔm nɔm yamɛi co cua suundɛi bɛndu co icali o mɛmma bɛnduan kɔngɔ-o cumndo-e.

² Masaa co o lɛŋnden coo-a a co suundaa a ndu, mɔima suunda ndɔɔ ma bii vanaa co o lɛŋnden coo-a.»

³ O kon mó kɔa a ya o kɔllo nin o lɛŋnde veselɛilen nin. Mí ca vanalanɔɔ pum icali o visi siaŋa sɔɔtɔtɔɔ coo, kɔɔle visi kon le va le pooɲɛilen poosoo a sɔɔn tanan, ndóò nɔ bolle ndii ŋɔmmɛw a leelan tɔ́.

⁴ Kola keese siaŋa sɔɔtɔtɔɔ va vanalanɔ kon lekɔɔ, mó kɛɛmian a sianion, powta báà kàlàlan a yɔɔva báà kalaa. Taala kólaa n'siani va ndu o ba-o va o piaa cá a mààlan, la o sɔla o suundaa lan.

⁵ Diolan lapum la va lasɛvaalan ndu o itendu, diola kɔndɔfiltan pila aa: «Babilɔn bɛndoo, kalaa vanlaandua suundɛiya a mààla co o lɛŋnden coo lan.»

⁶ Mí ca vuɛɛn kon, kooma vanaa diandaa a kooma seyaa Yeesu-a maa bii ndu maa mamɔi. Yáà delɔɔ ndu hɔlten, mí kɔndɔfili bɛndoo bii ya.

⁷ Mí mɛlɛkanɔɔ ɲuna ya aa: «Le yɛɛ nɛ n dɔwnun yɛ kɔndɔfili? I cɔmnin nɔm kɔlɔ vuɛɛndo ho a kɔlɔ visi o cal ho coo a bolle ndii ŋɔmmɛw a leelan tɔ́-o.

⁸ Visi n ce hoo-o va paandu, kɛ o co lɛ le. O co helɔɔ mò fula o soondo nin, mò kɔɛnnun o ɲánndávàà. Mì vanaa co o lɛŋnden coo, diola ndalan la sɛvan o sɛbɛ yoomaa nin kabi o ceendo kandɔnndo le-a dɔwnun kɔndɔfili le visi kalaa cɔu, kani o va paandu yoomu, kɛ o co lɛ le, o kon kɔɔli mì fula vɛlɛ.

⁹ Nanu ndu, mɛɛ mì vana nɔ kɔlkaloo a taasio: bolii ŋɔmmɛwve co pembun ŋɔmmɛvun cuaa ho co icali coo-on ni.

¹⁰ Ndi co vɛlɛ masaa ŋɔmmɛwva ni: a ŋuɛɛnua a del, o pilɛ co yoomu, o pilɔɔ ndu hin ndɔ le. Tuma o hunnin-ndo, telen bingi koni o bɛnda le tosaa ni.

¹¹ Visi va paandu o co lɛ loo, ndu visi kon kpeekpei co masa ŋɔmaandɔɔ ni, o co vɛlɛ o pilɛ o a ŋɔmmɛwva tɛɛn, mo va kɔnndan o ɲánndávàà.

¹² Leela tɔ́la n ce lan, masaa tɔ́a co kan ni, a sɔla vɔ lemasa le-a. Kɛ a tosanin masalen a visio latulu le lɛɛlɛ pilɛ.

¹³ Yiyannda pilɛlan kpé nda nɔ ni, yiyan kon co le visio kpaaya ndaa a masale ndalen yɔngoo ni.

¹⁴ A cɔlɔbanin saa téndóó, kɛ mì saa téndé kon nɔla nda, kani ndu co vana bɛndu vanaa bɛndua a masa masaa ni. Vanaa sɔla veeloo-a, a sɔla hɛlio-a a vanaa lo o lediom coo-a vanin latulu a ndu, mì nda bɛɛ nɔla ndu.»

¹⁵ Mó dimul-la aa: «Mɛmma n ce man mí cua suundɛiyo ho va icali lecoo-an, man ma co vannda, sɛ́lɔ́ɔ́, vanaa-mangalaa-isɔɔa a vanaa soaa sɔɔn yɛ́-yɛ́ɔn-nda ni.

¹⁶ Leela tɔ́la n ce lan a visi kon a nɔnin nɛyɔn vanalanɔ suundɛi kon, mà yunga ndu, mò lo fondo fúú. A dianin visin ndɔn, mà lom ndu o yin.

¹⁷ Kani Hala mal nda o kɔl le yiyan ndɔɔ tosaa, mà nɔ yiyannda pilɛlan le visi kon masale ndalen yɔngoo, háá mi sɔɔn Hala dimi-on peelun.

¹⁸ Vanalanɔ n ce-o, ndu co kobi bɛndu co masalen tosaa masaa co o lɛŋnden coo-a coo ni.»