Nsaŋ 10 - BII BILA

Tale vana mandaa n'saa

¹ I co niaa toɲaa dimul kpendekele aa: «Váná kei o dioo le luɛyɔɔ o hèé saa nin te, kɛ mò kei nɛɛ celen, mò hel, mɛɛ vuiyo co kon ni, vana del vannda coo-o pɛɛn.

² Kɛ váná kei pɛ o dioo le luɛyɔɔ, mɛɛ ndu co váná co saa mandaa-o ni.

³ Vana co sondo hèéo cumullo-o kumbil ndu dioo, mí saa tuei ndu diomndo. A diola ndalan o veelu saa ndɔa ni, mó soli nda.

⁴ O cii pɛ a ndɔa soli kpede, o sim nda laci le kɔlan, a del ndu kɔɔli, kani a sina ndu diomndo.

⁵ Kɛ a delnin vana nda sina loo kɔɔli le, ɲaanɔnndo polon nda ɲaanunnin ndu ni, kani a sina diom ndɔɔ le.»

⁶ Yeesu dimul nda taloo hoo, kɛ a sina yingila ndɔɔ le.

Yeesu vana mandaa n'saa kɛndɔɔ

⁷ Mí Yeesu dimul nda vɛlɛ aa: «I co niaa toɲaa dimul kpendekele, ya co Dio-n'saa ni.

⁸ Vanaa hin ya tase-a kpow, vuiya a vanaa del vannda coo-a nda co ni, kɛ saa yeŋnun nda le.

⁹ Ya, dioo ya co ni, te vanndo kei pɛ o ya nin, mò luɛi, ndu sɔla cindaa. O luɛinin, mò fula, mò saalun nɛɛ diaa kɛndɛa.

¹⁰ Le ciimbuuo, diwvo a tɛɛmbuuo daama vuiyo ndu hun ni. Ya ya, i hin haliko mi saa sɔla yoomoo, mà sɔla ndu taw-taw.

¹¹ Ya, vana mandaa n'saa kɛndɔɔ ya co ni. Vana mandaa n'saa kɛndɔɔ ndu, yoomu ndɔɔ o yɔngu le saa ndɔa ni.

¹² Kɛ vana co saa mandaa le ɲɛ-sɔlaa-o, ndu co vana mandaa n'saa kpeekpei le, o co ndu le nɔ saa le. O ce pɛ tun yondoo hunɔɔ, o ɲaanun, o mɛi saa. Tun yondoo kɔ tol nda coo, o puusiaa nda.

¹³ Ken tosan, kani le volion daama o co baalaa ni, o nɔ buulan le saa le.

¹⁴ Ya co vana mandaa n'saa kɛndɔɔ ni. I sina saa nia, saa nia bɛɛ a sina ya,

¹⁵ maa mɛɛ Pua sina ya, mí ya i sina Pua yɛ, mí yɔngu yoomu nuu le saa nia.

¹⁶ I nɔ vɛlɛ saa celen, nda co vɔ o hèéo ho nin te, nda bɛɛ, mɛɛ mì hin a nda. A tuɛinin ya diom, kundaa ndu pilɛ kpé nda vanin ni, vana mandaa vɛlɛ ndu pilɛ kpé.

¹⁷ Pua kaola ya fúú le, kani i yɔngu yoomu nuu, mí mingin ndu vɛlɛ o ba.

¹⁸ Vana-vana hélú ndu ya o ba le, kɛ ya pila yɔngu ni. I nɔ dí ya yɔ́ngù ndu-o, i nɔ vɛlɛ di ya mingin ndu o ba-o. Lende Fuɲa nuu dimul-la ni.»

¹⁹ O kon mí sɛyanndo yɔŋnun vɛlɛ Yuifia tɛɛn le sɔɔn mun.

²⁰ Mí vanaa bɔɔ-bɔɔ o nda tɛɛn a va dimio aa: «Ɲina vɔɔndo co ndu nin ni. O seema. Le yɛɛ niaa co yɛ ndu yaŋnɔnndo?»

²¹ Mí a pum nda va dimio aa: «Vana seemɛi súú nuaa le! Vɛ̀ɛ̀ mì ɲina vɔɔndo ndu kumbi vana sumɛiyo hɔltan?»

A kɛɛ Yeesu

²² Yerusalɛm ndáà tosa kafoo le loonɔnndo a paale nda sɔɔ Cɛi-Hala-o Hala pila o ba len ni. A sialten ndáà tosa kafo kalaa ni.

²³ Yeesu va kelaa o Cɛi-Hala-o nin, o tongo Salomɔn-ndo bɛngu.

²⁴ Mí Yuifia balu ndu, má dimul ndu aa: «Haa telen kuɛɛ kɔltan la lo yɛnin naa la landaa nuaa? Te nɔm co Krista ni, mɛɛ dimul naa kpendekele.»

²⁵ Mí Yeesu mulul nda aa: «I dimúl nin niaa ndi, la co laalan te. Dɛnnda ya co tosaa o diola Fuɲa nuu lan la co seilen tɛndaa a ya o kɔɔ.

²⁶ Kɛ la co laalan te, kani la co o kunda saa nia coo le.

²⁷ Saa nia tuɛi ya diom. Ya, i sina nda, a co ya kɔɔli.

²⁸ I yɔngu nda yoomu fɛɛn-fɛɛndo. A vinin lɔ́ɔ́-lɔ́ɔ̀ le, nduyɛ vana-vana solinin nda ya o ba le.

²⁹ Fuɲa ni ke ya nda-o, ndu hiow ɲɔɔn kpow. Vana-vana nɔla nda hiɔlɔɔ Pua o ba le.

³⁰ Naa Pua, ɲɔɔ ndu pilɛ kpé naa n co ni.»

³¹ Mí Yuifia cɔwviaa vɛlɛ powtan le ndu viiyo.

³² O kon mí Yeesu dimul nda aa: «I tosa dɛnnda kɛndɛkɛndɛla Pua cɔm ya lan taw niaa o hɔl. O dɛnnda lan nin, le dɛnɛ kuɛɛ niaa yeema yɛ le ya viiyo a powtan mì la dii ya?»

³³ Mí Yuifia mulul ndu aa: «O co le dɛnɛ le naa n co nɔm viiyo a powtan te, kɛ le sɔɛi tanai n dimi-e, kani a cii siingɔn Hala, nɔm vanacieo!»

³⁴ Mí Yeesu mulul nda aa: «O co o sɛvaa o tɔŋ niaa nin maa Hala dimi aa: ‹halaa niaa co ni.›

³⁵ Tɔŋndo veelu vanaa sɔɛi Hala-e dimulun-nda aa halaa. Nduyɛ, o Sɛvan-ndo ndu nɔla faŋan te.

³⁶ Ya yɛ, Hala hɛli ya ni, mó cuu ya o ceendo coo. Le yɛɛ niaa co yɛ niko dimio maa i yei ndu Hala, kani i dimi maa ya co Po Hala-o ni?

³⁷ Nduyɛ te i tosa dɛnnda Fuɲa nuu le, la laalan ya le.

³⁸ Kɛ te i va pɛ dɛnnda lan tosaa, hali mì la laalan ya le, la laalan dɛnnda lan, haliko mi la sina maa Pua co ya nin, mì ya i va Pua nin.»

³⁹ O kon, má can Yeesu kɔɔli le ndu biyɔɔ, kɛ mó hialun nda.

⁴⁰ Mó kɔannun vɛlɛ Yurdɛn peo leeloo, nɛɛ Nsaŋ ndóò kandu vannda yinɔɔ-a, mó kɔ calnun ndon.

⁴¹ Vanaa bɔɔ-bɔɔ a va hunɔɔ o ndu lo, má va dimio aa: «Nsaŋ tosa dɛnɛ kɔndɔfili kɛ́-kɛ̀ le, kɛ ɲɛ-ɲɛ o va dimio a langbanɔɔ ho o kɔɔ, toɲaa o co ni.»

⁴² O kon mí vanaa bɔɔ-bɔɔ a laalan Yeesu lon.