Dɛnnda cɔɔmuanndan 11 - BII BILA

Seyaa ŋiɔnda

¹ Má yɔngu ya kpɛ̀ndɛ̀len, vanaa ce pɛ len aa sionnde tuvaalen ni. Má dimul-la aa: «Cɔn ma tuu Cɛi-Hala-o a fonda-loamaa-lasálàá, mà cɔm vanaa co biiloo lon-nda.

² Kɛ tongo Cɛi-Hala-o ndu, mɛi ndu lende, tuu ndu le, kani ndu yɔngun vanaa-mangalaa-isɔɔa niɛwnin kobi diandaa o paangon belehiɔɔlu a n'miuun bɛngu-a ni.

³ I viamnin seyaa nia ŋiɔnda, a vanin a volɔɔla dɛnɛ palaalan lekɔɔ, mà tɛɛnguu diom nda sɔla Hala o ba-o o palɛi vàá pilɛ kɛmɛ lediin belaŋɔmpumii (1 260) ken bɛngu.»

⁴ Nda co oliviee ŋiinde a ɲɛla-kɛsiaa-lafitinala tiɔnnda co lakɛsiaa Mɛlɛka nɔ lɛŋnden o ba-o o hɔl-tan ni.

⁵ Te vanndo yeema pɛ le nda saangiaa, yinnden le fula nda o lasondo, le lom yaamɔaa ndaa. Vana-vana tɔɔndan pɛ le nda saangiaa, mɛɛ mo sɔla piɔ́mndo lende.

⁶ A nɔ kpaaya nda kinda halataalaa, haliko piɔɔ sia o palɛi nda co va diom Hala-o tɛɛnguo-e bɛngu loo. A nɔ vɛlɛ o nda mangala mɛnndan koovan, mà tuisi dɛnnda palaala súú-súù ka o lɛŋnden coo telen nda yeema-o-o.

⁷ Telen nda ciinin seilen tɛnda-o, visi tɔɔma fulanin o soon yingilaa nɔ lamɛɛlu loo nin-ndo cɔlɔbanin nda, mò nɔla nda, mò diw nda.

⁸ Mà lo a vílɛ́iya o falii kobi bɛndoo, o nda veelu o letale nin aa Sodɔm a Esipte-o, lon kpeekpei nda baŋ vana nda bɛndoo o yɔm singafilaa coo ni.

⁹ Vanaa súú-súù ka, lepola oo lepola, vanaa-mangalaa-isɔɔa súú-súù ka a lelɛŋ oo lelɛŋ a tofanin dialun ndan le palɛi ndii yáá a tala. A cɛlnin mà kumbu nda o lasɛi nin te.

¹⁰ Vanndacieea co o lɛŋnden coo-a dɔawnunnin ɲaale le piɔ́m nda kon, mà tuisi kafolan, mà yɔngan ɲɔɔn vellaa-velle le tùú vanaa-tɛɛngaa-diom Hala-a ŋiɔŋaa kan a co vanndacieea co o lɛŋnden coo-a yɛɛvɔɔ dɔvɔɔ-o.

¹¹ Kɛ palɛi yaa a talɛi ken hiovɔɔ, mí hoeyii yoomuɛi pum hun fulaa o Hala lo, mí i luɛi nda nin, má can isisi. Mí siòòŋii bɛnduei bii vanaa va nda cɔu-va.

¹² Má tuɛi diom bɛndoo pum o halataala nda dimullo aa: «La hel nanu!» Má hel o halataala o yumbuyumboo nin, yaamɔaa ndaa va nda tofaa ciŋ.

¹³ O telen kon kínɛí, mí lɛŋnden le ɲiiya taw, mí kobio kpengei pilɛi komba. Mí vanndacieea vàálan tan ŋɔmmɛw a sɔla piɔ́mndo o lɛŋnde ɲiiyaale len nin, mí siòòŋii bɛnduei bii vanaa tɔ̀a, má ke Hala co o halataala-o biiloo.

¹⁴ Mí dɛnɛ palaa diinndɔɔ hiaw. Kɛ tofa vɔ, dɛnɛ palaa yàándɔɔ co nin le tiiya.

Bulu hɔŋaa ŋɔmmɛwndɔɔ

¹⁵ Mí mɛlɛkanɔ ŋɔmmɛwndɔɔ hɔŋ buloo. Mí diomnda bɛndulan la soaa o halataala aa: «Le Mɛlɛka naa a vana ndɔ o pɔla-o masalen o ceendo coo le co nin ni, o tosanin masalen le fɛɛn a fɛɛn!»

¹⁶ Mí bɛndua yuuvɛiyaa bidiin a à hiɔɔlua va icali Hala o hɔl o kpɛŋɛla ndala lemalan coo-a del a kuumbuan, má va Hala biiloo.

¹⁷ Má va dimio aa: «N mel nɔm balika, Mɛlɛka Hala nɔ kpaayaa kpow-vo, nɔm co-o, nɔm va-o, le tùú n cɛn a kpaaya nɔm bɛndoo, má cua masalen-ndo.

¹⁸ Vanaa-mangalaa-isɔɔa ndáà cɛn a yolɛi, mì kɔltuw nɔmndo cɔmnun, mì telenndo tiiya le yamɛi vanvílɛ́iya kiolɔɔ, le vanaa baalaa nɔmnda, vanaa-tɛɛngaa-diom Hala-a, vanaa diandaa a vanaa vo diola nɔmndan-nda, cuaambɔa a kaasonnda salaa, le vanaa co lɛŋnden tɛɛmbuuo-a tɛɛmbuuo.»

¹⁹ Mí Cɛi-Hala co o halataala-o kumbin, mí kesu kpema ndɔɔ cɔmnun vakpa o cɛi ndɔɔ nin. Ɲɔɔ va volio maa hala, mí vóólun-vóólunndo va sɔɛi, mí taŋndan ma va piɛndio, mí lɛŋnden le ɲiiya, mí loeon deli taw.