Nsaki 5 - BII BILA

Dɛnɛ palaa co le vanaa bolofaa

¹ Niaa vanaa bolofaa, la caŋ, la koŋul kpélén le dɛnnda palaala toalnin niaa coo lan.

² Bolofaa niaa sɛ, kaangoa cii volɔɔla cuɛinanndan niaalan sɔm.

³ Sianin niaan a volin niaan sɔva. Sɔva kon vanin seilen le niaa ni, mò lom dialun niaan maa leyin. La cuungiaa bolofaa o palɛi mɛɛlɛi he.

⁴ La tofa vɔ, sala vanvalaa kow ciɛɔn niaan-nda, o niaa kungulan coo-o, co yondaa. Nduyɛ cɛɛŋɔnnda vanaa koavaa kan la tiiyaa háá Mɛlɛka nɔ Kpaayaa-Kpow-vo o lani.

⁵ La vìlí ceen niaa o kɔlkɛndɔɔ a o ɲɛm kɛndɔn nin, la pímí kɔlta niaalan le paale diyaalen.

⁶ La yààlá vana sandaa, mí la díí ndu, o símul niaa le.

Biuvɔnndo a piɛilen

⁷ Lelan puapilɛa, la biwnun háá a hunɔɔ Maalii-o. La tofa vɔ mɛɛ vana váà cum kɔmnde ɲɛ o vaa-o a biuvɔnndo taw yɛ, o sina maa fɔ mì piɔɔ sialte tasoo a piɔɔ vɔɔle pɔmbɔɔ sia.

⁸ Niaa bɛɛ, la biwnun, la kɛsi kɔlta niaalan, kani hunɔɔ Maalii-o co nin kpɛɛlun.

⁹ Puapilɛa, sɔɔn pɔmbɔn va niaa tɛɛn te, yɔŋii niaa sɔla yaalaa. La tofa vɔ, vana kialaa iyamaa co isisi o dio.

¹⁰ Puapilɛa niaa, vanaa-tɛɛngaa-diom Hala-a soo o diola Mɛlɛka lan-nda, la cua tɔɔmasele ndaa le sangaa a le biuvɔnndo.

¹¹ La tofa vɔ, n cua nda maa vanaa sɔla dɛnɛ kɛndɔɔ-a nda co ni, vanaa bii kpáŋ má lo lecoo-a pɛɛn. La tuei a biuvɔn Yɔb-o o kɔɔ, la ce ɲɛ Mɛlɛka yɔngu ndu o mɛɛlulan-ndo, kani vana iɲííyo a vana ikɛndɔɔ Mɛlɛka co ni.

¹² Puapilɛa nia, o tasoo, la mɛ̀nan a halataalaa, te kon te a lɛŋnden te, la mɛnan mɛnan súú-súù le. Kɛ oi niaa bɛnda mò va oi, mì ɛ-ɛ niaa va ɛ-ɛ, yɔŋii niaa del o kɔɔsɔɔ nin.

¹³ Vɛ̀ɛ̀ o niaa tɛɛn, vana pum co pá o sangaa nin? O bɛnda mò piɛi. Vanndo pum co pá a kɔlkɛndɔɔ? O bɛnda mò soli condon.

¹⁴ Vɛ̀ɛ̀ o niaa tɛɛn, vana pum co pá a naá? O bɛnda mò veelu kaasoŋaa kɔlkalua kunda vanaa laalannda, mì kan piɛi le ndu, mà suu ndu cuɛiyan o diola Maalii lan.

¹⁵ Piɛile laalannden le singinin vana naá, mì Mɛlɛka mingi ndu o pelon coo. Te o tosa pɛ hakilan, la malnunnin haki.

¹⁶ Lelan, la sɔlɔlan hakila niaalan vellaa-velle, mì la piɛi le niaa pila vellaa-velle, haliko mi la sɔla siongɔɔ. Piɛile kindiannde vana sandaa le nɔ kpaayaa taw.

¹⁷ Elii vanacieo o va maa naa ni, mó lamban piɛiyo maa piɔɔ sia le. O kon vɔsilan tan yáá a paangon mún ŋɔmpum, piɔɔ se o lɛŋnden coo le.

¹⁸ O kon kɔɔli, mó piɛi vɛlɛ, mí halataalaa tuisi piɔɔ, mí lɛŋnden le nɛŋi tɔlɔɔlan.

¹⁹ Puapilɛ nia, o niaa tɛɛn, te vanndo pum luɛi pɛ o pɔwlan nin, mò faŋan o toɲaa coo, mì vana celen mingi ndu o toɲaa coo,

²⁰ mɛɛ o sina pɛngu maa vana pum co, o mìngì vana lahakio o nɛi, mò faŋa ndu o pɔwlan nin-ndo. Ndu baŋa yoomoo o piɔ́mndo hɔl-ndɔ ni, mó kumbu hakila bɔɔ-bɔɔ, mí la ɲum.