Osee 2 - BII BILA

Paale bɛndule Yisreɛl-ten

¹ «Kɛ paale vanin, mì Israɛlla kui taw. À vanin sɛ́lɛ́ maa sióónndon o mɛmma ihɛllan kɔngɔ. Vana nɔlanin nda cɔmndo le. Fonda ndáà va nda paandu dimullo-o aa: ‹La co yungu ni le›, a dimulnin nda o fonda kon aa: ‹Cuavaa Hala yoomaa niaa co ni.›

² O kon, Yudaa a Israɛlla cuungiannin, mà cua simlacinɔɔ ndu pilɛ, mà fula o lɛŋnden nin. Kani paale bɛndulen paale Yisreɛl-ten le vanin ni.

³ Lelan, la veelu puapilɛa niaa aa Ammi (kon co dimio ni aa «Yungu nuu»), mì la veelu yemaa niaa aa Ruhama (kon co dimio ni aa «Kaolaa»).»

Israɛl, lanɔ suundɛiyo

⁴ «La kilu kala niaa yamɛi, Israɛl pɛɛn. La kilul ndu yamɛi, kani o co lɛ laa ni le, ya bɛɛ i co lɛ pɔnɔ ndɔ le. O bɛnda mò vɔɔsun pondale suunda ndɔɔ ndu o hɔl. Mò faŋan tɔɔmasele suunda ndɔɔ ndu o mɛɛyan tɛɛn,

⁵ yɔŋii ya yunga ndu, mì mɛi ndu fondo fúú, mɛɛ o va o paale nda velu ndu len coo yɛ. I minginin lɛŋnde ndɔlen lɛŋnde veselɛilen, mì mingi len lɛŋnde mɛmma sɔlan nin te len. O kon mò vi a bolola vesɛilan.

⁶ I yeema cuavaa ndɔa le, kani o suundaa nin o velu nda ni.

⁷ Kala nda luɛi suundaa. Kala solin nda o ipulu-o tuisin siɛmbulan. O dimi aa: ‹I co lakɔ sámáá nia kɔɔli, nda co ya ɲɛdiaa nuu, mɛmma nian, kola ni toosian a yiiŋii saa-o, kola keese nuu, cuɛima nian a ɲɛm ya kol-lon yɔngoo ni.›

⁸ Lelan, ya Mɛlɛka, i co ndu nɛiyo kinda laci a yɔɔn, i co ndu kpakio cɔvɔɔ laci. O ci lɛnin nɛi o vanin kɔlan coo-o le.

⁹ O kon, o vanin kɔlan sámáá ndɔa kɔɔli, kɛ o bendalnin nda le. O nuwviaanin nda, kɛ o seelunnin nda le. Le hee, o diminin aa: ‹I muungu vɔ mì kɔɛnnun o pɔnɔ ni tasoo lo. Kani lɔ́ɔ́ ya va ndu o ba-o yáà hiow va o dɛnɛ kɛndɔɔ nin a sisa.›

¹⁰ O ve sina maa ya le va ndu maalon, mɔima sɛnɛiyan a cuɛiyan yɔngoo le. Ya va ndu vɛlɛ volion a sianion yɔngoo ni, kɛ mó tosa baalaa a mun le piɔmndo Baal.

¹¹ Lelan, i co malun nun poonda o telen koavaa, mì puu mɔima nian o telen mamɔiyo. I co vɛlɛ kola ni toosian a yiiŋii saa-o a kola keese ni va ndu siɛmbulan kumbɔɔ-o yuunda.

¹² A toɲa, i ciinin ndu bɛ̀ɛ̀lan mì siɛmbulan la tol ndu sámáá ndɔa o hɔl kpendekele. Vana-vana kuunanin ya ken tosa le.

¹³ I tɛɛmbuunin kɔlkɛndɛ ndɔɔ, mì kuuna kafola ndɔlan, kɔlkɛndɛ ndɔ paangun sɛnɛiyo, kafola ndɔla paale pɛngiaalan a cuungiannda ndɔla kɔlkɛndɛlan kpow.

¹⁴ I tɛɛmbuunin nakɔla n'rɛsɛnnda ndɔlan a nakɔla n'voosula ndɔla o va dimio aa: ‹Sámáá nia ke ya lan ni› lan. I co lan siinguu bundɔɔ mì visia yondoa de lan.

¹⁵ I co ndu sangaa tuisi coo le palɛi o tɛɛmbuu o Baalla sálàlan solullo a o nda ansan lumndo nin-nde. O palɛi ken nin, o va kelan suun ndɔn a yɔlɔn ndɔn labolon vownɔnndo, mó va kɔlan o sámáá ndɔa lo, ya ya mó pɔɛɛnun ya. Ya Mɛlɛka soo nuaa ni.

¹⁶ I co vɛlɛ ndu hiɔlɔɔ mì kɔɛ a ndu o lɛŋnde veselɛilen nin, mì soo o ndu lo.

¹⁷ Lon, ya mingulnin ndu nakɔla n'rɛsɛnnda ndɔlan ni, mì mingi bóllo Akɔr maa dio kɔlkɛsiaa. O kon, o delnin ya kɔɔlii a yeemɛi maa telen o va o felengiyɛi ndɔɛi nin-ndo, maa paale o fula Esipte mò va heeloo len.»

Paale ciyaa sɔngɔlen

¹⁸ Mɛlɛka dimi aa: «Paale len, o veelunin ya aa: ‹Pɔnɔ nuu›, o veelu lɛnin ya aa: ‹Vana ni bɛndoo› le.

¹⁹ I faŋanin ndu diola Baalla o sondo, vana ve lɛnin nda ladio piɔlɔɔ le.

²⁰ Paalelen, i yiinin kpemaa le vanaa nia. I yiinin ndu a visia yondoa a á yowva coocoo, mì yii ndu vɛlɛ a visia pɔm-pɔmbɔa kela lɛŋ-nda. I yiminin kpaasiaalan, mɔɔn cɔwvon, a ɲɛm cɔwvon kpow, mì ke vanaa nia pɛngio, mà vannun nila ɲulu.

²¹ Nɔm Israɛl, i fula nɔm kɔɔli le nɔm cuaa o nɔ̀u nin le fɛɛn a fɛɛn. I fula nɔm kɔɔli le nɔm cuaa o nɔ̀u nin, mì dɔw nɔm fulu a sandei, a lou o lediom coo, a kaolaa a á ɲííye.

²² I sɔlanin nɔm o nɔ̀u nin a lou o lediom coo. O kon, a sinanin maa ya co Mɛlɛka ni.»

²³ Mɛlɛka dimi nuaa ni aa: «Paale len, i mulinin piɛilen. I mululnin halataala piɛilen, mì halataala mulul lɛŋnden piɛilen,

²⁴ mì lɛŋnden le mulul maalon, mɔima sɛnɛiyan a cuɛiyan piɛilen, mì ɲɛm mun kpow n mulul Yisreɛl piɛilen.

²⁵ I tɔalnin Yisreɛl o lɛŋnden coo, mì kaola Lo-Ruhama. I dimulnin Lo-Ammi aa: ‹Yungu nuu niaa co ni›, mì ndu muli aa: ‹Hala nuu n co ni.›»