Osee 10 - BII BILA

Kaannden a masalen le tiiya o mɛɛlulan

¹ «Israɛlla va maa nakɔ n'rɛsɛn koam taw-vo, a va kuiyo taw-taw. Kɛ mɛɛ nda va kɔlan a kuiyo faw, lende koni nda va fondala-loamaa-lasálàlan vangalaa ni. Mɛɛ lɛŋnde ndalen le va naŋɔɔ yɛ, lende koni nda va powta sálàlan baŋɔɔ ni.

² Kɔl ndaa co o piɔvan-ndo, lelan sanga kon co nda tolɔɔ coo ni. Mɛlɛka co fondala-loamaa-lasálàla ndalan pesipesi mò puusiaa powta sálàla ndalan.

³ O kon a diminin aa: «N nɔ masa le, kani n ke Mɛlɛka lebɛɛ le. Kɛ náà n nɔ bɛɛ masaa, kpeku yɛɛ o solul-lɛnin naa?»

⁴ À co tombolaa tuŋ, tombola laa tombola, à co mɛɛniannda lacòòvalan, mà va kpemalan yiiyo. Kɛ mɛɛ bil vɔɔn vul o ciɛɔn nin-ndo nɛinun vanaa váà yɛ, lende dɛnɛ sandaa nɛinun Israɛlla ni.

⁵ Vanaa co icali Samari-a co a mɔnɛi le navaa téndéa Bɛt-Avɛn. Vannda tosanin biisi piɔm sialaa kon. Vanaa-solia-lasálàà ndɔa va ɲaaloo dɔwnɔnndo o ndu nin-nda a tosanin biisi ndɔɔ, kani biilu ndɔɔ faŋannin nda tɛɛn mì vannda kɔɛ a ndu o biyɔɔ nin nda levil polon.

⁶ Kani vannda cuanin ndu mà kɔɛnnun a ndu Asiri, mà kɔ ke masa bɛndoo ndu. Siɛmbulan la biinin polale Efraim-nden, mì Israɛlla kel suei le tuula ndala lan.

⁷ Samari cuu itambu. Masa Samaria lo o ɲánndávàà mɛɛ yɔm bingi hiŋnun o mɛnndan coo-o lo nuaa yɛ.

⁸ Sooluulan Avɛn, nɛɛ Israɛlla va hakilan tosaa-a la tambunin kpow. Hɛinndon a siɛmbullon vulnin, o fondala-loamaa-lasálàla ndalan coo. A dimulnin pembon aa: «La kuumbun naa coo», mà dimul pembun pɔmbɔn aa: «La deli naa coo!».

Israɛlla koawnin yɛyii nda saŋ-nde

⁹ Niaa Israɛlla, kabi o palɛi niaa va Kibea-e, la co hakilan tosaa tuŋ, la mangalan-ndɔ le. Vɛ̀ɛ̀ o co Kibea lon kpeekpei le cɔwvo toalnin vanaa yɔŋ vɔɔnda coo le?

¹⁰ I soaŋnin nda mɛɛ ya yeema yɛ. Vanaa súúla celennda cuungiannin mà del nda coo, mà yiw nda a yɔlɔn le hakila ndala tiɔnndan.

¹¹ Maa naw téndé sɔla manda kɛndɔɔ-o, óò yeema maalon nɛiyo-o polale Efraim-nden le va ni. Mɛɛ ya ce kɛsii ndɛi kɛndɛi, mi vow nda yɔm lebollo o labolo le baalaa, mì polale Yuda len le vàá, mì cuavaa-imamaa Yakɔb-a koŋ ɲɛ vàà kon.

¹² La sáŋ dɛnɛ sandaa, mì la kow vanakɛndɛyɛi. La fɛɛya ciɛi sɛnɛiye le niaa pila. Telenndo tiiya le muungoo ya Mɛlɛka o ibuŋ, háá mì hun saŋ dɛnɛ sandaa niaa coo.

¹³ Nduyɛ, la vàá dɛnɛ vɔɔndo mí la koaw kɔlvesɛiyo, mí la dia kɔmnde lacòòvalen. Kani la tiindan taasila niaalan, mí la kɔngan kuubaa cɔvaa niaa sɛ́lɛ́a.

¹⁴ Lelan, vɔkɔ-vɔkɔ bɛndu-bɛndoo tosannin vanaa niaa tɛɛn, mì kobila mayoomula niaalan kpow la piɔsipiɔsi mɛɛ Salman pesi Bɛt-Arbɛl o paale cɔwlen coo yɛ. Paale len, mó vɔɔciaa kalaa a cuavaa ndɔa latulu.

¹⁵ Lende ya tosanin a niaa co Betɛl-la ni le kɔlvesɛi niaa bɛndu-bɛndoo. A telen ɲɛ-tengaa paale siaa, Mɛɛlulan la vanin lan le masa Israɛlla ni.»