Osee 8 - BII BILA

Vana saŋ pɛ hoeiye, o kow felenfelenndo

¹ «La hɔŋ lee saa! Dɛnɛ palaa tol o cɛi Mɛlɛka-o coo maa kovɛ, kani vannda kpakpala kpema nuu, à del kasi a tɔŋ nuu.

² À yondanin o ya lo aa: ‹Hala naa, n sinà nɔm, naa Israɛlla.›

³ A kɛɛ ɲɛ kɛndɔɔ. Lelan, yaamɔɔa toawnin nda.

⁴ À kennun masaa, à ɲuna ya le, má hɛli simlacia, i ve o sina nin te. Má cɔaw piɔmnda a volin ndan a á sianin ndan, Ken nda tosa ni le laasianndo.

⁵ Éé niaa Samaria! La viow nin naw tova téndé niaa cɔw hoo a sianion-ndo. La tùùlú ya bɔɔ kɔllo nin. Háá lɔ́ɔ́ kuɛɛ niaa lo yɛnin bumbaa le dɛnnda vana yaala niaa coo le lan tosaa?

⁶ Kani Israɛl naw téndé niaa kon fula ni. Vana cɔavaa pum cɔw ndu ni, o co hala le o co le. Lelan, le naw téndé kon Samari pesipesinnin vɔ́-vɔ́.

⁷ Le tùú niaa co hoeiye saŋɔɔ-o, la koawnin felenfelenndo. ‹Malun cuulu yasa lon soli kpeyan te.› Te n soli yɛ pɛ kpeyanndo, mɛɛ mialla dianin kpeyan kon ni.

⁸ Vannda cii Israɛlla misimisi. Nihau, a siŋnun maa ɲɛ vana yeema lɛ loo vanaa-mangalaa-isɔɔa tɛɛn.

⁹ Kani Asiri nda kɔɛnnun ni. Sofɛlɛ yondo connun o ba ndɔɔ coo, kɛ polale Efraim-nden, bɔnɔɔ nda luɛi le sámáá sɔlaa ni.

¹⁰ À co bɛɛ vanaa-mangalaa-isɔɔa ɲɔɔn keo nuaa, telenndo tiiya le mì cuungiaa nda. O lo ɲɛ-pɔmbɔ mà luɛi o sangaa nin, o kpòndò masa kpaaya bɛndoo bɛngu.

¹¹ Kani polale Efraim-nden le vangaliaa fondala-loamaa-lasálàlan le hakilan vɔɔsuuo, kɛ fondala lan la cɔɔlu nda bollen luei o hakilan tosaa nin ni.

¹² I sɛval bɛɛ nda tɔŋnda nilan vaalan o vaalan nin, à canin kon lan maa lepilɛ bɛɛ a sina lan te.

¹³ O co fúú le nda kaola ya sálàlan solullo le, kani nda pila co visin mun dioo ni. Kɛ ya Mɛlɛka, sálàla lan la bii kɔl te. I pɔɛ́ɛ́nùn yɔŋnda ndala vɔɔnndan te, i soaŋnin nda le hakila ndalan. Haa, fɔ mà muungu Esipte!

¹⁴ Cuavaa Israɛlla pɔɛɛnun vana cɔw nda-o mà tengulun cɛila lemasalan. Yudaa tengulun kobila mayoomulan taw. Kɛ i co hunɔɔ kobila ndala lan malɔɔ yin, mì yinnden le lom cɛila lemasala lan.»