Nsaki 2 - BII BILA

Vanndacieea kpow kpen-kpen nda co ni

¹ Puapilɛa nia, niaa laalan Maalii naa Yeesu Krista biiloo bɛnda-o-a, la hiyàn vannda le.

² Te vanndo luɛi pɛ niaa tɛɛn a kelan n'sianion o n'su mò nɔ volɔɔla kɛndɛ-kɛndɛlan lekɔɔ, mì vana bala fondoo bɛɛ luɛi a volɔɔla nɔɔlɛilan lekɔɔ,

³ te la handu pɛ hɔlten vana nɔ volɔɔla kɛndɛ-kɛndɛlan lekɔɔ-o coo, mì la dimul ndu aa: «Nɔm sei, cal nanu o fonda lebɛɛo ho», mì la dimùl vana bala fondoo aa: «Nɔm sei, sim o nda», te kon te aa: «Cal nɛɛ ya kɛsì pelun nun-nda»,

⁴ vɛ̀ɛ̀ o co hiyanndo le niaa tosa kon niaa pila tɛɛn te? O co yamaa nɔ yiyannda vɔɔnndan-nda le niaa siŋnun o kon te?

⁵ Puapilɛa nia hɛnan ya-a, la yaŋ-ndɔ nilan. Vɛ̀ɛ̀ o co hɛlio le Hala hɛli vanaa bala fondoa o ceendo nin le nda siinguuo vanaa bolofaa o laalanndo nin te? O hɛli nda haliko ma sɔla Masale o yiilu vanaa kaola ndu-a kpemaa len.

⁶ Niaa yɛ, la co vanaa bala fondoa bɛ̀ɛ̀lan tɛɛmbuuo. Vɛ̀ɛ̀ o co vanaa bolofaa le a co niaa mɔnɛi lueiyo le? Vɛ̀ɛ̀ nda le a co niaa yɔɔ o fondala kialaa n'yamalan te?

⁷ Vɛ̀ɛ̀ nda le a co diola kɛndɛla niaa sɔla lan yeowlan te?

⁸ Nduyɛ, te la bii pɛ tɔŋ lemasaa mɛɛ o sɛvan-ndo dimi yɛ aa: «Kaola caanda maa nɔm pila», mɛɛ la co caa vilio.

⁹ Kɛ te la hiyàn pɛ vannda, hakio niaa co tosa kon ni, mɛɛ tɔŋndo yaala niaa maa vanaa tɛɛmbua tɔŋnda niaa co o kon ni.

¹⁰ Kani vanndo bii bɛɛ tɔŋndan kpow, kɛ o tɛɛmbuu pɛ silaa o pilɛ, mɛɛ tɔŋndan kpow o tɛɛmbuu lende ni.

¹¹ Kani vana dimi aa suunda loo, ndu ko dimi vɛlɛ ni aa dii vanaciee le. Nduyɛ, te nɔm suunda le, kɛ mà dii vanacieo, mɛɛ a siŋnun vana tɛɛmbuu tɔŋndan kpow-vo.

¹² La sòó mì la kela maa vanaa sɔlanin yamɛi kilullo mɛɛ tɔŋ ihɔɔya co yɛ-a.

¹³ Kani ɲíí venin o yamɛi kiolɔɔ le vanaa tuinun caanda iɲíí le-a le. Ɲííye hiow yamɛi kialɛi polon.

Laalanndo a dɛnndan

¹⁴ Puapilɛa nia, ɔ́ɔ̀ tɔnɔ co le dimio maa vanndo nɔ laalanndo-o, te o peelu ndu a dɛnndan te? Laalan vaa lende nɔla pá mò ciindiáá vana?

¹⁵ Te puapilɛ vanapɔnɔɔ te kon vanalanɔɔ va pɛ a fɛ́lio, mà nɔ balo le dioo lepalaa-lepala le,

¹⁶ mì vana pilɛ o niaa tɛɛn dimul nda aa: «La kɔ a kɔlɲuloo. La kɔ hangu mì la pim!» Te la yɔngu nda ɲɛm diallon nɔ makoo-on te, yɛɛ nɛ ken nɛŋi yɛ?

¹⁷ Lende koni laalanndo bɛɛ co ni. Te dɛnndan la co lenin te, mɛɛ o vílɛíyo laalan kon co o ndu pila nin ni.

¹⁸ Kɛ vana pum diminin aa: «Nɔm, a nɔ laalanndo, ya bɛɛ, i nɔ dɛnndan. Cɔm ya laalan nɔmndo o va a dɛnɛ le, mì ya ya cɔm nɔm laalan nuu o dɛnndan nin.

¹⁹ A laalan maa Hala ndu pilɛ kpé co ni? A caa laalan lende. Ɲinaa bɛɛ laalan lende mà va ɲiiyaa.»

²⁰ Nɔm diɔmndo ho, a yeema lekɛ́ndɛi ma sina maa laalan dɛnndan la co nin too nɛŋi mako le?

²¹ Vɛ̀ɛ̀ o co le dɛnndan te fuɲa naa mamaa Abraham siŋnun vana sandaa, le tùú o soli Isaak po ndɔ sálàá o fonda-loamaa-lasálàá coo-o le?

²² A ce maa laalanndo a dɛnnda ndɔlan la va vallo tosaa latulu ni. O kon le dɛnndan, mí laalanndo peelun.

²³ Nuaa o sɛvan-ndo peelun ni aa: «Abraham laalan Hala, mí kon cɔmnun ndu coo maa dɛnɛ sandaa, má veelu ndu aa caangoo Hala.»

²⁴ La co cɔu maa le dɛnndan vanacieo siŋnun vana sandaa ni, o co le laalanndo daama le.

²⁵ Vɛ̀ɛ̀ o co le dɛnndan te Rahab, vanalanɔ suundɛiyo siŋnun vana sandaa le tùú o sɛɛna kiilaa, mó mingi nda o nɛi celen-ndo le?

²⁶ Mɛɛ dialun yoomu co nin toon co n'vílɛ́iyon yɛ, lende koni laalan dɛnndan la co nin too co o vílɛ́iyo ni.