Osee 11 - BII BILA

Kaola Mɛlɛka kaola Israɛl-lo

¹ «Tuma Israɛl va maa poombɔ pɔmbɔ-o, mí kaola ndu, mí veelu ndu, ndu po nuu, le faŋanndo Esipte.

² Kɛ mɛɛ ya va Israɛlla veeloo faw, lende nda va kɔnndan ya levil. A va Baal sálàlan solullo, a va ansan lomɔɔ le halaa fondoa.

³ Nduyɛ, ya Mɛlɛka pɛɛku Efraim kɔlan ni, ya saa ndu balan le taŋtaŋndo tosaa ni. Kɛ o sina maa ya le va ndu mandaa le.

⁴ O vanacieeyɛi nin ya va ndu nanɔɔ ni, o koalaa nin ya va kɔlan a ndu ni. Mí yɔŋnun le ndu mɛɛ kalacuaa cua hɔ́ɔ́ ndɔɔ nuaa mò yiiliaa hɔ́ɔ́ kon kúúvo nuaa yɛ. I va tundɔnndo le ndu ɲɛdiaa yɔngoo.

⁵ Israɛlla muungu lɛnin Esipte le, kɛ masaa Asiri tosanin masalen nda coo ni, kani a kɛɛ le muungoo ya Mɛlɛka o ibuŋ.

⁶ Cɔwvo luɛinin o kobila ndalan nin, mì mɔɛi cɔwve kilikili ɲɛm co nda kandaa-on. Cɔwvo mialnin nda kpow. Kon tosannin le pɛl nda pila tɛnda-o.

⁷ Vanaa nia yeema le lo o lediom coo a ya Mɛlɛka le. A co nda veeloo fulaa coocoo, kɛ vana pilɛ bɛɛ co cɔnɔn te.

⁸ Vɛ̀ɛ̀ ya nɔla yɛnin niaa kɛɛ, niaa cuavaa-imamaa Efraim-nda? Éé niaa Israɛlla, vɛ̀ɛ̀ ya tiw yɛnin ba mì yii niaa dúmbú? Vɛ̀ɛ̀ ya nɔla yɛnin mì tosal niaa maa kobio Adma, te kon te mì siinguu niaa maa kobio Seboyim? Kɔllo hiilun ya nin, ɲííye bii ya taw-taw.

⁹ I tosanin mɛɛ kɔllo tuulu ya taw yɛ le. I muungunin le polale Efraim-nden tɛɛmbuuo le. Kani i co vanaciee le, Hala ya co ni. O-Diandaa ya co niaa tɛɛn ni, I hinnin a kɔltuw le.

¹⁰ Vannda kɔanin Mɛlɛka kɔɔli. O vanin pɛɛliaa maa yàlà. O lonin pɛɛliaa kon mì poaa ndɔa cɛn a ba paalen le del-lo, mà hin a kiltan a á ɲiiyaa.

¹¹ A cannin Esipte mà hin a ɲiiyaa maa n'yow. A cannin o lɛŋnde Asiri len nin mà hin a kiltan maa n'poonpoon. O kon, i kɛsinin nda mà cal o cɛila ndalan nin. Ya Mɛlɛka soo lende ni.»