Nsaŋ 7 - BII BILA

Pɔmbɔa Yeesu-a laalan ndu le

¹ O kon kɔɔli, mí Yeesu va balɔɔ o tàndá Kalile-o nin, kani ndóò yeema mi ndóò balu tàndá Yuda-o le, bau Yuifia va nɛilan nuwviaa le ndu diyɔɔ.

² Nduyɛ Kafo-Lakuu Yuifia ndóò sɔɔnguu nin.

³ Mí puapilɛa ndɔa dimul ndu aa: «Faŋan nanu mà kɔɛ o tàndá Yuda-o nin, haliko mi kaandeŋaa nɔmnda bɛɛ kɔ cɔ dɛnnda kaamaala n co tosaa lan.

⁴ Vana yeema pɛ mì vannda sina ndu, o tosa sɔɔn o vionnɔnndo nin te, te nuaa n co dɛnndan tosaa ni, mɛɛ cɔmnun vannda kpendekele.»

⁵ Kani hali pɔmbɔa ndɔa ndáà laalan ndu le.

⁶ Mí Yeesu dimul nda aa: «Le ya, telen tiiya vɔ le, kɛ le niaa niaa, telenndan kpow la naŋ.

⁷ Ceendo nɔla niaa kɛɔ le, a ya koni o nɔ nɛyɔnndo ni, kani i co cɔmndo maa dɛnnda ndɔlan la niŋ te.

⁸ Niaa, la hel mì la kɔɛ o kafoo. Ya i hel lɔnin o kafo kon te, kani telen tiiya vɔ le ya le.»

⁹ Mɛɛ o cii nda dimul lende, mó lonnun Kalile.

Yeesu kɔɛ Yerusalɛm o kafo lakùùo

¹⁰ Pɔmbɔa ndɔa kɔlan o kafoo, mí ndu pila bɛɛ koma kɔa, o fula vannda o hɔl vakpa le, maa o vionnɔn nin o kɔɛ ni.

¹¹ Yuifia va ndu nuwviaa o kafoo, má va ɲuuniaa le ba o va-o.

¹² Mí vannda va sɔɔn pɔmbɔn taw o sɛ́lɔ́ɔ́ tɛɛn a ndu o kɔɔ. A pum va dimio aa: «Vana tosaa dɛnɛ kɛndɔɔ o co ni.» Mí a pum nda va dimio aa: «Ɛ-ɛ, vannda o co lueiyo o pɔwlan nin ni.»

¹³ Kɛ nduyɛ, vana-vana ve isɔɔ vakpa a ndu o kɔɔ le, kani siòònde va nda a Yuifia.

¹⁴ Ndáà tiiya nin tɛɛn a kafoo, mí Yeesu hel o Cɛi-Hala-o nin, mó va vannda pɛɛkoo.

¹⁵ Mí kɔndɔfillo va Yuifia biyɔɔ, ma va dimio aa: «Ndu sɔla pɛɛku bɔɔ loo, vɛ̀ɛ̀ o looku yɛ Sɛbɛ Hala-o sinaa?»

¹⁶ Mí Yeesu mulul nda aa: «O co o ya pila nin te ɲɛ ya co vannda pɛɛkoo-o co fulaa le, kɛ vana vem ya-o o ba.

¹⁷ Vana yeema pɛ hɛnan Hala-o tosaa, ndu sinanin te Hala o ba ɲɛ kon co fulaa ni, te kon te ya pila o ba sɔɔn ya co dimio-on n co fulaa ni.

¹⁸ Vana co sɔɔn ndu pila-on dimio-o, biilu ndɔ ndu pila-o o nuwviaa ni, kɛ vana co biilu vana vem ndu-o nuwvia-o, vana toɲaa co kon ni, kafala co ndu nin te.

¹⁹ Vɛ̀ɛ̀ o co tɔŋndo le Moise ke niaa le? Nduyɛ niaa kpede, vana-vana co kela o tɔŋ kon coo le. Le yɛɛ niaa co yɛ niko nɛilan nuwviaa le ya diyɔɔ?»

²⁰ Mí sɛ́lɔ́ɔ́ mulul ndu aa: «Ɲina vɔɔndo co nɔm nin ni, ndu co nɛilan nuwviaa le nɔm diyɔɔ ni.»

²¹ Mí Yeesu dimul nda aa: «Dɛnɛ kaamaa ndu pilɛ kpé ya tosa ni, mí la dɔawnun kɔndɔfili.

²² Moise dimul niaa le toomaa, kɛ o co dɔ́ɔ́ ndu o ba le o fula le, fuɲaa naa mamaa mel naa ndu ni, mì la va yɛ niko cɛlɔɔ le vannda toomaa diyɔɔ o paale pɛngiaalen coo.

²³ Te la dii pɛ vanndo tooma o paale pɛngiaalen coo, haliko la del kasi a tɔŋ Moise-o le, le yɛɛ niaa tambu yɛ niko kɔl a ya le vanaciee ya singi o paale pɛngiaalen coo-o?

²⁴ La kialu yamɛi le kiolɔɔ lan te, kɛ la va pɛ yamɛi kiolɔɔ, la kiolu yamɛi sandɛi sakpo.»

Vɛ̀ɛ̀ Yeesu co vana Mɛlɛka hɛli-o ni?

²⁵ Mí vanaa va icali Yerusalɛm-nda pum a va dimio aa: «O co langbanɔɔ ho le nda co nuwviaa le ndu diyɔɔ le?

²⁶ Má cè ndu sɔɛi kpendekele! A co ndu ɲɛ-ɲɛ dimul te. Mò va maa sinaa simlacia sina lekɛ́ndɛi ni maa ndu co Krista ni?

²⁷ Telen vana Hala hɛli-o hunnin-ndo, vana-vana sinanin nɛɛ o fulanin-nda le, kɛ langbanɔɔ ho ndu, n sina nɛɛ o fula-a.»

²⁸ O kon, Yeesu va vannda pɛɛkoo o Cɛi-Hala-o nin, mó deŋi aa: «La sina ya, la sina nɛɛ ya fula-a. Nduyɛ i hin a ba ni le: vana niaa bɛnda le laalanndo-o vem ya ni, la sina ndu masinaa le tuŋ.

²⁹ Ya yɛ, i sina ndu, o vomɔɔ ndɔɔ nin ya co ni, ndu vem ya ni.»

³⁰ A va nɛilan nuwviaa le ndu biyɔɔ, kɛ vana-vana ve ndu ba holɔɔ le, kani telen ndɔɔ ndóò tiiya vɔ le.

³¹ Mí vanaa bɔɔ-bɔɔ o sɛ́lɔ́ɔ́ tɛɛn a laalan ndu, ma va ɲunanndo aa: «Hunɔɔ Krista co-o, o tosanin pá dɛnnda kaamaalan mò hiow langbanɔɔ ho?»

A vem kpalillla le kɔlan Yeesu biyɔɔ

³² Faliisia tueyɔɔ ɲɛ vannda va dimio a ndu o kɔɔ-o, mí bolii vanaa-solia-lasálàá a Faliisia viam kpalilla le ndu kɔlan biyɔɔ.

³³ Mí Yeesu dimi aa: «I co vɔ latulu naa niaa le telen bingi, o kon kɔɔli i muungun o vana vem ya-o lo.

³⁴ La nuwviaanin ya, kɛ la seelunnin ya le, nɛɛ ya vanin-nda, la nɔlanin kɔlan ndon te.»

³⁵ Mí Yuifia dimulan aa: «Kuɛɛ o kɔa yɛnin mì n bumba ndu saalɔn? Mo va o Yuifia co a sɛŋiannda Krɛkia tɛɛn-nda lo o kɔanin mo kɔ pɛɛku Krɛkia ni?

³⁶ Ɔ́ɔ̀ kɔlɔ sɔɛi o dimi hee-e aa: ‹La nuwviaanin ya, kɛ la seelunnin ya le, nɛɛ ya vanin-nda, la nɔlanin kɔlan ndon te.›?»

Yeesu soo a mɛmma cindan o kɔɔ

³⁷ O paale mɛɛlaalen, paale bɛndule kafolen, mí Yeesu can isisi, mó deŋi aa: «Vana kolɔɔ bii pɛ, o hun o ya lo mo kol.

³⁸ Vana laalan ya pɛ, peela mɛmma cindan la piɔlnin ndu nin maa mɛɛ o Sɛvan yɛ.»

³⁹ A Kɔl-Diandaa vanaa laalan ndu-a ndáà sɔlanin-ndo o kɔɔ o va sɔɛi ni, kani Kɔl-Diandaa ndóò yɔngun ndɔ nda le, bau Yeesu ndóò hel-lɔ o biilu ndɔɔ nin te.

Sɛyanndo yɔŋnun o sɔɛi Yeesu-e coo

⁴⁰ Sɛ́lɛ́ va lon-ndo ciiyo sɔɔn o va dimio-on tueyɔɔ, má va dimio aa: «Vana-tɛɛngaa-diom Hala-o kpeekpei langbanɔɔ ho co ni.»

⁴¹ Mí a pum nda va dimio aa: «Krista co hoo ni.» Kɛ mí a tiŋ nda va dimio aa: «Mò va maa Kalile Krista fulanin ni?»

⁴² O co o Sɛvaa maa o polale David len, Bɛtlɛhɛm ciee, nɛɛ David va calle-a Krista fulanin ni.

⁴³ O kon mí sɛyanndo yɔŋnun sɛ́lɔ́ɔ́ tɛɛn o sɔɛi ndɔɛi ken coo.

⁴⁴ Vanaa pum nda tɛɛn ndáà yeema mì ndáà bii ndu, kɛ vana-vana hol ndu baa le.

Laalan lepɛŋ simlacia Yuifia

⁴⁵ Kpalilla muungoo o bolii vanaa-solia-lasálàá a o Faliisia lo, má kɔ ɲuna nda aa: «Le yɛɛ niaa kɛɛ yɛ ndu biyɔɔ?»

⁴⁶ Mí kpalilla muli aa: «Kabi bɛɛ vanaciee suu vɔ maa langbanɔɔ ho le.»

⁴⁷ Mí Faliisia keleŋa muli aa: «Mò va maa nɔlaa o kɔ nɔla niaa koni vɛlɛ a sondo ni?

⁴⁸ La ce nin simlacia vana pilɛ te kon te Faliisia vana pilɛ bɛɛ kpé ndu laalanndo?

⁴⁹ Kɛ sɛ́lɔ́ɔ́ ho sina tɔŋndo le, vanaa dɛnɛ palaa co cumndo-a nda co ni.»

⁵⁰ Nikodɛm ndóò kɔɛ paale pilɛ o Yeesu lo-o va vana pilɛ o kunda Faliisia kan nin, mó dimul nda aa:

⁵¹ «Vɛ̀ɛ̀ tɔŋ naa cɛl pá mì n kelu yamɛi vanndo te o co mi vana kon soo, mì vana sina dɛnɛ o tɛɛmbuu-o le?»

⁵² Má mulul ndu aa: «Mò va maa nɔm bɛɛ Kalile n fula ni? Yaasiaa ɲɛkɛndɛi, a canin maa vana-tɛɛngaa-diom Hala fula Kalile le.»

Sɔɛi cua nda bii o suundaa-o

⁵³ Mí vana-vana kɔannun o ndu lo bɛɛ.