Osee 14 - BII BILA

¹ «Samaria sɔlanin sangaa le tɛɛmbuula ndalan, kani a simul Hala ndaa. Vanaa co icali lon-nda sɔlanin piɔ́mndo o mɔɛi cɔwve bɛngu. Cɛlɛkpɛa ndaa pesipesinnin. À tɛɛndiaanin vanlaandua lafolia ndaa dembelan.»

Vanaa lo o lediom coo le-a sɔla siongɔɔ

² «Israɛlla, la muungu Mɛlɛka Hala niaa o ibuŋ, kani le haki niaa niaa del ni.

³ La hun o ndu lo a sɔɔn sondon, la muungu Mɛlɛka o ibuŋ mì la dimul ndu aa: ‹Mal naa haki le tɛɛmbuula naalan kpow. Cɛl naa a kɔlkɛndɔɔ, yɔŋii naa n solul nɔm sálàlan a navaa tovaa, o co fisa mì n sangala nɔm a sondola naalan.

⁴ O co Asiri le nɔlanin naa ciindiaa le, n hel-lɛnin o soa cɔw coo le, n veelu lɛnin ɲɛ naa n cɔw a laba-o aa hala naa le. Kani nɔm tuinun vííyo iɲíí ni.›

⁵ I singinin Israɛlla le kɛɛ nda kɛɛ lou o lediom coo-o. I kaolanin nda a kɔl nuu kpow, kani i co lɛ a kɔltuw nda le.

⁶ I vanin maa mɔ́m le Israɛlla, a yandunin maa bil cun kɛndɛ. À lueinin puundun ndan lɛŋ maa yɔmii sɛɛdrei Liban.

⁷ Lɛvun ndan puinin taw, à sɔlanin naŋɔɔ maa yɔmii oliviee, cun ndaa vanin maa lasikɔlɔ cun kɛndɔɔ Liban.

⁸ A muungunin mà cal o vunduma ndɔan bɛngu. A muungunin mà vàá maalon, mà kui mɛɛ rɛsɛnndon koam yɛ, mà sɔla tɔ́ɔ́ maa mɔiyan Liban.

⁹ Éé niaa cuavaa-imamaa Efraim-nda! Kpeku yɛɛ nɛ ya nɔ yɛ vɛlɛ a piɔmnda? Ya, i mululnin niaa mì landu niaa hɔlla coo. Maa yɔm siprɛs puiyaa ya vanin le niaa ni, ya o ba kɔmnde niaalen le vanin fulaa ni.

¹⁰ Vana nɔ pɛ kɔlkaloo, ndu dɔ́w sɔɔn mun taasi mò bii mun! Vana nɔ pɛ sinapɛngoo, ndu bíí sɔɔn mun bila! Kani nɛila Mɛlɛka lan la co lasandaa sakpo, vanaa sandaa kelanin lecoo ni. Kɛ vanaa lanila kalua boŋinin lecoo, mà deli.»