Nsaŋ 8 - BII BILA

¹ Mí Yeesu kɔa o Pembii Oliviei coo.

² Kɛ paalen siɔu dɔ́ɔ́, mó muungu o Cɛi-Hala-o nin, mí vannda kpow a hun o ndu lo. Mó cal le nda pɛɛkoo.

³ O kon mí vanaa pɛɛkaa latɔŋnda a Faliisia hun a vuɛɛn nda bii o suundaa-o,

⁴ má simi ndu vannda o hɔl, má dimul Yeesu aa: «Kɔɔfa, o suundaa nda bii cuaa hoo ni.

⁵ Nduyɛ o tɔŋndo nin, Moise dimul naa le vanalanɔ vaa nuaa lou viiyo a powtan háá mo vi: kɛ nɔm yɛ, vɛ̀ɛ́ n yiyan yɛ?»

⁶ Le ndu kɔlɔɔ solio nda va dimi kon ni, le mɛɛ ndáà kɔɔsa a ndu o lasondo yɛ. Kɛ mí Yeesu tundun, mó va sɛvaa lɛŋ a isu.

⁷ Le tùú nda va ndu baŋnɔnndo ɲunaa-o, mó cua hɔlla, mó dimul nda aa: «Vana co niaa tɛɛn o nɔ haki loo cua pow tasoo mò vɛ ndu.»

⁸ O kon kɔɔli, mó tundun vɛlɛ sɛvaa lɛŋ.

⁹ Ndáà tueyɔɔ lende, má muungun a pilɛn-pilɛn, kandɔɔ a kaasonnda. Mí Yeesu lo nda vuɛɛn kon kpé, vuɛɛndo va isisi o lawvo tɛɛn.

¹⁰ O kon mí Yeesu can, mó ɲuna ndu aa: «Vuɛɛndo, ɔ́ɔ̀ vanaa lɔlu nɔm-nda? Vana-vana yaala nɔm te?»

¹¹ Mó muli aa: «Vana bɛɛ Maalii.» Mí Yeesu dimul ndu aa: «Ya bɛɛ, i yaalanin nɔm te, kɔnnun, kɛ kɔ tosa lɛ haki le.»

Yeesu co ɲɛ-tengaa le ceendo ni

¹² Mí Yeesu soaa vɛlɛ o nda lo, mó dimul nda aa: «Ya co ɲɛ-tengaa ceendo ni, vana del-la kɔɔli pɛ, ndu kela o maɲum nin te, kɛ o sɔla ɲɛ-tengaa cindaa.»

¹³ O ken coo Faliisia dimul ndu ni aa: «Le nɔm pila kínɛí n co seilen tɛndaa ni, nduyɛ ɲɛ n co vannda pɛɛkoo-o co toɲa le.»

¹⁴ Mí Yeesu mulul nda aa: «O va bɛɛ aa seile nile ya pila len ya co tɛndaa ni, toɲaa le co ni, kani i sina ba ya fula-o, i sina nɛɛ ya co kɔlan-nda. Kɛ niaa yɛ, la sina nɛɛ ya fula-a le, la sina vɛlɛ nɛɛ ya co kɔlan-nda le.

¹⁵ Niaa, o vanacieeyɛi nin kínɛí niaa co vannda yamɛi kiolɔɔ ni. Kɛ ya yɛ, i co vana-vana iyama kiolɔɔ le.

¹⁶ Te i kelu yɛ pɛ yamɛi, yamɛi toɲɛi ya kialu ni, kani i co ya pilɛ le, kɛ Pua vem ya-o co ya ikɛi.

¹⁷ O co o sɛvaa o tɔŋ niaa nin maa seile vanaa ŋiɔn le tiw.

¹⁸ Ya, i co seilen timbio a ya pila o kɔɔ, mì Pua vem ya-o va seilen timbio a ya o kɔɔ.»

¹⁹ O kon má dimul ndu aa: «Kuɛɛ Fuɲa nɔm co yɛ?» Mí Yeesu muli aa: «La sina ya le, la sina vɛlɛ Fuɲa nuu le. Te niáà sina ya pɛ, la va Fuɲa nuu sina.»

²⁰ Telen Yeesu va vannda pɛɛkoo o Cɛi-Hala-o nin-ndo o dimi sɔɔn mun ni, nɛɛ nda vow bolofaa-a. Vana-vana bii ndu le, kani telen ndɔɔ ndóò tiiya vɔ le.

«La nɔla kɔlan nɛɛ ya co kɔlan-nda le»

²¹ Mí Yeesu dimul nda vɛlɛ aa: «I co lakɔnnɔn mì la koma nuwviaa ya, mì la vi o haki niaa nin. La nɔla kɔlan nɛɛ ya co kɔlan-nda le.»

²² Mí Yuifia dimi aa: «Mò va maa ndu pila co diinɔn ni, kani o co dimio maa la nɔla hunɔɔ nɛɛ ya co kɔlan-nda le?»

²³ Mí Yeesu mulul nda aa: «Lɛŋ nanu niaa fula ni, ya yɛ, coocoo ya fula ni. O ceendo ho nin niaa fula ni, ya yɛ i fula o ceendo ho nin te.

²⁴ Lelan ya dimi ni maa la vunin o hakila niaalan nin. Kani te la laalan maa Ya co le, la vi o hakila niaalan nin.»

²⁵ Má ɲuna ndu aa: «Nɛ̀ɛ́ n co yɛ?» Mí Yeesu mulul nda aa: «Kabi o tasendɔ, vana ya dimul niaa maa ndu ya co ni-o, ndu ya co ni.

²⁶ I nɔ sɔɔn taw le dimio a yaman bɔɔ-bɔɔ kiolɔɔ a niaa o kɔɔ. Kɛ vana toɲaa vana vem ya-o co ni, sɔɔn ya tuei ndu o sondo-on, mun ya co ceendo tiiyallo ni.»

²⁷ A bii bila maa a Pua o kɔɔ le o va nda dimul kon te.

²⁸ O kon mí Yeesu dimul nda aa: «Telen niaa heelunin Po vanacieo-vo, la sinanin vana ya co-o, mì la sina maa i co ɲɛ-ɲɛ tosa a ba ni le, kɛ mì la sina maa sɔɔn Pua pɛɛku ya-on ya co dimio ni.

²⁹ Vana vem ya-o co ya ikɛi, o mel-la ya pilɛ kpé le, kani ɲɛ hɛnan ndu-o ya co tosaa lɔ́ɔ́-lɔ́ɔ̀ ni.»

³⁰ Telen Yeesu va kon sɔɛi-yo, mí vannda taw a laalan ndu.

Vanaa co o ba ndaa coo-a a cɛa

³¹ O kon mí Yeesu dimul Yuifia ndáà laalan ndu-a aa: «Te la lo pɛ sɔɛi nii biyɔɔ, mɛɛ kaandeŋaa nia lekɛ́ndɛi niaa co ni,

³² la sinanin toɲaa, mì toɲaa soli niaa o cɛlen nin.»

³³ Má mulul ndu aa: «Cuavaa-imamaa Abraham-nda naa n co ni, lepilɛ bɛɛ n tosa lecɛ vana o ba le, le yɛɛ n co yɛ naa dimullo maa mì n fula o cɛlen nin?»

³⁴ Mí Yeesu mulul nda aa: «I co niaa toɲaa dimul kpendekele, vana-vana tosa pɛ hakio, ndu siŋnun cɛ hakio.

³⁵ Nduyɛ, cɛɔ lò o yungulen nin le lɔ́ɔ́-lɔ́ɔ̀ le, po vialaa yɛ ndu, mò lo lon le lɔ́ɔ́-lɔ́ɔ̀.

³⁶ Lelan te Poo soli pɛ niaa o cɛlen nin, la sɔla hɔ́ɔ́yɛi kpeekpei-ye.

³⁷ I sina maa cuavaa-imamaa Abraham-nda niaa co ni, kɛ la co nɛilan nuwviaa le ya diyɔɔ, kani sɔɔn nun co niaa hɛnan te.

³⁸ Nduyɛ, ɲɛ ya ce o Pua lo-o, ndu ya co niaa dimullo ni. Kɛ sɔɔn niaa tuei o fuɲa niaa lo-on niaa co tosaa ni.»

³⁹ Má mulul ndu aa: «Abraham co fuɲa naa ni.» Mí Yeesu dimul nda aa: «Te cuavaa Abraham-nda niaa co ni, mɛɛ la tosa dɛnndan maa Abraham.

⁴⁰ Kɛ mɛɛ niaa cɛn nin nɛilan nuwviaa le ya diyɔɔ nuaa yɛ, ya vana co niaa toɲa ya tuei o Hala lo-o dimullo-o. Abraham tosa dɔ́ɔ́ sɔɛi vaa lende le!

⁴¹ Dɛnnda fuɲa nia lan niaa co tosaa ni.» Má dimul ndu aa: «N co cuavaa sámá le. Fuɲa ndu pilɛ kpé naa n nɔ ni, Hala pɛɛn.»

⁴² Mí Yeesu dimul nda aa: «Te ndóò va pɛ maa Hala co Fuɲa nia ni, la va ya kaola, kani o Hala nin ya fula ni mí hun. O co a ba ni le ya hin te, ndu vem ya ni.

⁴³ Le yɛɛ niaa co yɛ kɛɔ sɔɛi nii bila biyɔɔ? Kani la yeema mì la tuei sɔɔn nun te.

⁴⁴ Masa ɲinaa vɔɔnda co fuɲa nia ni, nduyɛ hɛnan fuɲa niaa-o niaa yeema tosaa ni. Kabi o tasendɔ, vana diuvaa n'vanndo o yɔŋnun ni, o sim lɔ́ɔ́-lɔ́ɔ̀ o toɲaa coo le, kani toɲa co ndu nin te. O va pɛ keiyo còòlan dimio, ken vil vana celen te, kani vana lacòòvaa a fuɲaa còòlan o co ni.

⁴⁵ Ya niko, le tùú ya co toɲaa dimio-o niaa co ya kɛɔ laalanndo ni.

⁴⁶ O niaa tɛɛn, nɛ̀ɛ́ cɔm yɛ ya maa i tosa hakio? Te toɲaa ya co yɛ dimio ni, le yɛɛ niaa co yɛ niko ya kɛɔ laalanndo?

⁴⁷ Vana co vana Hala-o-o, nilan o yaŋ o sɔɛi Hala-e ni. Niaa la yeŋ lani le, kani la co vanaa Hala le.»

Yeesu nda Abraham

⁴⁸ Mí Yuifia mulul ndu aa: «N nɔ manɔa di le dimio maa Samarinɔɔ le n co, mì ɲina vɔɔndo va nɔm nin te?»

⁴⁹ Mí Yeesu muli aa: «Ɲina vɔɔn co ya nin te, kɛ Fuɲa nuu ya co bɛɛlen keo ni, mì niaa va ya bɛ̀ɛ̀lan tɛɛmbuuo.

⁵⁰ Ya, o co biilu ni ya pila le ya co nuwviaa le, vana pum co ndu nuwviaa ni, ndu kialu yamɛi ni.

⁵¹ I co niaa toɲaa dimul kpendekele, vana bii pɛ sɔɔn nun, ndu vi le.»

⁵² Mí Yuifia dimul ndu aa: «N sina nihau maa ɲina vɔɔndo co nɔm nin ni. Abraham vi, vanaa-tɛɛngaa-diom Hala-a bɛɛ co hau ciee-piɔ́m, nɔm hin naa dimullo maa vana bii pɛ sɔɔn nɔmndon, o vinin te.

⁵³ Mò va maa nɔm hiow Abraham fuɲa naa vi-o ni? Vanaa-tɛɛngaa-diom Hala-a bɛɛ a vi. Nɛ̀ɛ̀ nɔm pila co yɛ niko cɔnnɔnndo?»

⁵⁴ Mí Yeesu muli aa: «Te ya pila sangalan pɛ, mɛɛ biilu nuu co ɲɛ-ɲɛ le. Fuɲa nuu bɛnda le ya biiloo ni, o niaa co kon dimio maa ndu co Hala niaa ni-o pɛɛn!

⁵⁵ Kɛ la sina ndu le. Ya yɛ, i sina ndu. Te i dimi pɛ maa i sina ndu le, i siŋnun ɲɛ pilɔɔ naa niaa, vana lacòòvaa pɛɛn. Kɛ i sina ndu, i co sɔɛi ndɔɛi biyɔɔ.

⁵⁶ Mí Abraham fuɲa nia dɔawnun ɲaale, kani ndóò nɔ o kɔl maa ndóò canin paale ya va hunɔɔ len, nduyɛ mó ca len, mó dɔawnun ɲaale taw.»

⁵⁷ Mí Yuifia dimul ndu aa: «A nɔ vɔ bɛɛ vɔsila beleŋuɛɛnu le, a dimi aa má ca Abraham?»

⁵⁸ Mí Yeesu dimul nda aa: «I co niaa toɲaa dimul kpendekele, lɔ́ɔ́ pá mi Abraham fula, ya i va nin.»

⁵⁹ O kon, má cua powtan le ndu viiyo. Kɛ mí Yeesu viannun, mó fula o Cɛi-Hala-o nin.