Osee 4 - BII BILA

Hala co kɔɔsɔɔ nda vanaa ndɔa

¹ «Niaa Israɛlla sei! La yaŋ nilan o sɔɛi Mɛlɛka-e he. Mɛlɛka co kɔɔsɔɔ a vanaa co o lɛŋnden nden nin-nda. Kani vannda co lɛ lo o lediom coo le. Vanakɛndɛyɛi co lɛ le, vana co lɛ Hala sina maa Hala o lɛŋnden nden nin te.

² Fɔ mɛɛniaalan, còòlan, vannda diwvo, vuilen a suundaa daama co nin tosanndo o lɛŋnden nden nin ni. Kɔlvesɛiyo co hiovɔɔ laci a kuiyo, a co vanndacieea diwvo a labɛɛla tuŋ-tuŋ.

³ Lelan dɛnɛ palaa toalnin o lɛŋnden nden coo ni. Vanaa vanin icali lenin-nda kpow a ɲawnin. Visia yondoo nin a yowva coocoo bɛɛ a ɲawnin. Hali suvaa co o mɛmma ihɛllan nin-nda co hunɔɔ cuvɔɔ.»

Haki vanaa-solia-lasálàá tosa-o

⁴ «Ɛ-ɛ, o co vannda kpede le vana bii tɛɛ le, o co vɛlɛ a vannda kpede le vana co kɔɔsɔ le. Kɛ niaa vanaa-solia-lasálàá ya bii tɛɛ ni, a niaa kpeekpei ya co kɔɔsɔɔ ni.

⁵ Lelan, ipala déŋ niaa boŋnin ni mì vanaa-tɛɛngaa-diom Hala-a va boŋio icɔl. I co kala nia sondoo kinda le fɛɛn a fɛɛn, mò mei kpili.

⁶ Vanaa nia dɔwnun yɛɛvɛ le sina lepɛŋndo. Le tùú niaa kɛɛ le ya sinaa-o, ya bɛɛ i co niaa ɲindɔɔ ikɛi, la ve lɛnin o vali solia lasálà nuu nin te. Mɛɛ niaa pɔɛɛnun tɔŋ Hala niaa yɛ, ya bɛɛ i co cuavaa niaa pɔɛɛnɔn lende.

⁷ Hɛli co le, mɛɛ nda co kpede, a mal nɛi yáà cɔm nda-o. I co biilu ndáà nɔ-o siinguu siɛmbulan.

⁸ Vanaa-solia-lasálàá co tɔnɔɔ sɔlaa o yɔŋnda vɔɔnnda vanaa nia nin. Ɲɔɔ ndu pilɛ kpé nda yeema ni: mì vanaa nia va hiovɔɔ laci a hakilan tosaa.

⁹ Kɛ mɛɛ ya tosanin a vanaa tɔ̀a yɛ, lende koni ya tosanin a vanaa-solia-lasálàá ni. I tosanin mì dɛnnda ndalan la mingulun nda pila.

¹⁰ A vanin dioo, kɛ a venin pum te. A vanin suundaa, kɛ a venin n'cuaw violɔɔ le, kani a mulul-la kɔɔ, ya Mɛlɛka.

¹¹ Suunda a mɔiyan ma co vanaa nia bolle hiŋndo.

¹² A co piɔmaa nda sɛl a yɔmnde-a sɔɔn ɲuuniaa le mulio sɔlaa. Yɔmii nda sɛl-le co sɔɛi o nda lo ni. Hoeyii suunda soolaa n'piɔmnde hɔŋ nda coo, mì i faŋa nda o nɛi, mì i sɔɔndiaa nda. A laasian a suundaa má kɔa ya Hala ndaa levil.

¹³ A co sálàlan solio o pembon tullo, a co ansan lomɔɔ o pembun pɔmbɔn coo, o yálánnde bɛngu, o yɔmii pepliee a o yɔmii terebɛntii puiyɛi bɛngu, ì vunduma ndɔan ma naŋ taw-ve. Le kɔlɔ kon cuavaa ndaa laandua co suundaa ni, mì laandaa poaa ndaa bɛɛ a va suundaa.

¹⁴ I saangiaanin cuavaa niaa laandua le tùú nda laasian a suunda-o le. I saangiaanin vɛlɛ laandaa poaa nia le tùú nda luɛi suundaa-o le. Kani nda pila vanaa-solia-lasálàá co yifanndo o kolokololan a vanlaandua suunndɛiya le ɲɛm dian sálàn piɔvanndo nda vanlaandua suundɛyaa co kɔlan o cɛila-halala ndalan nin-nda. Maa mɛɛ taloo dimin yɛ aa: ‹Mbɔ̀ vanaa nɔ sinapɛngu le-a nda tambu.›

¹⁵ Éé niaa Israɛlla, la luɛi bɔɔ suundaa! Mbɔ̀ màá Yudaa nda va lɛ lende le! La kɔa o fonda diandaa Kilkal te, la hel Bɛt-Avɛn te. La mɛnan o diola Mɛlɛka yoomaa le!

¹⁶ Israɛlla luɛi seesiɛi mɛɛ naw téndóó kɛɛ le kɔlan nuaa yɛ. Lelan Mɛlɛka tiwba mo bii nda biyɔɔ kɛndɔɔ mɛɛ vana yaa saa téndéa diólan o bil kɛndɛ-kɛndɔɔ nin yɛ le.

¹⁷ Polale Efraim-nden le del piɔmnda kɔɔli. La mal nda lon!

¹⁸ A cii dɔ́ɔ́ pɛ man kolɔɔ a labɛɛla, a saan suunda nda soolaa n'piɔmndo. Dɛnnda lasiɛmbulan simlacia ndaa yeema ni.

¹⁹ Felen-felenndo co nda kɔndɔɔ mì siɛmbulan la bii nda le sálàla ndalan.»