Dɛnnda cɔɔmuanndan 10 - BII BILA

Sɛbɛ pɔmbɔ simbulaa yɔngun Nsaŋ

¹ Mí ca mɛlɛkanɔ celen tolɔɔ fulaa o halataala, ndóò nɔ kpaayaa. Yumbuyumboo va ndu o balaa sɔ́. Ninginangaa ndóò kilan ndu yɛwve o lebol pindo, hɔlla va ndu maa lepala, mí pelun ndɔn va maa sungbuma leyin.

² Sɛbɛ pɔmbɔɔ pum va ndu o ba o kumbiaa. Mó kɛsi pelii ndɔɛi ba kɛndɛi o mɛmma ihɛllan coo, i ba mɛlle o lɛŋnden coo.

³ Mó va yondaa coocoo kpélén maa mɛɛ yàlà va kuuliaa. Ndóò yondaa, mí taŋndan ma deŋi man ŋɔmmɛw.

⁴ Mɛɛ taŋma ŋɔmmɛwma man ma deŋi, i va le ɲɛ ma dimi-o sɛvaa, kɛ mí tuɛi diomndo pum dimio o halataala aa: «Mandan sɔɔn taŋndan man ma dimi-on o kɔl, sɛva mun te.»

⁵ O kon mí mɛlɛkanɔ ya ce kon isisi o mɛmma ihɛllan a o lɛŋnden coo-o heelu ba kɛndɔɔ o halataala,

⁶ mó mɛnan o diola vana co yoomu le fɛɛn a fɛɛn-ndo lan, o cɔw halataalaa a ɲɛm co lenin-ndon, lɛŋnden a ɲɛm co lecoo-on, mɛmma ihɛllan a ɲɛ co lenin-ndo maa o ve lɛnin sɔɛi yom lɔ́ɔ́ le,

⁷ maa palɛi nda tuɛinin mì mɛlɛkanɔ ŋɔmmɛwndɔɔ kanndu buloo hɔŋndo-e, dɛnɛ kaamaa Hala-o peelunnin, maa mɛɛ ndóò dimul vanaa ndɔa baalaa yɛ, vanaa-tɛɛngaa-diom Hala-a pɛɛn.

⁸ O kon mí diom yáà tuei kon fulaa o halataala-o soaa vɛlɛ o ya lo, mó dimul-la aa: «Kɔ bii sɛbɛ pɔmbɔ kumbiaa co hoo mɛlɛkanɔ co isisi o mɛmma ihɛllan a o lɛŋnden coo-o o ba.»

⁹ Mí kɔa kpengii mɛlɛkanɔɔ va-e, mí dimul ndu le ya sɛbɛ pɔmbɔ kon yɔngoo. Mó dimul-la aa: «Bii ndu mà de. O lolnin nɔm o dembe kélélé, kɛ nɔm o sondo, o yeelanin yé-yé maa malɛ.»

¹⁰ Mí bii sɛbɛ pɔmbɔ kon mɛlɛkanɔɔ o ba, mí dia ndu. Mó yeela ya o sondo yé-yé maa malɛ, kɛ yáà miolɔɔ ndu, mó kɔ lol-la o dembe kélélé.

¹¹ O kon má dimul-la aa: «Fɔ ma tɛɛnguu vɛlɛ diom Hala-o a ɲɛ ndu Hala tuu le tosaa le vanaa-mangalaa-isɔɔa bɔɔ-bɔɔ, lɛŋnde, sɔɔn mangalan a masaa-o kɔɔ.»