Nsaŋ 16 - BII BILA

¹ Mí Yeesu hiaw laci a nda dimullo aa: «Mun kpow niaa dimullo, haliko la mal nɛiyo le.

² A solinin niaa o cɛila lekaanndan nin. Hiovɔɔ o kon coo, telenndo pum tiiyanin, vanaa vanin niaa diwvo-a vanin yiyanndo maa baala Hala-o nda vanin tosa kon lende ni.

³ A tosanin ken le tùú nda kɛɛ ya a Pua sinaa-o.

⁴ I co niaa ndi dimul, haliko te telen kon hun tiiya pɛ, la loonun maa yáà cii nin niaa ndi dimul.» «I yala niaa ndi dimul kabi o tasendɔ le, kani ya pila va niaa ikɛi.

Vali Hala Kɔl-Diandaa

⁵ Nihau, o vana vem ya-o lo ya co kɔnndan ni, vana-vana co yɛ dɔ́ɔ́ ɲuna le nɛɛ ya co kɔlan-nda le!

⁶ Kɛ le mɛɛ ya dimul niaa lende yɛ kɔlta niaalan la co o sangaa nin ni.

⁷ Kɛ nduyɛ, toɲaa ya co niaa dimullo ni: o co fisa le niaa mì kɔɛ, kani te i koe le, vana ɲɔɔlaa hinnin o niaa lo le, kɛ te i kɔɛ pɛ, i kɔ yɔŋ niaa ndu.

⁸ Telen o hunnin-ndo, o cɔmnin vanndacieea o ceendo ho coo maa a co o pɔwlan nin a dɛnɛ hakio o kɔɔ, a dɛnɛ sandei o kɔɔ a á dɛnɛ yamɛi kiolɔɔ o kɔɔ.

⁹ A dɛnɛ hakio o kɔɔ, kani a laalan ya le.

¹⁰ A co vɛlɛ o pɔwlan nin a sandei o kɔɔ, kani o Pua lo ya co kɔlan ni, la ci lɛnin ya le.

¹¹ A co o pɔwlan nin a yamɛi o kɔɔ, kani yamɛi vana co masalen tosaa o ceendo ho coo-o cuu kiolɔɔ.

¹² I nɔ vɔ sɔɔn taw le niaa dimullo, kɛ la nɔla vɔ mun bila biyɔɔ sunsun te.

¹³ Telen Kɔl toɲaa hunnin-ndo, o cɔmnin niaa dɛnndan kpow o toɲaa nin, kani sɔɔn o diminin-ndon fulanin o ndu pila nin te, kɛ o dimulnin niaa sɔɔn o tuɛinin-ndon kpede, mò dimul niaa dɛnnda hun tosannin-ndan.

¹⁴ O biilunin ya, kani sɔɔn o sɔlanin ya o ba-on o tɛɛngulnin niaa ni.

¹⁵ Ɲɛ-ɲɛ Pua nɔ, le ya o co ni, lelan ya dimi ni maa sɔɔn o tuɛinin ya o sondo-on o tɛɛngulnin niaa ni.»

Mɔnɛi siŋnunnin ɲaaloo

¹⁶ Mí Yeesu dimul vɛlɛ kaandeŋaa ndɔa aa: «O lo ɲɛ-pɔmbɔ, la ci lɛnin ya le, telen bingi o kon kɔɔli, la canin ya vɛlɛ.»

¹⁷ Mí kaandeŋaa ndɔa pum dimulan aa: «Ɔ́ɔ̀ kɔlɔ sɔɛi ndɔɛi he aa: ‹O lo ɲɛ-pɔmbɔ, la ci lɛnin ya le, telen bingi o kon kɔɔli, la canin ya vɛlɛ.› Te kon te aa: ‹I co lakɔ o Pua lo›.

¹⁸ Kɔlɔ yɛɛ co yɛ ‹ɲɛ-pɔmbɔ› o co kon dimio-o? N co sɔɛi ndɔɛi he bila biyɔɔ le few!»

¹⁹ Yeesu sinaa maa a yeema le ndu ɲunaa, mó dimul nda aa: «Mò va maa o sɔɛi ya dimi-e coo niaa co ɲuunianndo le kɔlɔɔ sinaa nuaa ni: ‹O lo ɲɛ-pɔmbɔ, la ci lɛnin ya le, telen bingi o kon kɔɔli, la canin ya vɛlɛ.›

²⁰ I co niaa toɲaa dimul kpendekele, la caŋnin mì la cɛɛŋun, mì ceendo ndu dɔwnun ɲaale. Mɔnɛi biinin niaa, kɛ mɔnɛi niɛi ken siŋnunnin ɲaaloo.

²¹ Telen vialaa tiiya pɛ le vanalanɔɔ, mɔnɛi bii ndu le telen ndɔ tiiya-o, kɛ te o velu pɛ hɔ́ɔ̀, o loonun ndɛ a ɲɛ nɛyaa kei ndu coo-o le. Kani o co va a ɲaaloo le vanaciee yoomaa o velu-o.

²² Lende koni, niaa bɛɛ, mɔnɛi co niaa o lakɔl sunsun, kɛ i canin niaa vɛlɛ, mì kɔlta niaalan la dɔwnun ɲaale, vana-vana nɔlanin ɲaale niaa poonda le.

²³ Paale len, la ɲuna lɛnin ya isɔɔ oo isɔɔ le. I co niaa toɲaa dimul kpendekele, ɲɛ niaa piɛinin Pua o diola nilan-ndo, o kenin niaa ndu.

²⁴ Haa hau, la piɛi-yɔ ɲɛ-ɲɛ o diola nilan te. La piɛi mì la sɔla, haliko mi ɲaale niaa peelun.»

Yeesu nɔla ceendo

²⁵ O talelan nin ya soo o niaa lo ni. Kɛ telen co tiiya, i suu lɛnin o niaa lo o latale nin te, kɛ i dimulnin niaa sɔɔn a Pua o kɔɔ kpendekele.

²⁶ Paale len, la piɛinin Pua o diola nilan, i dimi lɛnin maa i co Pua piɛi le niaa le,

²⁷ kani Pua pila kaola niaa le kaola niaa kaola ya, mí la laalan maa o Pua lo ya fula ni-o.

²⁸ O Pua lo ya fula ni, mì hun o ceendo coo. Sunsun, i co faŋan o ceendo coo, mì muungu o Pua lo.

²⁹ O kon mí kaandeŋaa ndɔa dimul ndu aa: «A soo nihau válán o naa lo, a suu o latale nin te.

³⁰ N síná nihau maa a sínà dɛnndan kpow, hali mi vana ɲuna lɛhau nɔm te, lelan n laalan maa o Hala lo n fula ni.»

³¹ Mí Yeesu ɲuna nda aa: «Vɛ̀ɛ̀ la laalan nihau?

³² Telen co hunɔɔ tiiya, o cuu yɛnin bɛɛ tiiya, mì la sɛŋin, mì vana-vana kɔɛ kpengii ndɔ, mì la mɛi ya ya pilɛ kpé. Kɛ i co ya pilɛ le, kani Pua co ya ikɛi.

³³ Hee kpede niaa dimullo, haliko mi la sɔla kɔlɲuloo o ya nin. La sɔlanin sangaa o ceendo coo, kɛ la vu n'dial te, ya, i nɔla ceendo.»