Osee 9 - BII BILA

Ɲɔɔn kpow n hialunnin yungu Hala-o

¹ «Israɛlla la dɔawnun ɲaale mì la pɛ a kɔlkɛndɔɔ maa vanaa súúla celennda le. Kani la luɛi suunda soolaa n'piɔmndo, mí la kɔa Hala niaa levil. O kpelela lɔaa n'malta niaalan kpow coo, tɔnɔ dɛnɛ nɔɔlɛiyo niaa yeema ni.

² Kɛ o co niaa le nɔnin malun nda lɔɔ o kpele lɔaa n'mallo coo-on a cuɛima nda co solio o doolaa nin-ndan te. Mɔima sɛnɛima niaa co cumndo-an ma keinin niaa o milinndo bɛngu.

³ Cuavaa-imamaa Efraim-nda lonin icali o lɛŋnde Mɛlɛka len nin te. À biinin nɛiyo le muungoo Esipte. À kɔ dianin ɲɛm dian nɔɔlɛiyon Asiri.

⁴ À solul-lɛnin Mɛlɛka sálàla mamɔilan te, o hini lɛnin kɔl a sálàla ndalan te. À solul lɛnin lasálà le ndu hɛnanndo le. Le nda, ɲɛdiaa vanin maa ɲɛdiaa dɛnɛ palaa. Vanaa dianin ndu-a kpede a siŋnunnin vanaa nɔɔlɛiya. Ɲɛdiaa ndaa dɔawnin nda pila balo, kɛ a lueinin ndu o Cɛi-Mɛlɛka-o nin te.

⁵ Yɛɛ niaa tosa yɛnin o paale bɔɔŋian lekaando coo a o paale kafole Mɛlɛka len coo?

⁶ Kani má cè niaa kɔnndan le dɛnɛ tambɛi co tosanndo-o. La kɔ cuungiannin Esipte mí kobio Mɛnfis siŋnun sɛila niaalan. Yɔɔn ciinin bolofaa niaa latɔ́ɔ́-tɔ́ɔ́ tɛɛmbuu niaa kɔɔli, siɛmbulle vulnin o cɛila-kolala-toandaala nialan nin.

⁷ Palɛi Mɛlɛka co sangaa tuisi-e tiiya, palɛi konalan la dɔawnunnin-nde pɛɛn. A toɲa, palɛi ken keinin Israɛlla coo. La co dimio aa: ‹Vana-tɛɛngaa-diom Hala-o seema. Vana sɔla Kɔllo-o hiŋnun bollen.› Lende ni, kɛ kon tosan le dɛnɛ vɔɔn niaa bɛndoo a le nɛyɔn bɛndu niaa nɔ-o.

⁸ Kɛ kpalilnɔ co mɛɛndanndo le cuavaa-imamaa Efraim-nda-o, vana-tɛɛngaa-diom Hala-o pɛɛn, o co nda Hala nuu latulu. Nɛɛ-nɛɛ o kɔɛ pɛ, a co ndu yaŋɔɔlan hendullo, a co ndu ciŋilanndo háá o Cɛi-Hala ndɔɔ nin.

⁹ La luɛi bɔɔ o laasianndo mɛɛ ɲɔɔ va tosanndo lɔ́ɔ́ kon Kibea yɛ. Mɛlɛka co dɛnnda niaala vɔɔnndan loonɔnndo, mò tuisi nda sangaa coo le hakila ndalan.»

Mɛlɛka tambu kɔllo

¹⁰ «Maa rɛsɛŋun co o lɛŋnde veselɛilen nin-ndon lende ya komal Israɛlla ni, maa voosun tasen voosoo koam-ndon ya ce fuɲaa niaa mamaa ni. Kɛ mɛɛ nda tiiya dɔ́ɔ́ Baal-Peɔr, má luei balan o piɔm nɔɔlɛi kon sooloo, mí nda pila siŋnun ɲɛ vɔɔn bɛndoo ya Mɛlɛka o hɔl maa piɔm ndáà kaola kon sɛnɛi-yo.

¹¹ Biilu cuavaa-imamaa Efraim-nda cannin coocoo, mò ɲaanun maa yow. Vana ve lɛnin violɔɔ le, vanalanɔ cue lɛnin foli le, a ciiku lɛnin vanalanɔ a foli le.

¹² Taa manda pɛ cuawva, telen cuavaa kan kandunin fulaa lenin-ndo, i poonda nda nda o ba. Dɛnɛ palaa vanin le nda lɔ́ɔ́ ya malnin nda mì faŋan nda ikɛi-yo.

¹³ Mɛɛ ya co Efraim cɔu yɛ, cuavaa ndɔa siŋnun maa visi doosua toaw-vo. O co nda malɔɔ kɔlan vana diyaa o hɔl.

¹⁴ «Éé Mɛlɛka! Te o va pɛ le sanga tuisi, sanga yɛɛ nɛ n tuisi yɛnin nda coo kpeekpei? Siinguu laandaa ndaa bɔlɔkɛa mà veesiaa nda mɛɛyan o ibuŋ.»

¹⁵ «Laasian ndaa kpow co cɔmnɔnndo Kilkal, lon dɛnɛ ndaa kuisin ya o kɔl ni. I solinin nda o ya lo cɛinin le dɛnnda ndala kɔlvesɛilan. I kaola lɛnin nda le, kani simlacia ndaa kpow vanaa nila kalua nda co ni.

¹⁶ Polale Efraim-nden le keŋnun, mí dumbule ndɔlen le vesa. A soli lɛnin n'cuaw le. Taa velu yɛ pɛ cuawva, i yaanin cuavaa nda kaolanin kan-nda ciee-piɔ́m.»

¹⁷ «Hala nuu kɛɛnin nda, kani a bii diom ndɔɔ le. A vanin a laasiannda vanaa-mangalaa-isɔɔa tɛɛn.»