Filemɔn 1 - BII BILA

Yilɔɔlan

¹ Ya Pol, ya co hoo o kaasoo le Krista-o, a Timote puapilɛ naa, n co sɛbɔɔ ho sɛva ni. Le nɔm Filemɔn caan naa hɛnan naa taw-vo, ò naa n co baala pilɔɔ tosaa naa ndaa-o,

² a Apia yema naa, a Arsipe, o naa n co cɔlɔbaa latutu le sɔɛi pilɛi-yo, a le vanaa laalaŋaa co o nɔmndo cɛinin-nda.

³ Màá Fuɲa naa Hala nda Maalii Yeesu Krista yɔngu niaa dɛnɛ kɛndɔɔ a kɔlɲuloo!

Pol mel Hala balika le kaolaa a le laalan Filemɔn-ndo

⁴ Telen oo telen ya va pɛ piɛilen, i yiyan nɔm coo, i mel Hala nuu balika.

⁵ Kani i co tueyɔɔ mɛɛ n laalan Maalii Yeesu, má kaola vanaa laalannda kpow yɛ.

⁶ I co Hala piɛiyo haliko mi laalan pilɛ naa n nɔ naa niaa-o cɔmnun o dɛnnda nɔmndan nin, o kon mà sina dɛnnda kɛndɛla kɛ́-kɛ̀ naa n co sɔlaa o Krista nin.

⁷ Puapilɛ nuu, i dɔwnun ɲaale taw mí sɔla yoomuan a kaola nɔmndo, kani a tosa mí vanaa laalannda ɲulul kɔltan.

Pol tɛɛlun Onesime

⁸ Lelan, hali i nɔ bɛɛ dí nuaa taw o Krista nin le nɔm dɛnnda n nɔ le tosaa lan dimullo,

⁹ o co fisa mì dimul nɔm le kaola co naa tɛɛn vellaa-velle-o. Kani ya Pol, i yuuva, handɔɔ o kon coo, i co sunsun o kaasoo le Yeesu Krista,

¹⁰ i co nɔm tɛɛlɔn le Onesime, o siŋnun po nuu o laalanndo nin nanu o kaasoo-o.

¹¹ O tasendɔ, nɔm óò nɔ tɔnɔ a ndu le, kɛ sunsun o siŋnun vana tɔnɔɔ le nɔm a ya.

¹² I co nɔm ndu mingi o ba, maa ya pila ba pilɛ o co ni.

¹³ Telen ya co hoo kɔlan kaloo le vannda Yoongu Kɛndɔɔ tiiyallo nanu-o, yáà yeema mì ndóò lo ya ikɛi, mì ndóò mala ya baalaa o fonda nɔmndo.

¹⁴ Kɛ i yeema mì tosa ɲɛ-ɲɛ le, taa cɛl te, yɔŋii dɛnɛ kɛndɛ n co tosaa-o va maa baŋɔɔ nda baŋ nɔm le ndu tosaa, kɛ mò va a kɔl nɔmndo.

¹⁵ Bɔɔle le telen bingi koni Onesime ndóò faŋan nɔm ni, haliko ma sɔla ndu niko le lɔ́ɔ́-lɔ́ɔ̀.

¹⁶ O co lɛ maa cɛ daama le, kɛ hiovɔɔ o kon coo, maa puapilɛ vana kaola taw-vo o co nin ni. I kaola ndu taw, nduyɛ, i laalan maa nɔm kaolanin ndu vɛlɛ hiovɔɔ o ya coo, a kaolanin ndu o vanacieeyɛi nin, mà kaola ndu vɛlɛ maa puapilɛ nɔmndo o Maalii nin.

¹⁷ Lelan te caan nɔm ya co ni, bii ndu maa ya pila.

¹⁸ Te o tosal nɔm pɛ dɛnɛ vɔɔndo pum, te kon te mò dɔndan ɲɛ pum nɔm o ba, handu kon o diola nilan.

¹⁹ Ya Pol, ya pila co nɔm diomndan ndan sɛval-lo nuaa ni: i mingulnin nɔm. Sínà maa hali mì i yiyalan nɔm bɛɛ le, mɛɛ mà yɔngu ya yoomu nɔmndo.

²⁰ O ya yeema nɔm o ba o Maalii nin-ndo co kon ni, puapilɛ nuu, ɲulul-la kɔllo o Krista nin.

²¹ Nduyɛ, i laalan maa a biinin sɔɛi nii, mà tosa ɲɛ ya co nɔm sɛvallo-o, mà hiow bɛɛ lecoo.

²² Handɔɔ o kon coo, toosial-la cɛi leninndo, kani i laalan maa Hala co piɛile niaalen tueyɔɔ, ɲɔɔ bendu lɛnin te, mì muungu niaa ikɛi.

Yilɔɔla mɛɛlalan

²³ Epafras, o nda mal o kaasoo naa ndu le Krista-o yil nɔm,

²⁴ Marke, Aristark, Demas a Luke vanaa naa n co baalaa latulu nanu-a bɛɛ a yil niaa.

²⁵ Màá dɛnɛ kɛndɛ Maalii Yeesu Krista-o va niaa coo!