Nsaŋ 5 - BII BILA

Yeesu singi langbanɔ falun vílɛ́iyo

¹ O kon kɔɔli, mí kafo Yuifia pum tiiya, mí Yeesu hel Yerusalɛm ciee.

² Mɛnndan ma pum ma va o Dio-n'saa ikɛi Yerusalɛm a tongolan tan ŋuɛɛnu, fonda mamɛn kon diolan o hebrei nin aa Betɛsda.

³ Vanaa lanaa sɛ́lɔ́ɔ́ taw a va ihini o tongola lan nin: vanaa sumɛiya, namtaa, vanaa falun vílɛ́iya. [A va cumndo le mɛnndan biiŋɔnndo,

⁴ kani mɛlɛkanɔɔ pum va tolɔɔ a telenndan lapum o mɛmma man nin le man biiŋoo. Vana-vana óò tol pɛ tase o mɛmma biiŋuamma man nin, ndóò sengu, mɛ̀ɛ́-mɛ̀ɛ́ naa kon ndóò va].

⁵ Langbanɔ pilɛ va lon, ndóò cii nin vɔsilan beleyaa a laŋɔmaa a nàá.

⁶ Mɛɛ Yeesu ce ndu ihini lɛŋ, mó sina maa ndóò viow nin ndon. Mó ɲuna ndu aa: «A yeema mà sengu?»

⁷ Mí vana nàà kon dimul ndu aa: «Maalii, i nɔ vana tuisi ya o mɛnndan nin telen mɛnndan ma co biiŋɔn-ndo le, i cɛn pɛ toosianndo le kɔlan, vana celen tol-la tase.»

⁸ Mí Yeesu dimul ndu aa: «Cɔn, cua ɲɛ hinia nɔmndo ma kɔɛ!»

⁹ Fɔ́ɔ́fɔ̀, mí langbanɔ kon siangu, mó cua ɲɛ hinia ndɔɔ, mó kɔa.

¹⁰ Nduyɛ paale pɛngiaalen le va ɲinkon ni, o kon mí Yuifia dimul vana Yeesu singi kon-ndo aa: «Paale pɛngiaalen le co hau ni, a bɛnda ma siilun ɲɛ hinia nɔmndo le.»

¹¹ Mó mulul nda aa: «Vana singi ya-o dimul-la ni aa: ‹Cua ɲɛ hinia nɔmndo mà kɔɛ.›»

¹² Má ɲuna ndu aa: «Ɔ́ɔ̀ vana dimul nɔm kon aa: ‹Cua ɲɛ hinia nɔmndo mà kɔɛ-o?›»

¹³ Kɛ langbanɔ Yeesu ndóò singi kon-ndo sina ndu le, kani Yeesu ndóò luɛinun nin sɛ́lɛ́ va lon-ndo tɛɛn.

¹⁴ O kon kɔɔli, mí Yeesu kɔ saalun ndu o Cɛi-Hala-o nin, mó dimul ndu aa: «Mɛɛ n sɔla siongɔɔ nuaa yɛ, tosa lɛ haki le dɛ, yɔŋii dɛnɛ hiow hoo vɔwlen-ndo komal nɔm.»

¹⁵ Mí langbanɔ kalaa kɔannun, mó kɔ dimul Yuifia maa Yeesu singi ndu ni.

¹⁶ Cɔn o telen kon, mí Yuifia toal Yeesu kɔɔli le tùú o va dɛnnda lan tosaa o paale pɛngiaalen coo-o.

¹⁷ Kɛ mí Yeesu dimul nda aa: «Haa hau, Fuɲa nuu co hiovɔɔ laci a vallo tosaa, ya bɛɛ i co vallo.»

¹⁸ Le diom o dimi kon-ndo, mí Yuifia can nɛilan nuwviaa le ndu diyɔɔ, o co vɔ le tùú o va tɔŋ paale pɛngiaa tɛɛmbuuo-o le, kɛ le tùú o va dimio-o maa Hala co Fuɲa ndɔ kpeekpeiyo ni, mó va ndu pila siingɔnndo Hala-o.

Kpaaya Po Hala-o

¹⁹ O kon mí Yeesu mulul nda aa: «I co niaa toɲaa dimul kpendekele, Poo nɔla ɲɛ-ɲɛ tosa a ba ndɔ le, fɔ ɲɛ o ce Fuɲaa tosaa-o. Ɲɛ-ɲɛ Fuɲaa tosa yɛ pɛ, ndu Poo bɛɛ tosa ni.

²⁰ Kani Fuɲaa kaola Poo, o cɔm ndu ɲɛ-ɲɛ o co tosaa, o cɔmnin ndu dɛnnda bɛndula hiow lan-ndan, haliko mi kɔndɔfillo bii niaa.

²¹ Kani mɛɛ Fuɲaa tindi vanvílɛ́iya má muungu yoomu yɛ, lende koni Poo bɛɛ yɔngù vanà o yeema-o yoomoo ni.

²² Hiovɔɔ o kon coo, Fuɲaa kilù vana-vana iyama le, kɛ Poo o ke dio le yaman kpow kiolɔɔ ni,

²³ haliko mi vannda kpow a biilu Poo mɛɛ nda co Fuɲaa biiloo yɛ. Vana biilu Poo le, mɛɛ o biilu Fuɲa vem ndu-o le.»

²⁴ Mí Yeesu hiaw laci a nda dimullo aa: «I co niaa toɲaa dimul kpendekele, vana-vana tuei pɛ sɔɛi nii mò laalan vana vem ya-o, vana kon ndu sɔla cinda fɛɛn-fɛɛndo, o sɔla yaala le, kɛ o fula o piɔ́mndo nin, mó muungu yoomu.

²⁵ I co niaa toɲaa dimul kpendekele, telen pum co tiiya, o tiiyaa koni o co yɛ nin nuaa ni, mì vanvílɛ́iya tuei Po Hala-o diom, nduyɛ vanaa tueinin ndu kan diom-nda a vanin yoomu.

²⁶ Kani mɛɛ Fuɲa nuu nɔ yoomoo niŋ yɛ, lende koni o cɛl ni mí Poo bɛɛ nɔ yoomoo.

²⁷ Mó ke ndu dio le yamɛi kiolɔɔ, kani Po vanacieo o co ni.

²⁸ Kɔndɔfili bii niaa le ken te, kani telen pum co hunɔɔ tiiya mì vanaa co o sɛilan nin-nda kpow a tuei diom ndɔɔ,

²⁹ mà fula. Vanaa tósa dɛnɛ kɛndɔɔ-a cannin mà muungu yoomu, mì vanaa tósa dɛnɛ vɔɔndo-a muungu yoomu le yamɛi ndɛi kiolɔɔ, mà yaala nda.

³⁰ Ya, i tiwbà ɲɛ-ɲɛ tosa a ba ni le, mɛɛ ya tuɛi yɛ, lende ya i kialu yamɛi ni. Nduyɛ yamɛi kɛ́-kɛ̀ ya i kelu pɛ, i sandu, kani o co hɛnan ni le ya co nuwviaa le, fɔ hɛnan vana vem ya-o.»

Seilen a Yeesu o kɔɔ

³¹ «Te a ya pila o kɔɔ yáà va seilen timbio ni, seile nilen léè venin toɲa le.

³² Kɛ vana celen co seilen timbio a ya o kɔɔ ni, nduyɛ i sina maa seile o co timbio a ya o kɔɔ len le co toɲa.

³³ Mí la viam kiilaa o Nsaŋ-ndo, mó timbi seile toɲalen.

³⁴ Ya ya, i hewba le seile vanaciee le, kɛ i co ken kpow dimio haliko mi la sɔla cindaa.

³⁵ Fitinaa va biyɔɔ mì ɲɔɔ va tengaa-o Nsaŋ yɔŋnun ni. Niáà yeema le ɲaaloo dɔwnɔnndo o ɲɛ-tengaa ndɔɔ le telen bingi.

³⁶ Nduyɛ ya, seile nilen le hiow polon a le Nsaŋ-nden, kani hali dɛnnda Pua cɛl-la le tosaa mì va lan tosaa lan bɛɛ la cɔm maa Pua vem ya ni.

³⁷ Pua vem ya-o bɛɛ timbi seilen a ya o kɔɔ. Kabi bɛɛ la tui diom ndɔɔ le, la ci hɔlaa ndɔa le,

³⁸ sɔɛi ndɔɛi co niaa o lakɔl te, kani la laalan vana o vem-ndo le.

³⁹ La co O-Sɛvanndo yaasiaa ɲɛkɛndɛi, kani la yiyan maa lenin niaa sɔlanin cinda fɛɛn-fɛɛndo ni. O-sɛvan kon-ndo kpeekpei co seile nilen timbio ni.

⁴⁰ Nduyɛ, la yeema mì la hin o ya lo le cindaa sɔlaa le.

⁴¹ O co candula vanndacieea le ya co kɔɔli le.

⁴² Mò va maa i sina masinaa niaa le! La nɔ kaola Hala-o o kɔl te.

⁴³ O diola Fuɲa nuu ya hin ni, nduyɛ la cɛl-la le. Te vana celen hin pɛ o diola ndɔla ndu pila lan, la cɛl ndu.

⁴⁴ Vɛ̀ɛ̀ niaa nɔla yɛnin laalanndo, la co niaa pila candanndo vellaa-velle, la co candɔɔla Hala lan kínɛí nuwviaa le?

⁴⁵ La yiyan maa i lɔalunin niaa o Pua lo le. Vana co niaa lɔlɔɔ-o co Moise ni, ndu niaa kɛsi kɔllo coo ni.

⁴⁶ Kani te la laalan pɛ Moise, mɛɛ ya bɛɛ la laalannin ya, kani a ya o kɔɔ o sɛva ni.

⁴⁷ Kɛ te la laalan sɔɔn o sɛva-on te, vɛ̀ɛ̀ niaa laalan yɛnin sɔɔn nun?»