Dɛnnda cɔɔmuanndan 1 - BII BILA

Sɔɛi tasei

¹ Dɛnnda viannannda cɔmnun Yeesu kpendekele lan la co o sɛbɔɔ ho nin ni. Hala cɔm ndu lan haliko mo cɔm buɛyaa ndɔa dɛnnda co hunɔɔ tosan o telen bingi bɛngu lan. Mí Krista viam mɛlɛkanɔ ndɔɔ o Nsaŋ buɛi ndɔ lo, haliko mo kɔ cɔm ndu lan.

² Nsaŋ co seiyo ni, maa toɲaa ɲɛ-ɲɛ o ce o sɔɛi Hala-e a o dɛnɛ Yeesu Krista-o o kɔɔ-o yɔŋnun ni.

³ Dɛnɛ kɛndɔɔ co le vana co sɛbɔɔ ho dimio-o, a le vanaa co sɔɔn fula mun Hala o ba, mì n va n sɛvaa o sɛbɔɔ ho nin-ndon tueyɔɔ ma va mun biyɔɔ-a. Kani telenndo sɔɔnguu kpɛɛlun.

Yilɔɔlan le vanaa laalaŋaa co o kobila ŋɔmmɛwlan nin-nda

⁴ Ya Nsaŋ co vanaa laalaŋaa co o kobila ŋɔmmɛwla co o tàndá Asii-o nin-ndan sɛvallo ni: Màá kɛndɛi a kɔlɲuloo yɔngun niaa fulaa vana co-o, ó va-o a vana co hunɔɔ-o o ba, fulaa kɔlta ŋɔmmɛwla co o kpɛŋɛ ndɔ lemasaa hɔl-ndɔ lan,

⁵ a Yeesu Krista, sei toɲaa, o velun tase vanvílɛ́iya tɛɛn, mó va masa masaa o lɛŋnden coo kpow-vo o ba! Vana kaola naa mó baŋa naa a kooma ndɔan, mó cii hakila naalan-ndo,

⁶ o siinguu naa kunda lemasaa a vanaa-solia-lasálàá le Hala Fuɲa ndɔ-o pɛɛn. Màá biiloo a kpaayaa va le ndu le fɛɛn a fɛɛn! Amiina.

⁷ Tofa vɔ, o co hunɔɔ o yumbuyumboo nin. Vana-vana canin ndu, hali vanaa cuku ndu-a, vanaa-mangalaa-isɔɔa o lɛŋnden coo kpow a cɛɛŋunnin le ndu. A toɲa, lende i yɔŋnunnin ni. Amiina.

⁸ Maalii, Hala-Nɔ-Kpaayaa-Kpow-vo dimi aa: «Ya co Alfa a Omeka ni, vana co-o, ó va-o a o co hunɔɔ-o.»

Nsaŋ ce Yeesu o vundulen nin

⁹ «Ya co Nsaŋ ni, puapilɛ niaa co o dɛnɛ palaa pilɔɔ nin, o masale pilɛlen nin a o biuvɔn pilɔɔ nin a niaa o Yeesu nin-ndo. Le sɔɛi Hala-e a le seile Yeesu len, i va o ɲaanɔnndo nin o lɛŋnde co o mɛnndan tɛɛn-nden nin Patmɔs .

¹⁰ Mí Kɔl-Diandaa cua ya o paale Mɛlɛka len coo, mí tuɛinun diom bɛndoo kɔɔli maa diom bulu,

¹¹ mo va ya dimullo aa: ‹Sɛva ɲɛ n co cɔw-vo o sɛbɔɔ nin, mà yoo kundala ŋɔmmɛwlan ndan: Efɛs, Smirne, Pɛrkam, Tiatir, Sarde, Filadɛlfii a Laodisee.›

¹² Mí mulin le diom va kon sɔɛi o ya lo-o sinaa. Yáà mulinndo, mí ca ɲɛla-kɛsiaa-lafitinala n'sianilan tan ŋɔmmɛw,

¹³ ɲɔɔ pum va isisi o ɲɛla-kɛsiaa-lafitinala lan tɛɛn maa vanaciee. Doma va ndu lekɔɔ-o ndóò tol háá o pelon, a yáwle n'sianilen o takpa.

¹⁴ Bollen a yiinde ndu o lebol i va ihumbu maa fengbɔ, vana ca kaa hala humboo ni. Hɔltan la va ndu maa yinnde biyaa,

¹⁵ pelon maa daɲan diw o yin-ndon, diom ndɔɔ maa diom mɛmma bɛndu.

¹⁶ Loeon va ndu o ba kɛndɔɔ mún ŋɔmmɛw, mɔɛi sondola tiɔɔŋii cɛɛŋɛi va ndu fulaa o sondo, hɔlaa ndɔa va volio maa paale kala ŋama-ŋama.

¹⁷ Mɛɛ ya ce ndu, mí del ndu o pelon bɛngu maa vana vílɛ́i. Mó handu ya ba ndɔ kɛndɔɔ coo, mó dimi aa: ‹Siòòŋii bii nɔm te! Ya co vana tasoo a vana mɛɛlaa ni.

¹⁸ I co yoomu. Yáà vi, kɛ tofa vɔ, i co yoomu le fɛɛn a fɛɛn. Kiin piɔ́mndo co ya o ba, kiin ciee-piɔ́mndo pɛɛn.

¹⁹ Lelan sɛva ɲɛ n ce-o, o n co cɔu-vo a ɲɛ hun yɔŋnunnin o kon kɔɔli-o.

²⁰ Loeon ŋɔmɛvun n ce ya o ba kɛndɔɔ-on a ɲɛla-kɛsiaa-lafitinala ŋɔmmɛwla n'sianilan, kɔlɔ ndɔ viannanndo co hoo ni: loeon ŋɔmmɛwvon, mun co mɛlɛkaa kundala ŋɔmmɛwla vanaa laalannda ni, ɲɛla-kɛsiaa-lafitinala ŋɔmmɛwlan yɛ, lan la co kundala ŋɔmmɛwla vanaa laalannda ni.›»