Nsaŋ 20 - BII BILA

Sɛi nda kumbu Yeesu nin-ndo connun fondo

¹ O paale tasele lɔ́ɔ́ coo, ɲɔɔ va vɔ yifidii, mí Mari fula Makdala-o kɔa o sɛiyo. O komal pow ndáà kinda sɛiyo-o o faŋaa.

² Mó ɲaanun, mó kɔ komal Simɔn Piɛr a kaandennɔɔ pilɔɔ, o Yeesu ndóò kaola taw-vo, mó dimul nda aa: «A cii Maalii soli o sɛiyo nin, n sínà nɛɛ nda kɛsi ndu le.»

³ Mí Piɛr nda kaandennɔ kon a fula, má kɔa o sɛiyo.

⁴ Nda ŋiɔn kpow a va kɔlan a kiltan, mí kaandennɔɔ pilɔɔ hiaw Piɛr kiltan, mó tiiya ndu tase o sɛiyo.

⁵ Mó tundun le tofaa, mó ca kolala fengbɛlan la kɛsiaalan lɛŋ, kɛ o luei le.

⁶ Mí Simɔn Piɛr bɛɛ tiiya, mó luɛi o sɛiyo nin, mó ca kolala fengbɛla lan lɛŋ,

⁷ a kola ndáà handu Yeesu o bollen coo-o, o ve nɛɛ pilɛ a kolala n'pɛngɛla lan te, o va o tuituiyaa o kɛsiaa landɔ teengen.

⁸ O kon mí kaandennɔɔ pilɔɔ, o tase keleŋa tiiya o sɛiyo-o bɛɛ luɛi. Mó ca, mó laalan.

⁹ Kani háá o telen kon, kaandennda ndáà bii-yɔ ɲɛ Sɛbɛla Diandaalan láà dimi-o bila maa Yeesu ndóò tendulnin mò fula vanvílɛ́iya tɛɛn te.

¹⁰ Mí kaandeŋaa ŋiɔŋaa kalaa muungun o la nda lo.

Yeesu cɔmnun Mari fula Makadala-o

¹¹ Mari va isisi caŋndo o sɛiyo sondoo. Mó tundun a caŋndo lende le tofaa o sɛiyo nin.

¹² Mó ca mɛlɛkaa nda ŋiɔn, volɔɔla humbulan la va nda lekɔɔ, a va icali o fonda ndáà kɛsi dialun Yeesu-on-ndo. O pilɛ o fonda bollen le va-o, o pilɔɔ o fonda pelon va-o.

¹³ Mí mɛlɛkaa kan a ɲuna ndu aa: «Vuɛɛndo, le yɛɛ nɛ n co yɛ caŋndo?» Mó mulul nda aa: «A cii Maalii ni vi-o cua, i sínà nɛɛ nda kɛsi ndu le.»

¹⁴ O mei bɛɛ sondo le, mó mulin, mó ca Yeesu isisi, kɛ o síná maa ndu le.

¹⁵ Mí Yeesu ɲuna ndu aa: «Vuɛɛndo, le yɛɛ nɛ n co yɛ caŋndo? Nɛ̀ɛ́-nɛ̀ n co yɛ nuwviaa?» Mari ca ko bɛɛ aa vana baala nakɔɔ ni, mó dimul ndu aa: «Fallo, te nɔm faŋa dialun Yeesu-on ni, mɛɛ dimul-la nɛɛ n kɔ kɛsi mun-nda, mì kɔ cua.»

¹⁶ Mí Yeesu dimul ndu aa: «Mari!» Mó síná ndu, mó veelu ndu aa: «Kɔɔfa!»

¹⁷ Mí Yeesu dimul ndu aa: «Pilan ya le, kani i hel-lɔ o Pua lo le. Kɛ kɔ dimul puapilɛa nia aa i co helɔɔ o fuɲa nuu a fuɲa niaa lo, o Hala nuu a Hala niaa lo.»

¹⁸ O kon mí Mari fula Makdala-o kɔa o kaandennda lo, mó kɔ dimul nda aa: «I ce Maalii!» O kon mó dimul nda sɔɔn o dimul ndu-on.

Yeesu cɔɔmun kaandeŋaa ndɔa

¹⁹ Paale len le va paale taselen o lɔ́ɔ́ kon nin ni, diolan la va lakindaalan nɛɛ kaandennda va-a, kani siòònde va nda a Yuifia. Mí Yeesu hun, mó sim nda tɛɛn, mó dimul nda aa: «Màá la sɔla kɔlɲuloo!»

²⁰ Mɛɛ o dimi lende, mó cɔm nda bala ndɔlan a lumgbui ndɔɛi. Mí kaandennda dɔawnun ɲaale le Maalii cɔu.

²¹ Mí Yeesu dimul nda vɛlɛ aa: «Màá la sɔla kɔlɲuloo! Maa mɛɛ Pua vem ya yɛ, ya bɛɛ i vem niaa.»

²² Mɛɛ o cii sɔɔn mun dimi, mó hul nda, mó dimi aa: «La sɔla Hala Kɔl-Diandaa.

²³ Hakila vanaa niaa malnin haki-a la malnunnin haki, la vanaa niaa melnin haki le-a la lonin nda coo.»

Yeesu nda Tomas

²⁴ Tomas, o ndáà veelu aa Didim-ndo, vana pilɛ o kaandeŋaa tɔ́ a à ŋiɔnda tɛɛn, ndu ve lon lɔ́ɔ́ Yeesu hin-ndo le.

²⁵ O kon mí kaandeŋaa tɔ̀a dimul ndu aa: «N ce Maalii se!» Kɛ mí Tomas dimul nda aa: «Te i ci foofola n'pɔɔndɔlan ndu o laba, mì vow suei nɛɛ pɔɔndɔn n luɛi ya le, te i vow ndu baa o ilungbu le, i laalàn ndi le.»

²⁶ Palɛi ŋɔmaa o kon kɔɔli, kaandeŋaa Yeesu-a va vɛlɛ cɛinin, Tomas va latulu a nda. Mí Yeesu hun, diolan la va la kiindiaa lan, mó sim nda tɛɛn, mó dimul nda aa: «Màá la sɔla kɔlɲuloo!»

²⁷ O kon, mó dimul Tomas aa: «Siɛndi suei mà vow, tofa ya balan. Siɛndi vɛlɛ baa mà vow ya o ilungbu, pɛngi sikaa mà laalan!»

²⁸ Mí Tomas mulul ndu aa: «Maalii nuu a Hala nuu!»

²⁹ Mí Yeesu dimul ndu aa: «Le mɛɛ n ce ya yɛ n laalan ni baa? Dɛnɛ kɛndɔɔ co le vanaa ci ya le-a, kɛ má laalan!»

Le kɔlɔ sɛbɔɔ ho sɛvan-ndo

³⁰ Yeesu tosa vɛlɛ dɛnnda kaamaala bɔɔ-bɔɔ kaandeŋaa ndɔa o hɔl, la sɛvan o sɛbɔɔ ho nin te lan.

³¹ Kɛ mun sɛvan haliko mi la laalan maa Yeesu co Krista ni, Po Hala-o pɛɛn. O kon la laalan pɛ, la sɔla yoomoo o diola ndɔlan.