Nsaŋ 2 - BII BILA

Kafo lanɔ sɛnɛiyo Kana

¹ Palɛi yaa o kon kɔɔli, mí kafo lanɔ sɛnɛiyo tosan Kana o tàndá Kalile-o nin. Kalaa Yeesu va lon.

² Yeesu bɛɛ va o veelaa o kafo kon nda kaandeŋaa ndɔa.

³ Mɔiyan maa cuvɔɔ, mí kalaa Yeesu dimul ndu Yeesu aa: «Mɔiyan ma cuu nda o ba!»

⁴ Mí Yeesu ɲuna ndu aa: «Vuɛɛndo, mi vɛ̀ɛ̀ ya yɔŋ yɛ? Telen nuu tiiya vɔ le.»

⁵ Mí kala ndɔ dimul buɛiya aa: «Mɛ̀ɛ́-mɛ̀ɛ́ o dimul niaa pɛ, la tosa lende.»

⁶ Kpɛɛnɛn lapowvon pum va lon mún ŋɔmpum, le dindin Yuifia n va ni. I kɛ́-kɛ̀ va le litililan kɛmɛ lediin.

⁷ Mí Yeesu dimul nda aa: «La pei mɛnndan o kpɛɛnɔn mun nin.» Má pei man yɛlɛlɛ.

⁸ O kon mó dimul nda aa: «La kɔndu niko mì la yoo vana tuisi kafoo-o.» Má yoo ndu man.

⁹ Mí vana kon dombi mɛmma o siinguu man mɔiyan-ndan, o sina nɛɛ mɔima kalan maa fula le, kɛ buɛyaa Yeesu ndóò vem mɛnndan kɔndɔɔ-a ndáà sina.

¹⁰ Mó veelu vana yil lanɔɔ sɛnɛi-yo, mó dimul ndu aa: «Mɔima kɛndɛ-kɛndɛan fɔlɔn vana ke mialla ni. Vannda kol man pɛ taw, a yɔngu niko nda ma niŋ lapi le-an. Kɛ mí nɔm manda mɔima kɛndɛ-kɛndɛan man háá telenndo ho.»

¹¹ Dɛnɛ Yeesu tosa kon Kana o tàndá Kalile-o nin-ndo yɔŋnun kaamaa ndɔ tasoo ni. Mó cɔm biilu ndɔɔ, o kon mí kaandeŋaa ndɔa laalan ndu.

¹² O dɛnɛ kon kɔɔli, mó toal Kapɛrnaum nda kala ndɔ, pɔmbɔa ndɔa a kaandeŋaa ndɔa. Palɛi bingi koni nda kɔ tosa lon ni.

Yeesu tow yulaa o Cɛi-Hala-o nin

¹³ Kafo Yuifia va nin kpɛɛlun, kafo-hiavaa-coo pɛɛn, mí Yeesu hel Yerusalɛm.

¹⁴ Mó komal vannda co nawva, saa a kangboa pisio o Cɛi-Hala-o nin, mó komal vɛlɛ vanaa singaa n'volia.

¹⁵ Mó toosiaa kɔlulen lepum a yoei, mó toaw nda kpede, mó soli nda o Cɛi-Hala-o nin, mó soli vɛlɛ saa a nawva, mó sɛŋi volin vannda va singaa-on, mó ɲiinduu tabalilan,

¹⁶ mó dimul vanaa va kangboa pisio-a aa: «La soli nda nanu, la siinguu cɛi Fuɲa nuu cɛi leyula le.»

¹⁷ Mí kaandeŋaa ndɔa loonun maa i co i sɛvaa aa: «Kaola ya nɔ le Cɛi nɔmndo-o co ya lomɔɔ maa leyin.»

¹⁸ O kon mí Yuifia cua sɔɛi, má dimul ndu aa: «Ɔ́ɔ̀ tɔɔmasale cɔm naa maa a nɔ dí le tosaa nuaa-o?»

¹⁹ Mí Yeesu mulul nda aa: «La tɛɛmbuu vɔ Cɛi-Hala-o ho, i minginin ndu simi o palɛi yaa bɛngu.»

²⁰ Mí Yuifia dimi aa: «Vɔsilan belehiɔɔlu a laŋɔmpum n co Cɛi-Hala-o ho tangullo, ndu nɔm dimi le mingio simio o palɛi ndii yáá bɛngu nuaa ni?»

²¹ Kɛ cɛi Yeesu va sɔɛi ndɔɛi dimio-o co dialun ndɔn ni.

²² Mɛɛ o tendu fulaa vanvílɛ́iya tɛɛn, mó muungu yoomu, mí kaandeŋaa ndɔa loonun maa ndóò dimi lende. Má laalan sɔɛi sɛbɛ Hala-o dimi-e a sɔɛi Yeesu ndóò dimul nda-e.

Yeesu sìna kɔl vanacieo

²³ Telen Yeesu va Yerusalɛm o kafo-hiavaa-coo-o, mí vanaa bɔɔ-bɔɔ laalan o diola ndɔlan, lɔ́ɔ́ nda ce dɛnnda kaamaala o va tosaa lan-ndo pɛɛn.

²⁴ Kɛ Yeesu ndu ve nda laalan te, kani ndóò sina nda kpede.

²⁵ Hali mi vanáà cɔm ndu bɛɛ isɔɔ a vanacieo o kɔɔ le, kani ndóò sina ɲɛ co vanacieo o kɔl-lo.