Osee 6 - BII BILA

¹ «La hun mì n muungun Mɛlɛka o ibuŋ! Kani ndu lɔɔ naa ni, kɛ o co naa cɛw. Ndu booluu naa ni, kɛ o co pavii nɛi holiholi.

² O minginin naa yoomoo o n'dial o palɛi ndii ŋiin bɛngu. O paale yàándɔlen coo, o minginin naa a kiyɛi, mì n muungu yoomu ndu o hɔl.

³ Lelan, n sinan Mɛlɛka. N kindikindin le ndu sinaa. Kani o co hunɔɔ lekɛ́ndɛi mɛɛ ɲɛ-tengaa paale siaa hun nuaa yɛ. O co naa hunɔɔ coo maa piɔɔ lesial, te kon te maa piɔɔ sialte tase pɔɔliaa lɛŋnden-ndo.»

⁴ Kɛ mí Mɛlɛka mulul niaa aa: «Yɛɛ ya tosa yɛnin le niaa, niaa polale Efraim-nden? Niaa polale Yuda len yɛ, yɛɛ ya tosa yɛnin le niaa? Kaola niaa nɔ le ya-o, maa mɔ́m idii o co ni, maa makɛm o co ni, o nɛi puusian te.

⁵ Lelan ya co kei a vanaa-tɛɛngaa-diom Hala-a ni, mì tuisi niaa sangalan coo. Lelan ya diwnin niaa a sɔɛi fulanin ya o sondo-e ni. Yamɛi nii tenganin vakpa maa ɲɛ-tengaa lepala.

⁶ Lou o lediom coo hiow ya hɛnan a sálàla n'cɔlulan. Hala sinaa co fisa a sálàla loamaalan solio.»

Dɛnnda vɔɔnnda Israɛlla co tosaa lan

⁷ «Kɛ mɛɛ Adam tosa yɛ, la tɛɛmbuu kpemaa, mí la yii ya dúmbú.

⁸ Kobi vanaa kɔlvesɛiya Kalaad co ni. Kàŋnda kooma vanndacieea kposon la co lon ni.

⁹ Mɛɛ vanaa del vannda coo-a yììnùn kundaa le vannda cumullo nuaa yɛ, lende vanaa-solia-lasálàá Kalaad a co vannda diwvo o nɛi Sikɛm-ndo ni. A co dɛnnda kɔlvesɛilan tosaa a labɛɛla.

¹⁰ I ce dɛnnda vɔɔn-vɔɔnndan Israɛlla tɛɛn: cuavaa-imamaa Efraim-nda co pɛngi suundaa le. Israɛlla co nɔɔlianndo pila.

¹¹ Niaa cuavaa-imamaa Yuda-a bɛɛ, i co niaa hunɔɔ kovɔɔ.» «Lɔ́ɔ́ yáà yeema vanaa nia va o cɛlen nin-nda mingio nanu-o,»